Kujinyima Kusikofaa

¹Basi Roho anena waziwazi ya kwamba nyakati za mwisho wengine watajitenga na imani, wakisikiliza roho zidanganyazo, na mafundisho ya mashetani;[#2 Tim 3:1; 2 Pet 3:3; Yud 1:18; 1 Yoh 2:18]

²kwa unafiki wa watu wasemao uongo, wakichomwa moto dhamiri zao wenyewe;

³wakiwazuia watu wasioe, na kuwaamuru wajiepushe na vyakula, ambavyo Mungu aliviumba vipokewe kwa shukrani na walio na imani wenye kuijua hiyo kweli.[#Mwa 9:3; 1 Kor 10:30,31]

⁴Kwa maana kila kiumbe cha Mungu ni kizuri, wala hakuna cha kukataliwa, kama kikipokewa kwa shukrani;[#Mwa 1:31; Mdo 10:15]

⁵kwa kuwa kimetakaswa kwa neno la Mungu na kwa kuomba.

Mtumishi Mwema wa Yesu Kristo

⁶Uwakumbushe ndugu mambo hayo, nawe utakuwa mtumishi mwema wa Kristo Yesu, na mzoevu wa maneno ya imani, na mafundisho mazuri yale uliyoyafuata.

⁷Bali hadithi za kizee, zisizokuwa za dini, uzikatae; nawe ujizoeze kupata utauwa.[#1 Tim 1:4; 6:20; 2 Tim 2:16,23; Tit 1:14; 3:9]

⁸Kwa maana kujizoeza kupata nguvu za mwili kwafaa kidogo, lakini utauwa hufaa kwa mambo yote; yaani, unayo ahadi ya uzima wa sasa, na ya ule utakaokuwapo baadaye.[#1 Tim 6:6]

⁹Ni neno la kuaminiwa, tena lastahili kukubalika kabisa;[#1 Tim 1:15]

¹⁰kwa maana twajitaabisha na kujitahidi kwa kusudi hili, kwa sababu tunamtumaini Mungu aliye hai, aliye Mwokozi wa watu wote, hasa wa waaminio.[#1 Tim 2:3,4]

¹¹Mambo hayo uyaagize na kuyafundisha.

¹²Mtu awaye yote asiudharau ujana wako, bali uwe kielelezo kwao waaminio, katika usemi na mwenendo, na katika upendo na imani na usafi.[#Tit 2:15]

¹³Hata nitakapokuja, ufanye bidii katika kusoma na kuonya na kufundisha.

¹⁴Usiache kuitumia karama ile iliyomo ndani yako, uliyopewa kwa unabii na kwa kuwekewa mikono ya wazee.[#1 Tim 5:22; 2 Tim 1:6; Mdo 6:6; 8:17]

¹⁵Uyatafakari hayo; ukae katika hayo; ili kuendelea kwako kuwe dhahiri kwa watu wote.

¹⁶Jitunze nafsi yako, na mafundisho yako. Dumu katika mambo hayo; maana kwa kufanya hivyo utajiokoa nafsi yako na wale wakusikiao pia.[#Rum 11:14]