¹Basi majina ya wana wa Israeli walioingia Misri ni haya; kila mtu pamoja na jamaa zake walikuja pamoja na Yakobo.[#Mwa 46:8-27; Kut 6:14]

²Reubeni, na Simeoni na Lawi, na Yuda;

³na Isakari, na Zabuloni, na Benyamini;

⁴na Dani, na Naftali, na Gadi, na Asheri.

⁵Na nafsi zile zote zilizotoka viunoni mwa Yakobo zilikuwa ni nafsi sabini; na huyo Yusufu alikuwa huko ndani ya Misri tangu hapo.[#Mwa 46:26; Kum 10:22]

⁶Yusufu akafa, na ndugu zake wote, na watu wote wa kizazi kile.[#Mwa 50:26; Mdo 7:15; Mhu 1:4]

⁷Na wana wa Israeli walikuwa na uzazi sana, na kuongezeka mno, na kuzidi kuwa wengi, nao wakaendelea na kuongezeka nguvu; na ile nchi ilikuwa imejawa na wao.[#Mdo 7:17; Mwa 46:3; Kum 26:5; Zab 105:24]

Waisraeli Wateswa

⁸Basi akainuka mfalme mpya kutawala Misri, asiyemjua Yusufu.[#Mdo 7:18]

⁹Akawaambia watu wake, Angalieni, watu wa wana wa Israeli ni wengi tena wana nguvu kuliko sisi.[#Zab 105:24]

¹⁰Haya! Na tuwatendee kwa akili, wasije wakaongezeka; tena, ikitokea vita, wao nao wasije wakashikamana na adui zetu na kupigana nasi, na kutoka katika nchi hii.[#Mdo 7:19; Zab 10:2; 83:3; Ayu 5:13; Mit 28:16]

¹¹Basi wakaweka wasimamizi juu yao wawatese kwa mizigo yao. Nao wakamjengea Farao miji ya kuwekea akiba, Pithomu na Ramesesi.[#Mwa 15:1; Kut 2:11; 3:7; 5:4; Mit 27:3; Zab 81:6; Mwa 47:11]

¹²Lakini kwa kadiri ya walivyowatesa ndivyo walivyoongezeka na kuzidi kuenea. Nao walichukiwa kwa sababu ya wana wa Israeli.

¹³Wamisri wakawatumikisha wana wa Israeli kwa ukali;

¹⁴wakafanya maisha yao kuwa uchungu kwa kazi ngumu; kazi ya chokaa na ya matofali, na kila namna ya kazi ya mashamba; kwa kazi zao zote walizowatumikisha kwa ukali.[#Kut 2:23; 22:21; Law 25:14,17; Hes 20:15; Ayu 20:19; Mit 14:31; 22:22; Mdo 7:19,34; Zab 10:17,18; 81:6]

¹⁵Kisha mfalme wa Misri akasema na wazalisha wa Waebrania, mmoja jina lake aliitwa Shifra, na wa pili jina lake aliitwa Pua;

¹⁶akasema, Wakati mwazalishapo wanawake wa Kiebrania na kuwaona wa katika kuzaa, ikiwa ni mtoto mwanamume, basi mwueni, bali ikiwa ni mtoto mwanamke, na aishi.

¹⁷Lakini wale wazalisha walikuwa wakimcha Mungu, wasifanye kama walivyoamriwa na huyo mfalme wa Misri, lakini wakawahifadhi hai wale wanaume.[#Mit 16:6; Dan 3:16,18; 6:13; Mdo 5:29]

¹⁸Basi mfalme wa Misri akawaita wale wazalisha na kuwauliza, Kwa nini kufanya jambo hili, na kuwahifadhi watoto waume wawe hai?

¹⁹Wazalisha wakamwambia Farao, Ni kwa sababu hao wanawake wa Kiebrania si kama wanawake wa Kimisri; kwa kuwa ni hodari hao, nao huzaa kabla mzalisha hajapata kuwafikilia.[#Yos 2:4; 2 Sam 17:19,20]

²⁰Basi Mungu akawatendea mema wale wazalisha; na hao watu wakaongezeka sana, wakaendelea na kuzidi kuwa na nguvu nyingi.[#Mit 11:18; Mhu 8:12; Isa 3:10; Ebr 6:10]

²¹Ilikuwa kwa sababu wale wazalisha walikuwa wakimcha Mungu, akawasimamishia nyumba.[#1 Sam 2:25; 2 Sam 7:11,13,27,29; 1 Fal 2:24; 11:38; Zab 127:1]

²²Kisha huyo Farao akawaagiza watu wake, akisema, Kila mtoto mwanamume atakayezaliwa mtamtupa mtoni, na kila mtoto mwanamke mtamhifadhi hai.[#Mdo 7:19]