Sanduku la Agano Laletwa Yerusalemu

¹Basi Daudi akajifanyia nyumba katika mji wa Daudi; akapaweka tayari mahali kwa ajili ya sanduku la Mungu, akalipigia hema.[#1 Nya 16:1; 17:1-5; Zab 132:2-5; Mdo 7:46]

²Ndipo Daudi akasema, Haimpasi mtu awaye yote kulichukua sanduku la Mungu, isipokuwa Walawi peke yao; kwa kuwa hao ndio aliowachagua BWANA, ili walichukue sanduku la Mungu, na kumtumikia daima.[#Hes 4:2,15; Kum 10:8; 31:9; Yos 3:3]

³Basi Daudi akawakusanya Israeli wote huko Yerusalemu, ili kulipandisha sanduku la BWANA, mpaka mahali pake alipoliwekea tayari.[#1 Fal 8:1; 1 Nya 13:5]

⁴Daudi akawakutanisha wana wa Haruni, na Walawi;

⁵wa wana wa Kohathi; Urieli mkuu wao, na nduguze mia na ishirini;[#Kut 6:16-18]

⁶wa wana wa Merari; Asaya mkuu wao, na nduguze mia mbili na ishirini;

⁷wa wana wa Gershoni; Yoeli mkuu wao, na nduguze mia na thelathini;

⁸wa wana wa Elsafani; Shemaya mkuu wao, na nduguze mia mbili;[#Kut 6:22]

⁹wa wana wa Hebroni; Elieli mkuu wao, na nduguze themanini;[#Kut 6:18; Hes 26:58]

¹⁰wa wana wa Uzieli; Aminadabu mkuu wao, na nduguze mia na kumi na wawili.

¹¹Tena, Daudi akawaita Sadoki na Abiathari makuhani, na hao Walawi, Urieli, Asaya, Yoeli, Shemaya, Elieli, na Aminadabu,

¹²akawaambia, Ninyi ni vichwa vya mbari za baba za Walawi; jitakaseni, ninyi na ndugu zenu, ili mlipandishe sanduku la BWANA, Mungu wa Israeli, mpaka mahali pale nilipoliwekea tayari.[#Kut 19:10,22; Law 10:3; 1 Sam 7:1; 2 Nya 5:11; 29:5,15; Eze 48:11; Yn 17:17; Rum 12:1,2]

¹³Kwani kwa sababu ninyi hamkulichukua safari ya kwanza, BWANA, Mungu wetu, alitufurikia, kwa maana hatukumtafuta sawasawa na sheria.[#2 Sam 6:3; 1 Nya 13:7,10,11]

¹⁴Basi makuhani na Walawi wakajitakasa, ili wapate kulipandisha sanduku la BWANA, Mungu wa Israeli.

¹⁵Na wana wa Walawi wakalichukua sanduku la Mungu mabegani mwao kwa miti yake, kama vile Musa alivyoamuru, sawasawa na neno la BWANA.[#Kut 25:14; Hes 4:15; 7:9]

¹⁶Kisha Daudi akamwambia mkuu wa Walawi, kwamba awaagize ndugu zao waimbaji, pamoja na vyombo vyao vya kupigia ngoma, vinanda, na vinubi, na matoazi, wavipige na kupaza sauti kwa furaha.[#1 Nya 6:31; 13:8; Zab 33:2; 68:25]

¹⁷Basi Walawi wakamwagiza Hemani mwana wa Yoeli; na wa nduguze, Asafu mwana wa Berekia; na wa wana wa Merari ndugu zao, Ethani mwana wa Kishi;[#1 Nya 6:33,39,44]

¹⁸na pamoja nao ndugu zao kwa cheo cha pili, Zekaria, na Yaasieli, na Shemiramothi, na Yehieli, na Uni, na Eliabu; na Benaya, na Maaseya, na Matithia, na Elifelehu, na Mikneya, na Obed-edomu, na Yeieli, mabawabu.

¹⁹Hivyo hao waimbaji, Hemani, Asafu, na Ethani, wakaagizwa kupiga matoazi yao ya shaba kwa sauti kuu;

²⁰na Zekaria, na Yaasieli na Shemiramothi, na Yehieli, na Uni, na Eliabu, na Maaseya, na Benaya, wenye vinanda vya sauti ya Alamothi;

²¹na Matithiya, na Elifelehu, na Mikneya, na Obed-edomu, na Yeieli, na Azazia, wenye vinubi vya sauti ya Sheminithi,

²²waongoze. Na Kenania, mkuu wa Walawi, alikuwa juu ya uchukuzi; yeye aliusimamia uchukuzi, kwa sababu alikuwa mstadi.

²³Na Berekia na Elkana walikuwa mabawabu kwa ajili ya sanduku.

²⁴Na Shebania, na Yoshafati, na Nethaneli, na Amasai, na Zekaria, na Benaya, na Eliezeri, makuhani, wakapiga baragumu mbele ya sanduku la Mungu; na Obed-edomu na Yehia walikuwa mabawabu kwa ajili ya sanduku.[#Hes 10:8; Zab 81:3]

²⁵Basi Daudi, na wazee wa Israeli, na maakida wa maelfu, wakaenda, ili kulipandisha sanduku la agano la BWANA kutoka nyumbani mwa Obed-edomu kwa furaha kuu;[#2 Sam 6:12,13; 1 Fal 1:8; Kum 12:7,18; Ezr 6:16]

²⁶hata ikawa, Mungu alipowajalia Walawi waliolichukua sanduku la agano la BWANA, wakachinja ng’ombe saba, na kondoo waume saba.[#Hes 23:1; Ayu 42:8]

²⁷Naye Daudi alikuwa amevaa joho ya kitani safi, na Walawi wote waliolichukua sanduku, na waimbaji, na Kenania msimamizi wa uchukuzi, na waimbaji; naye Daudi alikuwa amevaa naivera ya kitani.

²⁸Ndivyo Israeli wote walivyolipandisha sanduku la agano la BWANA kwa shangwe na kwa sauti ya tarumbeta, na kwa baragumu, na kwa matoazi, wakipiga sauti kuu kwa vinanda na vinubi.[#1 Nya 13:8]

²⁹Hata ikawa, sanduku la agano la BWANA lilipofika mjini kwa Daudi, Mikali binti Sauli akachungulia dirishani, akamwona mfalme Daudi, akicheza na kushangilia; akamdharau moyoni mwake.[#2 Sam 6:16; Mdo 2:13]