Bahari Nyekundu

¹Lakini juu ya wale wabaya hasira iliwajia upeo bila huruma, kama vile yalivyojulikana yale yatakayowapata.

²Ndiyo ya kwamba, wakiisha kubadili nia zao ili kuwaachilia watu wako, na wakiisha kuwaharakisha waishike njia, wataghairi tena na kuwafuatia.

³Maana wale, hata walipokuwa katika kukaa matanga na kuomboleza panapo makuburi ya wafu wao, wakajivutia shauri lingine la upumbavu, na kuwafuatia kama watoro hao waliokwisha kuwatoa kwa kuwasihi.

⁴Mradi ajali iliyokuwa stahili yao ikiwaongoza hata mwisho huu, ikiwasahulisha mambo yale yaliyowajia, ili waitimilize adhabu mateso yao yaliyoikosa;

⁵tena watu wako waliposafiri kwa mapito ya ajabu, wale wenyewe waione mauti ya kigeni.

Mungu huongoza na kulinda watu wake

⁶Kwa maana ulimwengu mzima, kwa kadiri ya asili yake, ulifanyika tena mpya, kwa kuzitii amri zako hizi na hizi, ili watoto wako walindwe wasipatwe na dhara.

⁷Uwingu ulionekana uliokitia uvuli kituo chao, na nchi kavu ikapanda kutoka pale palipokuwapo maji kwanza, katika Bahari ya Shamu kukawa barabara isiyo na zuio, na uwanda wenye majani katika mawimbi yaumkayo.

⁸Hapo watu wako wakapita pamoja na majeshi yao yote, ambao kwa mkono wako walifunikwa, wakiisha kuona maajabu makuu.

⁹Wakazungukazunguka huru kama farasi, wakarukaruka kama wana-kondoo, wakikuhimidi Wewe, BWANA, uliyekuwa mkombozi wao.

Mungu anawafadhilisha Waisraeli

¹⁰Wakati huo wakazidi kukumbuka mambo yale yaliyotokea hapo walipokuwa wakikaa hali ya kigeni, jinsi badala ya ng'ombe nchi ilizaa chawa, na badala ya samaki mto ulitoa wingi wa vyura.

¹¹Hata baadaye wakaona na jamaa mpya ya ndege, hapo wakiongozwa na tamaa walipotaka vyakula vya anasa,

¹²na kwa kuwashibisha wakapewa kware kutoka bahari.

Adhabu kwa Wamisri

¹³Zaidi ya hayo, wale Wamisri wabaya wakajiliwa na adhabu, wakiisha kuonywa kwa dalili walizopewa katika nguvu za ngurumo; kwa sababu ilikuwa haki wateswe kwa ajili ya ubaya wao. Chuki ile waliyowafanyia wageni wao ilikuwa makuruhi zaidi,

¹⁴mradi watu wa Sodoma hawakuwakaribisha wageni walipowajia, bali Wamisri waliwafanya watumwa wageni wale waliowafaidia.

¹⁵Wala si hivyo tu, ila Mungu atawajia watu wa Sodoma namna nyingine kwa maana waliwapokea kama adui wale waliokuwa wageni;

¹⁶bali hao waliwakaribisha kwanza kwa karamu, na baadaye wakawatesa kwa kazi ngumu, watu waliokwisha kushirikiana nao katika haki za uraia.

¹⁷Na tena wakapigwa kwa kukosa kuona (kama vile wale wengine mlangoni pa Lutu, yule mtu wa haki) pindi walipozungukwa na giza tupu katika Misri wakatafuta kila mtu njia ya kuupitia mlango wake mwenyewe.

Amani mpya

¹⁸Kwa kuwa ni kweli sauti za kinanda, zikibadili orodha yake zisibadilike zenyewe, zaweza kuutofautisha ulinganifu wa mwendo; vivyo hivyo yalivyofanya malimwengu ya asili kama ilivyoonekana kwa kutazama mambo yale yaliyotukia.

¹⁹Viumbe wakaao katika nchi kavu waligeuka viumbe vya majini, na viumbe vya kuogelea wakakanyaga ardhi;

²⁰moto ukazidi upata nguvu katikati ya mvua, na maji yakasahau asili yake ya kuuzimisha;

²¹tena miali ya moto haikuunguza miili ya wanyama wapoteao waliotembea kati yake, wala katikati ya mvua, na maji yakasahau asili yake ya kuuzimisha; tena miali ya moto haikuunguza miili ya wanyama wapoteao waliotembea kati yake, wala haikuziyeyusha chembe za chakula kitamu, zilizofanana na barafu, na kuwa nyepesi za kuyeyuka.

Hitimisho

²²Wewe, BWANA, katika yote uliwakuza watu wako,

Ukawatukuza wala hukuwadharau,

Ukasimama upande wao kila wakati kila mahali.