Kuzaliwa kwa Isaka

¹BWANA akamjia Sara kama alivyonena, na BWANA akamfanyia kama alivyosema.[#1 Sam 2:21; Mwa 17:19; 18:10; Gal 4:23]

²Sara akapata mimba akamzalia Ibrahimu mwana wa kiume katika uzee wake, kwa muhula alioambiwa na Mungu.[#Ebr 11:11; Mdo 7:8]

³Ibrahimu akamwita jina lake Isaka, yule mwana aliyezaliwa, ambaye Sara alimzalia.[#Mwa 17:19]

⁴Ibrahimu akamtahiri Isaka mwanawe, alipokuwa mwenye siku nane, kama Mungu alivyomwamuru.[#Mwa 17:12; Mdo 7:8]

⁵Naye Ibrahimu alikuwa mtu wa miaka mia, alipozaliwa mwana wake Isaka.

⁶Sara akasema, Mungu amenifanyia kicheko; kila asikiaye atacheka pamoja nami.[#Zab 126:2; Isa 54:1; Lk 1:14,58]

⁷Akasema, N’nani angemwambia Ibrahimu, Sara atanyonyesha wana? Maana nimemzalia mwana katika uzee wake.[#Mwa 18:11]

Hajiri na Ishmaeli Wafukuzwa

⁸Mtoto akakua, akaachishwa kunyonya; Ibrahimu akafanya karamu kuu siku ile Isaka alipoachishwa kunyonya.

⁹Sara akamwona yule mwana wa Hajiri Mmisri, ambaye alimzalia Ibrahimu, anafanya dhihaka.[#Mwa 16:1,4,15; Gal 4:29]

¹⁰Kwa hiyo akamwambia Ibrahimu, Mfukuze mjakazi huyu na mwanawe, maana mwana wa mjakazi hatarithi pamoja na mwanangu, Isaka.[#Gal 4:29-30; Mwa 25:6; 36:6,7]

¹¹Na neno hilo lilikuwa baya sana machoni pa Ibrahimu, kwa ajili ya mwanawe.[#Mwa 17:18]

¹²Mungu akamwambia Ibrahimu, Neno hili lisiwe baya machoni pako, kwa ajili ya huyo mwana, na huyo mjakazi wako. Kila akuambialo Sara, sikiza sauti yake, kwa maana katika Isaka uzao wako utaitwa.[#Rum 9:7; Ebr 11:18]

¹³Naye mwana wa mjakazi nitamfanya kuwa taifa, maana huyu naye ni uzao wako.[#Mwa 16:10; 17:20; 25:12]

¹⁴Ibrahimu akaamka asubuhi na mapema akatwaa mkate na kiriba cha maji, akampa Hajiri akimtwika begani pake, na kijana, akamruhusu; naye akatoka, akapotea katika jangwa la Beer-sheba.[#Yn 8:35]

¹⁵Yale maji yakaisha katika kiriba, akamlaza kijana chini ya kijiti kimoja.[#Hes 20:5; Zab 63:1]

¹⁶Akaenda akakaa akimkabili, mbali naye kadiri ya mtupo wa mshale; maana alisema, Nisimwone kijana akifa; naye akakaa akimkabili, akapaza sauti yake, akalia.[#Mwa 44:34]

¹⁷Mungu akasikia sauti ya kijana. Malaika wa Mungu akamwita Hajiri kutoka mbinguni, akamwambia, Una nini, Hajiri? Usiogope, maana Mungu amesikia sauti ya kijana huko aliko.[#Kut 3:7; 2 Fal 13:4,23]

¹⁸Ondoka, ukamwinue kijana, ukamshike mkononi mwako, kwa kuwa nitamfanya kuwa taifa kubwa.[#Mwa 21:13; 25:12; Amu 8:24]

¹⁹Mungu akamfumbua macho, naye akaona kisima cha maji; akaenda akakijaza kiriba maji, akamnywesha kijana.[#Hes 22:31; 2 Fal 6:17; Lk 24:16]

²⁰Mungu akawa pamoja na huyo kijana, naye akakua, akakaa katika jangwa, akawa mpiga upinde.[#Mwa 16:12; 39:2,3]

²¹Akakaa katika jangwa la Parani; mama yake akamtwalia mke katika nchi ya Misri.[#Mwa 24:4; 20:2; 26:28; Isa 8:10]

Abrahamu na Abimeleki Wawekeana Agano

²²Ikawa wakati ule Abimeleki, na Fikoli mkuu wa jeshi lake, wakamwambia Ibrahimu, wakinena, Mungu yu pamoja nawe katika yote unayotenda.[#Mwa 26:26]

²³Basi sasa uniapie kwa Mungu, ya kuwa hutanitenda hila, wala mwanangu, wala mjukuu wangu, lakini kwa kadiri ya fadhili niliyokutendea utanitendea mimi, na nchi hii ambayo umetembea ndani yake.[#Yos 2:12; 1 Sam 24:21]

²⁴Ibrahimu akasema, Nitaapa.

²⁵Kisha Ibrahimu akamlaumu Abimeleki kwa sababu ya kisima cha maji ambacho watumwa wa Abimeleki wamekinyang’anya.[#Mwa 26:15-22]

²⁶Abimeleki akasema, Mimi sijui ni nani aliyetenda neno hili, wala hukuniambia, wala sikusikia habari hii ila leo tu.

²⁷Ibrahimu akatwaa kondoo na ng’ombe akampa Abimeleki, na hao wawili wakafanya mapatano.[#Mwa 26:28-31]

²⁸Ibrahimu akaweka wana kondoo wa kike saba peke yao.

²⁹Abimeleki akamwambia Ibrahimu, Hawa wana kondoo wa kike saba, uliowaweka peke yao, maana yake nini?[#Mwa 33:8]

³⁰Akasema, Hawa wana kondoo wa kike saba utawapokea mkononi mwangu, wawe ushuhuda ya kuwa ni mimi niliyekichimba kisima hiki.[#Mwa 31:48]

³¹Kwa hiyo akapaita mahali pale Beer-sheba, kwa sababu waliapa huko wote wawili.[#Mwa 26:33]

³²Basi wakafanya mapatano huko Beer-sheba. Abimeleki, na Fikoli mkuu wa jeshi lake, wakaondoka wakarudi hata nchi ya Wafilisti.[#Yos 13:2]

³³Ibrahimu akapanda mkwaju huko Beer-sheba, akaliitia huko jina la BWANA Mungu wa milele.[#Kum 33:27; Zab 9:7; Isa 9:6; Rum 16:26; Ebr 13:8; 1 Tim 1:17; Ufu 10:6]

³⁴Ibrahimu akakaa hali ya ugeni katika nchi ya Wafilisti siku nyingi.