Kuugua kwa Hezekia

¹Siku hizo Hezekia aliugua, akawa katika hatari ya kufa; na Isaya nabii, mwana wa Amozi, akaenda kwa mfalme, akamwambia, BWANA asema hivi, Tengeneza mambo ya nyumba yako; maana utakufa, wala hutapona.[#2 Fal 20:1; 2 Nya 32:24]

²Basi Hezekia akajigeuza, akaelekeza uso wake ukutani, akamwomba BWANA,

³akasema, Ee BWANA, kumbuka haya, nakusihi, kwamba nimekwenda mbele zako katika kweli na kwa moyo mkamilifu, na kutenda yaliyo mema machoni pako. Hezekia akalia sana sana.[#Neh 5:19]

⁴Ikawa, neno la BWANA likamjia Isaya, kusema,

⁵Enenda ukamwambie Hezekia, BWANA, Mungu wa Daudi, baba yako, asema hivi, Mimi nimeyasikia maombi yako, nimeyaona machozi yako; tazama, nitaziongeza siku zako, kiasi cha miaka kumi na mitano.

⁶Nami nitakuokoa wewe, na mji huu, na mkono wa mfalme wa Ashuru, nami nitaulinda mji huu.[#Isa 37:35]

⁷Jambo hili liwe ishara kwako, itokayo kwa BWANA, ya kuwa BWANA atalitimiza jambo hili alilolisema;[#2 Fal 20:8; Isa 37:30]

⁸Tazama, nitakirudisha nyuma kivuli madaraja kumi, ambayo kilishuka juu ya duara ya Ahazi kwa sababu ya jua. Basi jua likarudi madaraja kumi katika hiyo duara, ambayo limekwisha kushuka.

⁹Haya ndiyo maandiko ya Hezekia, mfalme wa Yuda, alipokuwa hawezi, naye akapona ugonjwa wake.

¹⁰Nalisema, Katika usitawi wa siku zangu nitakwenda kuingia malango ya kuzimu;[#Zab 102:24]

Nimenyimwa mabaki ya miaka yangu.

¹¹Nalisema, Sitamwona BWANA, yeye BWANA, katika nchi ya walio hai;[#Ayu 35:14; Zab 27:13; 31:22; 116:9]

Sitamwona mwanadamu tena pamoja na hao wakaao duniani.

¹²Kao langu limeondolewa kabisa,[#Ayu 7:6; 2 Kor 5:4; Zab 102:11,23,24]

limechukuliwa kama hema ya mchungaji;

Nimekunja maisha yangu kama mfumaji;

atanikatilia mbali na kitanda cha mfumi;

Tangu mchana hata usiku wanimaliza.

¹³Nalijituliza hata asubuhi;

kama simba, aivunja mifupa yangu yote;

Tangu mchana hata usiku wanimaliza.

¹⁴Kama mbayuwayu au korongo ndivyo nilivyolia;[#Isa 59:11]

Naliomboleza kama hua;

macho yangu yamedhoofu kwa kutazama juu;

Ee BWANA, nimeonewa, na uwe mdhamini wangu.

¹⁵Niseme nini? Yeye amenena nami,[#Ayu 7:11]

na yeye mwenyewe ametenda hayo;

Nitakwenda polepole miaka yangu yote,

kwa sababu ya uchungu wa nafsi yangu.

¹⁶Ee Bwana, kwa mambo hayo watu huishi;

Na uhai wa roho yangu u katika hayo yote;

Kwa hiyo uniponye na kunihuisha.

¹⁷Tazama; nalikuwa na uchungu mwingi kwa ajili ya amani yangu;

Lakini kwa kunipenda umeniokoa na shimo la uharibifu;

Kwa maana umezitupa dhambi zangu zote nyuma yako.

¹⁸Kwa kuwa kuzimu hakuwezi kukusifu;[#Zab 6:5; 30:9; Mhu 9:10]

mauti haiwezi kukuadhimisha;

Wale washukao shimoni hawawezi kuitarajia kweli yako.

¹⁹Aliye hai, naam, aliye hai, ndiye atakayekusifu, kama mimi leo;[#Kum 4:9; Zab 78:3]

Baba atawajulisha watoto kweli yako.

²⁰BWANA yu tayari kunipa wokovu.[#Zab 9:13; 46:1; 66:12]

Basi, kwa vinubi tutaziimba nyimbo zangu,

Siku zote za maisha yetu nyumbani mwa BWANA.

²¹Maana Isaya amesema, Na watwae mkate wa tini, wakauweke juu ya jipu, naye atapona.[#2 Fal 20:7]

²²Tena Hezekia alikuwa amesema, Iko ishara gani ya kunionyesha ya kuwa nitapanda niingie nyumbani mwa BWANA?