¹Mwanadamu aliyezaliwa na mwanamke[#Ayu 15:14; Zab 51:5; Mhu 2:23]

Siku zake za kuishi si nyingi, naye hujaa taabu.

²Yeye huchanua kama vile ua, kisha hukatwa;[#Isa 40:6; Yak 1:10; 1 Pet 1:24]

Hukimbia kama kivuli, wala hakai kamwe.

³Nawe, je! Wafumbua macho yako kumwangalia mtu kama yeye,[#Zab 144:3; 143:2]

Na kunitia katika hukumu pamoja nawe?

⁴Ni nani awezaye kutoa kitu kilicho safi kitoke katika kitu kichafu? Hapana awezaye.[#Mwa 5:3; Zab 51:5; Yn 3:5; Rum 5:12; Efe 2:3]

⁵Kwa kuwa siku zake zimeamriwa, hesabu ya miezi yake unayo wewe,

Nawe umemwekea mipaka yake asiyoweza kuipita;

⁶Acha kumwangalia yeye, apate kupumzika,[#Zab 39:13]

Hata atakapoitimiza siku yake, kama aliyeajiriwa.

⁷Kwani yako matumaini ya mti, ya kuwa ukikatwa utachipuka tena,

Wala machipukizi yake hayatakoma.

⁸Ijapokuwa mizizi yake huchakaa mchangani,

Na shina lake kufa katika udongo;

⁹Lakini kwa harufu ya maji utachipuka,

Na kutoa matawi kama mche.

¹⁰Lakini mwanadamu hufa, huifariki dunia;

Naam, mwanadamu hutoa roho, naye yupo wapi?

¹¹Kama vile maji kupwa katika bahari,

Na mto kupunguka na kukatika;

¹²Ni vivyo mwanadamu hulala chini, asiinuke;[#Zab 102:26; Isa 51:6; Mdo 3:21; Rum 8:20; 2 Pet 3:7; Ufu 20:14]

Hata wakati wa mbingu kutokuwako tena, hawataamka,

Wala kuamshwa usingizini.

¹³Laiti ungenificha kuzimuni,

Ukanilinda kwa siri, hata ghadhabu zako zitakapopita,

Na kuniandikia muda ulioamriwa, na kunikumbuka!

¹⁴Mtu akifa, je! Atakuwa hai tena?[#Ayu 13:15; Zab 16:10; 1 Kor 15:42-58; Flp 3:21]

Mimi ningengoja siku zote za vita vyangu,

Hata kufunguliwa kwangu kunifikilie.

¹⁵Wewe ungeita, nami ningekujibu;[#Ayu 13:22; Zab 50:4; Yn 5:28; 1 The 4:16]

Ungekuwa na tamaa ya kazi ya mikono yako.

¹⁶Lakini sasa wazihesabu hatua zangu;[#Kum 32:34; Ayu 10:6,14; 13:27; Zab 56:8; Mit 5:21; Yer 32:19; Hos 13:12]

Je! Huchungulii dhambi yangu?

¹⁷Kosa langu limetiwa muhuri mfukoni,

Nawe waufunga uovu wangu.

¹⁸Lakini, tazama, mlima ukianguka hutoweka,

Nalo jabali huondolewa mahali pake;

¹⁹Maji mengi huyapunguza mawe;

Mafuriko yake huuchukua mchanga wa nchi;

Nawe matumaini ya wanadamu wayaangamiza.

²⁰Wewe wamshinda nguvu sikuzote, naye hupita aende zake

Wabadili sura zake, na kumpeleka aondoke.

²¹Wanawe hufikilia heshima, wala yeye hajui;[#1 Sam 4:20; Zab 39:6; Mhu 9:5; Isa 63:16]

Kisha wao huaibishwa, lakini yeye hana habari zao.

²²Lakini mwili ulio juu yake una maumivu,[#Zab 49:14; Mit 14:32; Mt 8:12]

Na nafsi yake ndani huomboleza.