Maji toka Mwambani

¹Mkutano wote wa wana wa Israeli ukasafiri, kutoka bara ya Sini kwa safari zao, kama BWANA alivyowaagiza, wakatua Refidimu; napo hapakuwa na maji, watu wanywe.[#Hes 20:2-13; Kut 16:1; 19:2; Hes 33:12,14]

²Kwa hiyo hao watu wakateta na Musa, wakasema, Tupe maji tunywe. Musa akawaambia, Kwani kuteta na mimi? Mbona mnamjaribu BWANA?[#Hes 20:3; Kum 6:16; Zab 78:41; Isa 7:12; Mt 4:7; 1 Kor 10:9]

³Watu wakawa na kiu huko; nao wakamnung’unikia Musa, wakasema, Mbona umetupandisha kutoka Misri, kutuua sisi na watoto wetu na wanyama wetu kwa kiu?[#Kut 16:2]

⁴Musa akamlilia BWANA, akisema, Niwatendee nini watu hawa? Bado kidogo nao watanipiga kwa mawe.[#1 Sam 30:6; Yn 8:59; 10:31]

⁵BWANA akamwambia Musa, Pita mbele ya watu, ukawachukue baadhi ya wazee wa Israeli pamoja nawe; na ile fimbo yako ambayo uliupiga mto kwayo, uitwae mkononi mwako, ukaende.[#Eze 2:6; Hes 20:8]

⁶Tazama, nitasimama mbele yako huko, juu ya lile jabali katika Horebu; nawe utalipiga jabali, na maji yatatoka, watu wapate kunywa. Musa akafanya hivyo mbele ya wazee wa Israeli.[#Zab 105:41; 114:8; 1 Kor 10:4]

⁷Akapaita mahali pale jina lake Masa, na Meriba; kwa sababu ya mateto ya wana wa Israeli, na kwa sababu walimjaribu BWANA, wakisema, Je! BWANA yu kati yetu au sivyo?[#Zab 95:8; Ebr 3:8]

Waamaleki Washindwa na Waisraeli

⁸Wakati huo Waamaleki wakatokea, wakapigana na Israeli huko Refidimu.[#Mwa 36:12; Hes 24:20; Kum 25:17; 1 Sam 15:2]

⁹Musa akamwambia Yoshua, Tuchagulie watu, ukatoke upigane na Waamaleki; kesho nitasimama juu ya kilele kile, na ile fimbo ya Mungu nitakuwa nayo mkononi mwangu.[#Mdo 7:45; Ebr 4:8]

¹⁰Basi Yoshua akafanya kama Musa alivyomwambia, akapigana na Amaleki; na Musa na Haruni na Huri wakapanda juu ya kile kilima.

¹¹Ikawa, Musa alipouinua mkono wake, Israeli walishinda; na alipoushusha mkono wake, Amaleki walishinda.[#Yak 5:16]

¹²Lakini mikono ya Musa ilikuwa mizito; basi wakatwaa jiwe, wakaliweka chini yake akalikalia. Haruni na Huri wakaitegemeza mikono yake, mmoja upande huu na mmoja upande huu; mikono yake ikathibitika hata jua lilipokuchwa.

¹³Yoshua akawaangamiza Amaleki na watu wake kwa ukali wa upanga.

¹⁴BWANA akamwambia Musa, Andika habari hii katika kitabu iwe ukumbusho, kisha ihubiri masikioni mwa Yoshua; ya kuwa nitaufuta ukumbusho wa Amaleki kabisa, usiwe tena chini ya mbingu.[#Kum 25:17-19; 1 Sam 15:2-9; Kut 34:27; 1 Sam 30:1; 2 Sam 8:12; Ezr 9:14]

¹⁵Musa akajenga madhabahu, akaiita jina lake Yehova-nisi;[#Amu 6:24; #17:15 maana yake ni BWANA ni bendera yangu.]

¹⁶akasema, BWANA ameapa; BWANA atakuwa na vita na Amaleki kizazi baada ya kizazi.