Kafara ya Kristo Inatosha

¹Basi torati, kwa kuwa ni kivuli cha mema yatakayokuwa, wala si sura yenyewe ya mambo hayo, kwa dhabihu zile zile wanazozitoa kila mwaka daima, haiwezi wakati wo wote kuwakamilisha wakaribiao.[#Ebr 8:5; 7:19]

²Kama ndivyo, je! Dhabihu hazingekoma kutolewa; kwa maana waabuduo, wakiisha kusafishwa mara moja, wasingejiona tena kuwa na dhambi?

³Lakini katika dhabihu hizo liko kumbukumbu la dhambi kila mwaka.[#Law 16:21]

⁴Maana haiwezekani damu ya mafahali na mbuzi kuondoa dhambi.

⁵Kwa hiyo ajapo ulimwenguni, asema,[#Zab 40:6-8]

Dhabihu na toleo hukutaka,

Lakini mwili uliniwekea tayari;

⁶Sadaka za kuteketezwa na sadaka za dhambi hukupendezwa nazo;

⁷Ndipo niliposema, Tazama, nimekuja (katika gombo la chuo nimeandikiwa)

Niyafanye mapenzi yako, Mungu.

⁸Hapo juu asemapo, Dhabihu na matoleo na sadaka za kuteketezwa na hizo za dhambi hukuzitaka, wala hukupendezwa nazo (zitolewazo kama ilivyoamuru torati),

⁹ndipo aliposema, Tazama, nimekuja niyafanye mapenzi yako. Aondoa la kwanza, ili kusudi alisimamishe la pili.

¹⁰Katika mapenzi hayo mmepata utakaso, kwa kutolewa mwili wa Yesu Kristo mara moja tu.[#Ebr 9:12,28]

¹¹Na kila kuhani husimama kila siku akifanya ibada, na kutoa dhabihu zile zile mara nyingi; ambazo haziwezi kabisa kuondoa dhambi.[#Kut 29:38]

¹²Lakini huyu, alipokwisha kutoa kwa ajili ya dhambi dhabihu moja idumuyo hata milele, aliketi mkono wa kuume wa Mungu;[#Zab 110:1]

¹³tangu hapo akingojea hata adui zake wawekwe kuwa chini ya miguu yake.

¹⁴Maana kwa toleo moja amewakamilisha hata milele hao wanaotakaswa.

¹⁵Na Roho Mtakatifu naye amshuhudia; kwa maana, baada ya kusema,

¹⁶Hili ni agano nitakaloagana nao baada ya siku zile, anena Bwana,[#Yer 31:33; Ebr 8:10]

Nitatia sheria zangu mioyoni mwao,

Na katika nia zao nitaziandika;

ndipo anenapo,

¹⁷Dhambi zao na uasi wao sitaukumbuka tena kabisa.[#Yer 31:34; Ebr 8:12]

¹⁸Basi, ondoleo la hayo likiwapo, hapana toleo tena kwa ajili ya dhambi.

Wito wa kuwa Wavumilivu

¹⁹Basi, ndugu, kwa kuwa tuna ujasiri wa kupaingia patakatifu kwa damu ya Yesu,[#Mt 27:51]

²⁰njia ile aliyotuanzia iliyo mpya, iliyo hai, ipitayo katika pazia, yaani, mwili wake;[#Ebr 9:8]

²¹na kuwa na kuhani mkuu juu ya nyumba ya Mungu;[#Zek 6:11; Hes 12:7]

²²na tukaribie wenye moyo wa kweli, kwa utimilifu wa imani, hali tumenyunyiziwa mioyo tuache dhamiri mbaya, tumeoshwa miili kwa maji safi.[#Law 8:30; Eze 36:25; Efe 5:26]

²³Na mlishike sana ungamo la tumaini letu, lisigeuke; maana yeye aliyeahidi ni mwaminifu;[#Ebr 4:14]

²⁴tukaangaliane sisi kwa sisi na kuhimizana katika upendo na kazi nzuri;[#Ebr 13:1]

²⁵wala tusiache kukusanyika pamoja, kama ilivyo desturi ya wengine; bali tuonyane; na kuzidi kufanya hivyo, kwa kadiri mwonavyo siku ile kuwa inakaribia.[#Ebr 3:13]

²⁶Maana, kama tukifanya dhambi kusudi baada ya kuupokea ujuzi wa ile kweli, haibaki tena dhabihu kwa ajili ya dhambi;[#Ebr 6:4-8; 1 Tim 2:4]

²⁷bali kuna kuitazamia hukumu yenye kutisha, na ukali wa moto ulio tayari kuwala wao wapingao.[#Isa 26:11]

²⁸Mtu aliyeidharau sheria ya Musa hufa pasipo huruma, kwa neno la mashahidi wawili au watatu.[#Kum 17:6; 19:15; Hes 15:30; 35:30]

²⁹Mwaonaje? Haikumpasa adhabu iliyo kubwa zaidi mtu yule aliyemkanyaga Mwana wa Mungu, na kuihesabu damu ya agano aliyotakaswa kwayo kuwa ni kitu ovyo, na kumfanyia jeuri Roho wa neema?[#Kut 24:8; Ebr 2:3]

³⁰Maana twamjua yeye aliyesema, Kupatiliza kisasi ni juu yangu, mimi nitalipa. Na tena, Bwana atawahukumu watu wake.[#Kum 32:35-36; Zab 135:14; Rum 12:19]

³¹Ni jambo la kutisha kuanguka katika mikono ya Mungu aliye hai.[#Ebr 12:29]

³²Lakini zikumbukeni siku za kwanza, ambazo, mlipokwisha kutiwa nuru, mlistahimili mashindano makubwa ya maumivu;[#Ebr 6:4]

³³pindi mlipotwezwa kwa mashutumu na dhiki, na pindi mliposhirikiana na wale waliotendewa hayo.[#1 Kor 4:9]

³⁴Maana mliwaonea huruma wale waliokuwa katika vifungo, tena mkakubali kwa furaha kunyang’anywa mali zenu, mkijua kwamba nafsini mwenu mna mali iliyo njema zaidi, idumuyo.[#Mt 6:20; 19:21,29]

³⁵Basi msiutupe ujasiri wenu, kwa maana una thawabu kuu.[#Ebr 11:6]

³⁶Maana mnahitaji saburi, ili kwamba mkiisha kuyafanya mapenzi ya Mungu mpate ile ahadi.[#Ebr 6:12; Lk 21:19]

³⁷Kwa kuwa bado kitambo kidogo sana,[#Hab 2:3-4; Isa 26:20; Lk 21:28; Yak 5:8]

Yeye ajaye atakuja, wala hatakawia.

³⁸Lakini mwenye haki wangu ataishi kwa imani;[#Rum 1:17; Gal 3:11]

Naye akisita-sita, roho yangu haina furaha naye.

³⁹Lakini sisi hatumo miongoni mwao wasitao na kupotea, bali tumo miongoni mwa hao walio na imani ya kutuokoa roho zetu.