Jiwe Hai na Watu Walioteuliwa

¹Basi, wekeni mbali uovu wote na hila yote, na unafiki na husuda na masingizio yote.[#Efe 4:22; Yak 1:21]

²Kama watoto wachanga waliozaliwa sasa yatamanini maziwa ya akili yasiyoghoshiwa, ili kwa hayo mpate kuukulia wokovu;[#1 Kor 3:2; Ebr 5:12,13; Mt 18:3]

³ikiwa mmeonja ya kwamba Bwana ni mwenye fadhili.[#Zab 34:8]

⁴Mmwendee yeye, jiwe lililo hai, lililokataliwa na wanadamu, bali kwa Mungu ni teule, lenye heshima.[#Zab 118:22; Isa 28:16; Mt 21:42; Mdo 4:11]

⁵Ninyi nanyi, kama mawe yaliyo hai, mmejengwa mwe nyumba ya Roho, ukuhani mtakatifu, mtoe dhabihu za roho, zinazokubaliwa na Mungu, kwa njia ya Yesu Kristo.[#Efe 2:21,22; Rum 12:1]

⁶Kwa kuwa imeandikwa katika maandiko[#Isa 28:16; Rum 9:33]

Tazama, naweka katika Sayuni jiwe kuu la pembeni, teule, lenye heshima,

Na kila amwaminiye hatatahayarika.

⁷Basi, heshima hii ni kwenu ninyi mnaoamini. Bali kwao wasioamini,[#Zab 118:22; Mt 21:42]

Jiwe walilolikataa waashi,

Limekuwa jiwe kuu la pembeni.

⁸Tena,[#Isa 8:14-15; Rum 9:33]

Jiwe la kujikwaza mguu, na mwamba wa kuangusha.

Kwa maana hujikwaza kwa neno lile, wasiliamini, nao waliwekwa kusudi wapate hayo.

⁹Bali ninyi ni mzao mteule, ukuhani wa kifalme, taifa takatifu, watu wa milki ya Mungu, mpate kuzitangaza fadhili zake yeye aliyewaita mtoke gizani mkaingie katika nuru yake ya ajabu;[#Kut 19:5-6; Isa 43:20-21; Kum 4:20; 7:6; 14:2; Tit 2:14; Isa 9:2; Mdo 26:18; 2 Kor 4:6; Efe 5:8; Flp 2:15; Ufu 1:6]

¹⁰ninyi mliokuwa kwanza si taifa, bali sasa ni taifa la Mungu; mliokuwa hamkupata rehema, bali sasa mmepata rehema.[#Hos 1:6,9; 2:1,23; Rum 9:25]

Ishini kama Watumishi wa Mungu

¹¹Wapenzi, nawasihi kama wapitaji na wasafiri, ziepukeni tamaa za mwili zipiganazo na roho.[#Zab 39:12; Gal 5:17,24; Efe 2:19; Yak 4:1]

¹²Mwe na mwenendo mzuri kati ya Mataifa, ili, iwapo huwasingizia kuwa watenda mabaya, wayatazamapo matendo yenu mazuri, wamtukuze Mungu siku ya kujiliwa.[#Isa 10:3; Mt 5:16; Yak 3:13]

¹³Tiini kila kiamriwacho na watu, kwa ajili ya Bwana; ikiwa ni mfalme, kama mwenye cheo kikubwa;[#Rum 13:1-7; Tit 3:1]

¹⁴ikiwa ni wakubwa, kama wanaotumwa naye ili kuwalipiza kisasi watenda mabaya na kuwasifu watenda mema.

¹⁵Kwa sababu ndiyo mapenzi ya Mungu, kwamba kwa kutenda mema mzibe vinywa vya ujinga vya watu wapumbavu;[#1 Pet 3:16]

¹⁶kama walio huru, ila wasioutumia uhuru huo kwa kusitiri ubaya, bali kama watumwa wa Mungu.[#Gal 5:13]

¹⁷Waheshimuni watu wote. Wapendeni ndugu. Mcheni Mungu. Mpeni heshima mfalme.[#Rum 12:10; Mit 24:21; Mt 22:21]

Mfano wa Kuteswa kwa Yesu

¹⁸Enyi watumishi, watiini bwana zenu kwa hofu nyingi, sio wao walio wema na wenye upole tu, bali nao walio wakali.[#Efe 6:5; Tit 2:9]

¹⁹Maana huu ndio wema hasa, mtu akivumilia huzuni kwa kumkumbuka Mungu, pale ateswapo isivyo haki.

²⁰Kwa maana ni sifa gani kustahimili, mtendapo dhambi na kupigwa makofi? Lakini kustahimili, mtendapo mema na kupata mateso, huu ndio wema hasa mbele za Mungu.[#1 Pet 3:14,17; 4:13,14; Mt 5:10]

²¹Kwa sababu ndio mlioitiwa; maana Kristo naye aliteswa kwa ajili yenu, akawaachia kielelezo, mfuate nyayo zake.[#Mt 16:24; Yn 13:15]

²²Yeye hakutenda dhambi, wala hila haikuonekana kinywani mwake.[#Isa 53:9; Yn 8:46; 2 Kor 5:21]

²³Yeye alipotukanwa, hakurudisha matukano; alipoteswa, hakuogofya; bali alijikabidhi kwake yeye ahukumuye kwa haki.[#Isa 53:7]

²⁴Yeye mwenyewe alizichukua dhambi zetu katika mwili wake juu ya mti, tukiwa wafu kwa mambo ya dhambi, tuwe hai kwa mambo ya haki; na kwa kupigwa kwake mliponywa.[#Isa 53:5,12; 1 Yoh 3:5; Rum 6:11; Ebr 9:28]

²⁵Kwa maana mlikuwa mnapotea kama kondoo; lakini sasa mmemrudia Mchungaji na Mwangalizi wa roho zenu.[#Isa 53:6; Eze 34:5; 1 Pet 5:4; Yn 10:12]