Mpatanishi wa Agano Bora zaidi

¹Basi, katika hayo tunayosema, neno lililo kuu ndilo hili: Tunaye kuhani mkuu wa namna hii, aliyeketi mkono wa kuume wa kiti cha enzi cha Ukuu mbinguni,[#Zab 110:1; Ebr 4:14]

²mhudumu wa patakatifu, na wa ile hema ya kweli, ambayo Bwana aliiweka wala si mwanadamu.

³Maana kila kuhani mkuu huwekwa ili atoe vipawa na dhabihu; kwa hiyo lazima huyu naye awe na kitu cha kutoa.

⁴Kama angekuwa juu ya nchi, asingekuwa kuhani; maana wako watoao sadaka kama iagizavyo sheria;

⁵watumikiao mfano na kivuli cha mambo ya mbinguni, kama Musa alivyoagizwa na Mungu, alipokuwa tayari kuifanya ile hema; maana asema, Angalia ukavifanye vitu vyote kwa mfano ule ulioonyeshwa katika mlima.[#Kut 25:40; Kol 2:17]

⁶Lakini sasa amepata huduma iliyo bora zaidi, kwa kadiri alivyo mjumbe wa agano lililo bora, lililoamriwa juu ya ahadi zilizo bora.[#Ebr 7:22; 12:24; 2 Kor 3:6]

⁷Maana kama lile la kwanza lingalikuwa halina upungufu, nafasi isingalitafutwa kwa lile la pili.

⁸Maana, awalaumupo, asema[#Yer 31:31-34; Ebr 10:16,17]

Angalia, siku zinakuja, asema Bwana,

Nami nitawatimizia nyumba ya Israeli na nyumba ya Yuda agano jipya;

⁹Halitakuwa kama agano lile nililoagana na baba zao,[#Kut 19:5,6]

Katika siku ile nilipowashika mikono yao niwatoe katika nchi ya Misri.

Kwa sababu hawakudumu katika agano langu,

Mimi nami sikuwajali asema Bwana.

¹⁰Maana hili ndilo agano nitakaloagana na nyumba ya Israeli

Baada ya siku zile, asema Bwana;

Nitawapa sheria zangu katika nia zao,

Na katika mioyo yao nitaziandika;

Nami nitakuwa Mungu kwao,

Nao watakuwa watu wangu.

¹¹Nao hawatafundishana kila mtu na jirani yake,

Na kila mtu na ndugu yake, akisema, Mjue Bwana;

Kwa maana wote watanijua,

Tangu mdogo wao hata mkubwa wao.

¹²Kwa sababu nitawasamehe maovu yao,

Na dhambi zao sitazikumbuka tena.

¹³Kwa kule kusema, Agano jipya, amelifanya lile la kwanza kuwa kuukuu. Lakini kitu kianzacho kuwa kikuukuu na kuchakaa ki karibu na kutoweka.[#Rum 10:4]