Hitaji la Maombi

¹Hatimaye, ndugu, tuombeeni, neno la Bwana liendelee, na kutukuzwa vile vile kama ilivyo kwenu;[#Kol 4:3; 1 The 5:25]

²tukaokolewe na watu wasio haki, wabaya; maana si wote walio na imani.

³Lakini Bwana ni mwaminifu, atakayewafanya imara na kuwalinda na yule mwovu.[#1 The 5:24]

⁴Nasi tumemtumaini Bwana kwa mambo yenu, kwamba mnayafanya tulivyowaagiza, tena kwamba mtayafanya.[#1 The 4:10; Gal 5:10; 2 Kor 7:16]

⁵Bwana awaongoze mioyo yenu mkapate pendo la Mungu, na saburi ya Kristo.

Onyo juu ya Kutofanya Kazi

⁶Ndugu, twawaagiza katika jina la Bwana Yesu Kristo, jitengeni nafsi zenu na kila ndugu aendaye bila utaratibu, wala si kwa kufuata mapokeo mliyoyapokea kwetu.[#Mt 18:17; Rum 16:17; 1 The 5:14; 4:1]

⁷Mwajua wenyewe jinsi iwapasavyo kutufuata; kwa sababu hatukuenda bila utaratibu kwenu;[#1 The 2:1; 1:6]

⁸wala hatukula chakula kwa mtu ye yote bure; bali kwa taabu na masumbufu, usiku na mchana tulitenda kazi, ili tusimlemee mtu wa kwenu awaye yote.[#1 Kor 4:12; Flp 3:17; 1 The 2:9]

⁹Si kwamba hatuna amri, lakini makusudi tufanye nafsi zetu kuwa kielelezo kwenu, mtufuate.[#Mt 10:10; 1 Kor 4:16; 1 The 1:6,7]

¹⁰Kwa kuwa hata wakati ule tulipokuwapo kwenu tuliwaagiza neno hili, kwamba ikiwa mtu hataki kufanya kazi, basi, asile chakula.[#Mwa 3:19; 1 The 3:4; 4:11]

¹¹Maana twasikia kwamba wako watu kwenu waendao bila utaratibu, hawana shughuli zao wenyewe, lakini wanajishughulisha na mambo ya wengine.[#1 The 5:14]

¹²Basi twawaagiza hao, na kuwaonya katika Bwana Yesu Kristo, watende kazi kwa utulivu na kula chakula chao wenyewe.[#1 The 4:11]

¹³Lakini ninyi, ndugu, msikate tamaa katika kutenda mema.[#Gal 6:9]

¹⁴Na ikiwa mtu awaye yote halishiki neno letu la waraka huu, jihadharini na mtu huyo, wala msizungumze naye, apate kutahayari;[#1 Kor 5:9,11]

¹⁵lakini msimhesabu kuwa adui, bali mwonyeni kama ndugu.[#1 The 5:13,14]

Salamu za Mwisho na Baraka

¹⁶Sasa, Bwana wa amani mwenyewe na awape amani daima kwa njia zote. Bwana awe pamoja nanyi nyote.[#1 The 5:23]

¹⁷Salamu zangu mimi Paulo, kwa mkono wangu mwenyewe. Hii ndiyo alama katika kila waraka, ndio mwandiko wangu.[#1 Kor 16:21]

¹⁸Neema ya Bwana wetu Yesu Kristo na iwe pamoja nanyi nyote.