Damu ya Agano

¹Kisha BWANA akamwambia Musa, Kweeni wewe, na Haruni, na Nadabu, na Abihu, na watu sabini wa wazee wa Israeli, mkamfikilie BWANA; mkasujudie kwa mbali;[#Kut 28:1; Law 10:1,2; Hes 11:16]

²na Musa peke yake ndiye atakayekaribia karibu na BWANA; lakini hao hawatakaribia karibu; wala hao watu hawatakwea pamoja naye.

³Musa akaenda akawaambia watu maneno yote ya BWANA, na hukumu zake zote; watu wote wakajibu kwa sauti moja, wakasema, Maneno yote aliyoyanena BWANA tutayatenda.

⁴Basi Musa akayaandika maneno yote ya BWANA, akaondoka asubuhi na mapema, akajenga madhabahu chini ya mlima, na nguzo kumi na mbili, kwa hesabu ya kabila kumi na mbili za Israeli,[#Kum 31:9; Mwa 28:18; 31:45]

⁵akapeleka vijana wa wana wa Israeli, waliotoa sadaka za kuteketezwa, wakamchinjia BWANA sadaka za amani za ng’ombe.

⁶Musa akatwaa nusu ya ile damu, akaitia katika mabakuli; na nusu ya ile damu akainyunyiza juu ya madhabahu.[#Ebr 9:18]

⁷Kisha akakitwaa kitabu cha agano akakisoma masikioni mwa watu; wakasema, Hayo yote aliyoyanena BWANA tutayatenda, nasi tutatii.

⁸Musa akaitwaa ile damu, akawanyunyizia watu, akasema, Hii ndiyo damu ya agano alilolifanya BWANA pamoja nanyi katika maneno haya yote.[#Mt 26:28; Mk 14:24; Lk 22:20; 1 Kor 11:25; 1 Pet 1:2; Ebr 9:19-20; 10:29]

Juu ya Mlima: Utukufu wa Mungu Waonekana

⁹Ndipo akakwea juu, Musa, na haruni, na Nadabu, na Abihu, na watu sabini miongoni mwa wazee wa Israeli;

¹⁰wakamwona Mungu wa Israeli; chini ya miguu yake palikuwa na kama sakafu iliyofanyizwa kwa yakuti samawi, kama zile mbingu zenyewe kwa usafi wake.[#Mwa 32:30; Kut 3:6; 33:20,23; Isa 6:1,5; Yn 1:18; 1 Tim 6:16; 1 Yoh 4:12; Eze 1:26; 10:1; Ufu 4:3; Mt 17:2]

¹¹Naye hakuweka mkono wake juu ya hao wakuu wa wana wa Israeli; nao wakamwona Mungu, wakala na kunywa.[#Kut 19:21; Mwa 16:13; Kum 4:33; Mwa 31:54; Kut 18:12]

¹²BWANA akamwambia Musa, Njoo huku juu kwangu mlimani, uwe huku; nami nitakupa mbao za mawe na ile sheria na hiyo amri niliyoiandika ili uwafundishe.[#Kut 32:15; Kum 5:22]

¹³Musa akaondoka na Yoshua, mtumishi wake, Musa akapanda mlimani kwa Mungu.[#Kut 33:11]

¹⁴Akawaambia hao wazee, Tungojeeni hapa, mpaka tutakaporudi kwenu; na tazameni, Haruni na Huri wapo pamoja nanyi; kila mtu aliye na neno na awaendee.

¹⁵Musa akapanda mlimani, lile wingu likaufunikiza mlima.[#Kut 19:9; Mt 17:5]

¹⁶Na huo utukufu wa BWANA ukakaa juu ya mlima wa Sinai; lile wingu likaufunikiza siku sita; na siku ya saba akamwita Musa toka kati ya lile wingu.[#Kut 16:10; Hes 14:10]

¹⁷Na kuonekana kwake ule utukufu wa BWANA kulikuwa kama moto uteketezao, juu ya mlima machoni pa wana wa Israeli.[#Ebr 12:18]

¹⁸Musa akaingia ndani ya lile wingu, akapanda mlimani; Musa akawa humo katika ule mlima siku arobaini, mchana na usiku.[#Kum 9:9]