Mtu wa Uvunjaji Sheria

¹Basi, ndugu, tunakusihini, kwa habari ya kuja kwake Bwana wetu Yesu Kristo, na kukusanyika kwetu mbele zake,[#1 The 4:15-17]

²kwamba msifadhaishwe upesi hata kuiacha nia yenu, wala msisitushwe, kwa roho, wala kwa neno, wala kwa waraka unaodhaniwa kuwa ni wetu, kana kwamba siku ya Bwana imekwisha kuwapo.

³Mtu awaye yote asiwadanganye kwa njia yo yote; maana haiji, usipokuja kwanza ule ukengeufu; akafunuliwa yule mtu wa kuasi, mwana wa uharibifu;[#1 Tim 4:1; Yn 17:12; 1 Yoh 2:18; 4:3]

⁴yule mpingamizi, ajiinuaye nafsi yake juu ya kila kiitwacho Mungu ama kuabudiwa; hata yeye mwenyewe kuketi katika hekalu la Mungu, akijionyesha nafsi yake kana kwamba yeye ndiye Mungu.[#Dan 11:36; Eze 28:2]

⁵Je! Hamkumbuki ya kuwa wakati nilipokuwapo pamoja nanyi naliwaambieni hayo?

⁶Na sasa lizuialo mwalijua, yule apate kufunuliwa wakati wake.

⁷Maana ile siri ya kuasi hivi sasa inatenda kazi; lakini yuko azuiaye sasa, hata atakapoondolewa.[#Mdo 20:29]

⁸Hapo ndipo atakapofunuliwa yule asi, ambaye Bwana Yesu atamwua kwa pumzi ya kinywa chake, na kumwangamiza kwa ufunuo wa kuwapo kwake;[#Isa 11:4; Ayu 4:9; Ufu 19:15,20]

⁹yule ambaye kuja kwake ni kwa mfano wa kutenda kwake Shetani, kwa uwezo wote, na ishara na ajabu za uongo;[#Mt 24:24; Ufu 13:11-13]

¹⁰na katika madanganyo yote ya udhalimu kwa hao wanaopotea; kwa sababu hawakukubali kuipenda ile kweli, wapate kuokolewa.[#2 Kor 2:15; 4:3]

¹¹Kwa hiyo Mungu awaletea nguvu ya upotevu, wauamini uongo;[#2 Tim 4:4]

¹²ili wahukumiwe wote ambao hawakuiamini kweli, bali walikuwa wakijifurahisha katika udhalimu.

Waliochaguliwa kwa Wokovu

¹³Lakini imetupasa sisi kumshukuru Mungu sikuzote kwa ajili yenu, ndugu mliopendwa na Bwana, kwa kuwa Mungu amewachagua tangu mwanzo mpate wokovu, katika kutakaswa na Roho, na kuiamini kweli;[#Efe 1:4; Kum 33:12; 1 The 2:13; 4:7]

¹⁴aliyowaitia ninyi kwa injili yetu, ili kuupata utukufu wa Bwana wetu Yesu Kristo.[#1 The 4:7; 5:9]

¹⁵Basi, ndugu, simameni imara, mkayashike mapokeo mliyofundishwa, ama kwa maneno, ama kwa waraka wetu.

¹⁶Na Bwana wetu Yesu Kristo mwenyewe, na Mungu Baba yetu, aliyetupenda akatupa faraja ya milele na tumaini jema, katika neema,[#1 The 3:11-13]

¹⁷awafariji mioyo yenu, na kuwafanya imara katika kila neno na tendo jema.