Elifazi Anena: Ayubu Anapuuza Dini

¹Ndipo Elifazi, Mtemani, akajibu, na kusema,

²Je! Yapasa mtu mwenye hekima kujibu kwa ujuzi wa uvuvio,

Na kujaza tumbo lake na upepo wa mashariki?

³Je! Ahoji na mazungumzo yasiyo faida,

Au kwa maneno ambayo hawezi kufanya mema kwayo?

⁴Naam, wewe waondoa kicho,

Nawe wazuia ibada mbele za Mungu.

⁵Kwani uovu wako unakufundisha kinywa chako,

Nawe wachagua ulimi wake mwenye hila.

⁶Kinywa chako mwenyewe chakuhukumia makosa, wala si mimi;

Naam, midomo yako mwenyewe hushuhudia juu yako.

⁷Je! Wewe u mtu wa kwanza aliyezaliwa?[#Mit 8:25]

Au, ulizawa wewe kabla ya milima?

⁸Je! Umesikia mashauri ya siri ya Mungu?[#Mt 11:25; Rum 11:34; 1 Kor 2:11]

Nawe je! Wazuia hekima iwe yako tu?

⁹Je! Wewe wajua neno lipi, ambalo sisi hatulijui?[#Ayu 13:2]

Nawe wafahamu nini, ambalo halimo ndani yetu?

¹⁰Wenye mvi, na walio wazee sana, wote wapo pamoja nasi,[#Kum 32:7; Ayu 8:8-10; Mit 16:31]

Ambao ni wazee kuliko baba yako.

¹¹Je! Utulizi wa Mungu ni mdogo sana kwako,

Na hilo neno la upole si kitu kwako?

¹²Mbona moyo wako unakutaharakisha!

Na macho yako, je! Kwani kung’ariza?

¹³Hata ukageuza roho yako iwe kinyume cha Mungu,

Na kuyatoa maneno kama hayo kinywani mwako.

¹⁴Je! Mwanadamu ni kitu gani, hata akawa safi?[#Ayu 25:4-6; 14:4; Zab 14:3; Mit 20:9; Mhu 7:20; Rum 7:18; Efe 2:2,3]

Huyo aliyezaliwa na mwanamke, hata awe na haki?

¹⁵Yeye hawategemei watakatifu wake;[#Ayu 25:5]

Naam, mbingu nazo si safi machoni pake.

¹⁶Sembuse mtu ambaye ni mwenye kuchukiza na uchafu,[#Zab 14:3; Mit 19:28]

Mwanadamu anywaye uovu kama anywavyo maji!

¹⁷Mimi nitakuonyesha, unisikilize;

Na hayo yote niliyoyaona nitayanena;

¹⁸(Ambayo watu wenye hekima wameyatangaza[#Mwa 18:19]

Tokea baba zao, wala hawakuyaficha;

¹⁹Waliopewa hiyo nchi peke yao,[#Yoe 3:17]

Wala mgeni hakupita kati yao);

²⁰Mtu mwovu huwa na uchungu siku zake zote,[#Zab 90:12]

Hata hesabu ya miaka aliyowekewa mwenye kuonea.

²¹Sauti za utisho zi masikioni mwake;[#1 The 5:3]

Katika kufanikiwa kwake mtekaji nyara atamjia juu yake;

²²Yeye hasadiki kwamba atarudi kutoka gizani,

Naye hungojewa na upanga;

²³Hutanga-tanga ili apate chakula, akisema, Ki wapi?[#Zab 59:15; Ayu 18:12]

Ajua kwamba siku ya giza i tayari karibu yake;

²⁴Mateso na dhiki humtia hofu;

Humshinda kama vile mfalme aliye tayari kwa vita;

²⁵Kwa kuwa amenyosha mkono wake juu ya Mungu,[#Mal 3:13]

Na kuendelea kwa kiburi kinyume cha Mwenyezi;

²⁶Humshambulia na shingo ngumu,

Kwa mafundo makubwa ya ngao zake;

²⁷Kwa kuwa amefunika uso wake na kunona kwake,[#Zab 17:10]

Na kuwandisha mafuta kiunoni mwake;

Naye amekaa katika miji iliyo ukiwa,

²⁸Katika nyumba ambazo hapana mtu azikaaye,

Zilizokuwa tayari kuwa magofu.

²⁹Hatakuwa tajiri, wala mali zake hazitadumu,

Wala maongeo yao hayatainama nchi.

³⁰Hataondoka gizani;[#Ayu 4:9; Isa 11:4; Ufu 19:15]

Ndimi za moto zitayakausha matawi yake,

Naye ataondoka kwa pumzi za kinywa chake.

³¹Asiutumainie ubatili, na kujidanganya;[#Zab 62:10; Isa 59:4]

Kwa kuwa huo ubatili ndio utakaokuwa ujira wake.

³²Jambo hili litatendeka kabla ya wakati wake,[#Ayu 22:16; Zab 55:23]

Na tawi lake halitasitawi.

³³Atayapukutisha mapooza yake kama mzabibu,

Na kuyatupa maua yake kama mzeituni.

³⁴Kwa kuwa jamii ya hao wasiomcha Mungu watakuwa tasa,[#Isa 33:14]

Na moto utateketeza mahema yenye rushwa.

³⁵Wao hutunga mimba ya madhara, na kuzaa uovu,[#Zab 7:14; Isa 59:4]

Nalo tumbo lao hutengeza udanganyifu.