Kuzaliwa na Ujana wa Musa

¹Mtu mmoja wa nyumba ya Lawi akaondoka akaoa binti mmoja wa Lawi.[#Kut 6:20; Hes 26:59; 1 Nya 23:13,14]

²Yule mwanamke akachukua mimba akazaa mwana, na alipoona ya kuwa ni mtoto mzuri akamficha miezi mitatu.[#Mdo 7:20; Ebr 11:23]

³Na alipokuwa hawezi kumficha tena, akampatia kisafina cha manyasi akakipaka sifa na lami, akamtia mtoto ndani yake, akakiweka katika majani kando ya mto.

⁴Umbu lake mtoto akasimama mbali ili ajue yatakayompata.[#Kut 15:20; Hes 26:59]

⁵Basi binti Farao akashuka, aoge mtoni, na vijakazi wake wakatembea kando ya mto; naye akakiona kile kisafina katika majani, akamtuma kijakazi wake kwenda kukileta.[#Mdo 7:21]

⁶Akakifungua, akamwona mtoto, na tazama, mtoto yule analia. Basi akamhurumia, akasema, Huyu ni mmojawapo wa watoto wa Waebrania.

⁷Basi umbu lake mtoto akamwambia binti Farao, Je! Niende nikamwite mlezi katika wanawake wa Kiebrania, aje kwako, akunyonyeshee mtoto huyu?

⁸Binti Farao akamwambia, Haya! Enenda. Yule kijana akaenda akamwita mama yake yule mtoto.

⁹Binti Farao akamwambia, Mchukue mtoto huyu, ukaninyonyeshee, nami nitakupa mshahara wako. Yule mwanamke akamtwaa mtoto, akamnyonyesha.

¹⁰Mtoto akakua, naye akamleta kwa binti Farao, akawa mwanawe. Akamwita jina lake Musa, akasema, Ni kwa sababu nalimtoa majini.[#Mdo 7:21]

Musa Akimbilia Midiani

¹¹Hata siku zile, Musa alipokuwa mtu mzima, akatoka kuwaendea ndugu zake, akatazama mizigo yao. Akamwona Mmisri anampiga Mwebrania, mmojawapo wa ndugu zake.[#Mdo 7:23-28; #Ebr 11:24]

¹²Basi akatazama huko na huko, na alipoona ya kuwa hapana mtu, akampiga Mmisri yule, akamficha ndani ya mchanga.

¹³Akatoka siku ya pili, na tazama, watu wawili wa Waebrania walikuwa wakipigana. Akamwambia yule aliyemdhulumu mwenzake, Mbona unampiga mwenzako?

¹⁴Yule akasema, Ni nani aliyekuweka wewe kuwa mkuu wetu, na mwamuzi juu yetu? Je! Wataka kuniua mimi kama ulivyomwua yule Mmisri? Musa akaogopa, akasema, Kumbe! Jambo lile limejulikana.

¹⁵Basi Farao alipopata habari, akataka kumwua Musa; lakini Musa akakimbia mbele ya Farao, akakaa katika nchi ya Midiani; akaketi karibu na kisima.[#Mdo 7:29; Ebr 11:27; Mwa 24:11; 29:2]

¹⁶Basi kuhani wa Midiani alikuwa na binti saba, nao wakaja wakateka maji, wakazijaza birika maji, wapate kunywesha kundi la baba yao.[#Kut 3:1; Mwa 29:10; 1 Sam 9:11]

¹⁷Wachungaji wakaja wakawafukuza; lakini Musa akasimama, akawasaidia, akalinywesha kundi lao.

¹⁸Walipofika kwa Reueli baba yao, akasema, Imekuwaje hata mkarejea mapema leo?[#Hes 10:29]

¹⁹Wakasema, Mmisri mmoja alituokoa katika mikono ya wachungaji, tena zaidi ya hayo, akatutekea maji, akalinywesha kundi.

²⁰Akawaambia binti zake, Yuko wapi basi? Mbona mmemwacha mtu huyo? Mwiteni, ale chakula.[#Mwa 31:54]

²¹Musa akawa radhi kukaa kwake mtu yule, naye akampa Musa binti yake, Sipora.

²²Huyo akamzalia mwana, akamwita jina lake Gershomu, maana alisema, Nimekuwa mgeni katika nchi ya ugeni.[#Kut 18:3; Ebr 11:13]

²³Hata baada ya siku zile nyingi mfalme wa Misri akafa; wana wa Israeli wakaugua kwa sababu ya ule utumwa, wakalia; kilio chao kikafika juu kwa Mungu kwa sababu ya ule utumwa.[#Kut 7:7; Zab 12:5; Mwa 18:20; Kum 24:15; Yak 5:4]

²⁴Mungu akasikia kuugua kwao, Mungu akakumbuka agano lake alilolifanya na Ibrahimu na Isaka na Yakobo.[#Mwa 15:13-14; Kut 6:5; Zab 105:8]

²⁵Mungu akawaona wana wa Israeli, na Mungu akawaangalia.[#2 Sam 16:12; Lk 1:25]