Kumtangaza Kristo Aliyesulubiwa

¹Basi, ndugu zangu, mimi nilipokuja kwenu, sikuja niwahubiri siri ya Mungu kwa ufasaha wa maneno, wala kwa hekima.[#1 Kor 1:17]

²Maana naliazimu nisijue neno lo lote kwenu ila Yesu Kristo, naye amesulibiwa.[#Gal 6:14]

³Nami nalikuwako kwenu katika hali ya udhaifu na hofu na matetemeko mengi.[#Mdo 18:9; 2 Kor 10:1]

⁴Na neno langu na kuhubiri kwangu hakukuwa kwa maneno ya hekima yenye kushawishi akili za watu, bali kwa dalili za Roho na za nguvu,

⁵ili imani yenu isiwe katika hekima ya wanadamu, bali katika nguvu za Mungu.[#Efe 1:17; 1 The 1:5]

Hekima ya Kweli ya Mungu

⁶Walakini iko hekima tusemayo kati ya wakamilifu; ila si hekima ya dunia hii, wala ya hao wanaoitawala dunia hii, wanaobatilika;[#Flp 3:15]

⁷bali twanena hekima ya Mungu katika siri, ile hekima iliyofichwa, ambayo Mungu aliiazimu tangu milele, kwa utukufu wetu;[#Rum 16:25]

⁸ambayo wenye kuitawala dunia hii hawaijui hata mmoja; maana kama wangaliijua, wasingalimsulibisha Bwana wa utukufu;[#Lk 23:34; Yak 2:1; Kol 1:26]

⁹lakini, kama ilivyoandikwa,[#Isa 64:4]

Mambo ambayo jicho halikuyaona wala sikio halikuyasikia,

(Wala hayakuingia katika moyo wa mwanadamu,)

Mambo ambayo Mungu aliwaandalia wampendao.

¹⁰Lakini Mungu ametufunulia sisi kwa Roho. Maana Roho huchunguza yote, hata mafumbo ya Mungu.[#Mt 13:11; Mit 20:27]

¹¹Maana ni nani katika binadamu ayajuaye mambo ya binadamu ila roho ya binadamu iliyo ndani yake? Vivyo hivyo na mambo ya Mungu hakuna ayafahamuye ila Roho wa Mungu.

¹²Lakini sisi hatukuipokea roho ya dunia, bali Roho atokaye kwa Mungu, makusudi tupate kuyajua tuliyokirimiwa na Mungu.[#Yn 16:13,14]

¹³Nayo twayanena, si kwa maneno yanayofundishwa kwa hekima ya kibinadamu, bali yanayofundishwa na Roho, tukiyafasiri mambo ya rohoni kwa maneno ya rohoni.[#1 Kor 1:4]

¹⁴Basi mwanadamu wa tabia ya asili hayapokei mambo ya Roho wa Mungu; maana kwake huyo ni upuzi, wala hawezi kuyafahamu, kwa kuwa yatambulikana kwa jinsi ya rohoni.[#Yn 8:47; 14:17]

¹⁵Lakini mtu wa rohoni huyatambua yote, wala yeye hatambuliwi na mtu.[#1 Yoh 2:20]

¹⁶Maana, Ni nani aliyeifahamu nia ya Bwana, amwelimishe? Lakini sisi tunayo nia ya Kristo.[#Isa 40:13; Rum 11:34]