HEKIMA NA KIKOMO CHA BINADAMU

Maonyo kwa ajili ya unyofu

¹Pendeni haki, enyi waamuzi wa dunia;[#Hek 6:1-11]

Tafakarini habari za BWANA kwa moyo mwema,

Na kumtafuta katika unyofu wa moyo.

²Kwa sababu huonekana nao wasiomjaribu, na kufunuliwa kwao wasiokosa kumwamini.

³Mradi fikira zilizopotoka hutenga wanadamu na Mungu, na enzi yake ikijaribiwa, huwafadhaisha wajinga.

⁴Hekima haiingii katika roho ya mtu awazaye maovu, wala haikai katika mwili wa mtu aliyefungwa rehani na dhambi.

⁵Kwa kuwa roho takatifu yenye maadili huikimbia hila, hubumburuka kujiepusha na fikira zisizo na akili, hufadhaika kuingiwa na udhalimu.

⁶Maana hekima ni roho ambayo huwapenda wanadamu, wala haimwachilii mkufuru hatia ya midomo yake; kwa sababu Mungu huvishuhudia viuno vyake, na kuusimamia hasa moyo wake, na kuusikiliza ulimi wake.

⁷Roho ya BWANA imeujaza ulimwengu, nayo inayoviungamanisha viumbe vyote hujua maana ya kila sauti.

⁸Kwa hiyo kila anenaye yasiyo haki hafichiki kabisa, wala Haki haimpiti ikifanya hukumu.

⁹Yaani, katikati ya mashauri yake mtu mwovu atachunguzwa, na sauti ya maneno yake itamfikia BWANA, ili maasi yake yahukumiwe.

¹⁰Ndiyo maana kuna sikio la wivu ambalo husikiliza yote, wala kelele za manung'uniko hazisitiriki.

¹¹Jihadharini, basi, na manung'uniko yasiyofaa, na kujizuia ndimi zenu na masingizio; madhali neno linenwalo kwa siri haliendelei bure, na kinywa kisemacho uongo huiangamiza roho.

¹²Msijitakie mauti katika ukosefu wa roho zenu;

Wala msijivutie uharibifu kwa kazi za mikono yenu.

¹³Yaani, Mungu hakuifanyiza mauti, wala haimpendezi walio hai wakipotea.[#Eze 18:32; 33:11; 2 Pet 3:9]

¹⁴Kwa maana aliviumba vitu vyote ili vipate kuwako, na nguvu za uzazi zilizomo ulimwenguni ni za kuleta siha, wala hakuna ndani yake sumu yoyote ya uharibifu, wala ahera.

¹⁵Maana haki yaishi milele.

Maisha kwa jinsi ya wasiomcha Mungu

¹⁶Lakini wanadamu wasio haki, kwa mikono yao na kwa maneno yao, walijiitia mauti; wakaifanya rafiki, wakadhoofu; wakaagana nayo kwa sababu wamestahili kutiwa katika fungu lake.[#Mit 8:36; Isa 28:15; Sira 14:12]