¹Maana walisemezana hivi, huku wakifikiri yasiyo kweli, Maisha yetu ni fupi yenye masumbufu, wala hakuna dawa ya kuponya iwapo binadamu aujia mwisho wake, wala hajajulikana mtu awezaye kufungua ahera.

²Tumezaliwa kwa bahati tu, hatimaye tutakuwa kana kwamba hatukupata kuwapo kamwe; mradi pumzi ya puani mwetu ni moshi, hata na akili ni cheche iliyowashwa kwa kupiga moyo wetu;

³ikizimika, mwili utageuka majivu, na roho itatoweka kama hewa.

⁴Halafu jina letu litasahauliwa, asizikumbuke kazi zetu hata mtu mmoja; na maisha yetu yatapita kama nyayo za wingu, yatatoweka kama ukungu, huku yakifukuzwa kwa vianga vya jua na kushindwa kwa moto wake.

⁵Siku zetu zi kama kivuli kipitacho, wala mwisho wetu hauahirishwi; kwa kuwa umetiwa mhuri, wala hakuna aurudishaye.

⁶Haya basi, njoni tujifurahishe kwa mema yaliyopo, tuvitumie vilivyoumbwa kwa roho yetu yote kama milki ya ujanani.[#Isa 22:13; 1 Kor 15:32]

⁷Tujishibishe kwa mvinyo ya thamani na manukato, wala ua lolote la demani lisitupite;

⁸tujivike taji za mawaridi kichwani kabla hayajanyauka;

⁹pasiwe na konde la majani tusipopiga ngoma zetu za anasa, na kila mahali tuziache dalili za machangamko yetu. Hilo ndilo fungu letu, na sehemu yetu ni hiyo.

¹⁰Hata tumwonee maskini mwenye haki; wala tusimhurumie mjane, wala tusimjali mzee mwenye mvi kwa sababu ya umri wake.

¹¹Bali nguvu zetu zituwie sheria ya haki, kwa maana aliye dhaifu amebainika ya kuwa hana faida.

¹²Zaidi ya hayo na tumwotee mtu wa haki, maana hatuna haja naye, naye yu kinyume cha matendo yetu; atukaripia kama tumeiasi torati, na kutushitaki kama tumekosa adabu.

¹³Asema ya kwamba anamjua Mungu, na kujiita mtumishi wa BWANA.

¹⁴Ametuwia magombezi ya fikira zetu. Hata kumtazama twaona ni kugumu;

¹⁵maana maisha yake si sawasawa na maisha ya wengine, na mwenendo wake ni wa kigeni.

¹⁶Tunahesabiwa naye kuwa kama madini hafifu; anajitenga na njia zetu kama na uchafu. Mwenye haki asema kuwa mwisho wao ni heri; hujivuna ya kwamba Mungu ndiye baba yao.

¹⁷Haya na tuone kama maneno yake ni kweli; tufanye kujaribu yatakayompata wakati wa mwisho wake;

¹⁸mradi mwenye haki akiwa ni mwana wa Mungu, Yeye atamtegemeza na kumwokoa mikononi mwa adui zake.

¹⁹Na tumhakikishe kwa jeuri na maumivu, ili tujifunze upole wake na kuithibitisha saburi yake akidhulumiwa.

²⁰Hata tumhukumu auawe mauti ya aibu, maana ataangaliwa sawasawa na maneno yake.

Ujinga wa mwovu

²¹Ndivyo walivyosemezana, wakakosea kabisa. Kwa maana uovu wao uliwapofusha;

²²hawakuzijua siri za Mungu; wala hawakuutarajia mshahara wa utakatifu, wala kudhani ya kwamba iko thawabu kwao wenye roho zisizo na hatia.

²³Yaani, Mungu alimuumba mwanadamu ili apate kutokuharibika, kwa mfano wake mwenyewe,[#Mwa 1:26-27]

²⁴ila ulimwengu uliingiwa na mauti kwa husuda yake Shetani, nao walio wa upande wake hupata kuionja.