Pumziko Aliloahidi Mungu

¹Basi, ikiwa ikaliko ahadi ya kuingia katika raha yake, na tuogope, mmoja wenu asije akaonekana ameikosa.[#Zab 95:11]

²Maana ni kweli, sisi nasi tumehubiriwa habari njema vile vile kama hao. Lakini neno lile lililosikiwa halikuwafaa hao, kwa sababu halikuchanganyika na imani ndani yao waliosikia.

³Maana sisi tulioamini tunaingia katika raha ile; kama vile alivyosema,[#Zab 95:11]

Kama nilivyoapa kwa hasira yangu,

Hawataingia rahani mwangu:

ijapokuwa zile kazi zilimalizika tangu kuwekwa misingi ya ulimwengu.

⁴Kwa maana ameinena siku ya saba mahali fulani hivi, Mungu alistarehe siku ya saba, akaziacha kazi zake zote;[#Mwa 2:2]

⁵na hapa napo, Hawataingia rahani mwangu.[#Zab 95:11]

⁶Basi, kwa kuwa neno hili limebaki kwamba wako watu watakaoingia humo, na wale waliohubiriwa habari ile zamani walikosa kuingia kwa sababu ya kuasi kwao,

⁷aweka tena siku fulani, akisema katika Daudi baada ya muda mwingi namna hii, Leo; kama ilivyonenwa tangu zamani,[#Zab 95:7-8]

Leo, kama mtaisikia sauti yake,

Msifanye migumu mioyo yenu.

⁸Maana kama Yoshua angaliwapa raha, asingaliinena siku nyingine baadaye.[#Kum 31:7; Yos 22:4]

⁹Basi, imesalia raha ya sabato kwa watu wa Mungu.

¹⁰Kwa maana yeye aliyeingia katika raha yake amestarehe mwenyewe katika kazi yake, kama vile Mungu alivyostarehe katika kazi zake.[#Mwa 2:2; Ufu 14:13]

¹¹Basi, na tufanye bidii kuingia katika raha ile, ili kwamba mtu ye yote asije akaanguka kwa mfano uo huo wa kuasi.

¹²Maana Neno la Mungu li hai, tena lina nguvu, tena lina ukali kuliko upanga uwao wote ukatao kuwili, tena lachoma hata kuzigawanya nafsi na roho, na viungo na mafuta yaliyomo ndani yake; tena li jepesi kuyatambua mawazo na makusudi ya moyo.[#Yer 23:29; Isa 49:2; Efe 6:17; Yn 12:48; Ufu 19:15]

¹³Wala hakuna kiumbe kisichokuwa wazi mbele zake, lakini vitu vyote vi utupu na kufunuliwa machoni pake yeye aliye na mambo yetu.

Yesu Aliye Kuhani Mkuu

¹⁴Basi, iwapo tunaye kuhani mkuu aliyeingia katika mbingu, Yesu, Mwana wa Mungu, na tuyashike sana maungamo yetu.[#Ebr 3:1; 6:20; 7:26; 8:1; 9:11]

¹⁵Kwa kuwa hamna kuhani mkuu asiyeweza kuchukuana nasi katika mambo yetu ya udhaifu; bali yeye alijaribiwa sawasawa na sisi katika mambo yote, bila kufanya dhambi.[#Ebr 2:17]

¹⁶Basi na tukikaribie kiti cha neema kwa ujasiri, ili tupewe rehema, na kupata neema ya kutusaidia wakati wa mahitaji.[#1 Yoh 3:21; Rum 3:25]