Ayubu Aomba Apate Faraja

¹Roho yangu imezimika, siku zangu zimekoma,[#Zab 88:3,4]

Kaburi i tayari kunipokea.

²Ni kweli wako kwangu wenye kufanya dhihaka,[#1 Sam 1:6]

Jicho langu hukaa katika kunifanyia uchungu kwao.

³Nipe rehani basi, uwe dhamana kwa ajili yangu kwako wewe mwenyewe;[#Mit 6:1]

Kuna nani atakayeniwekea dhamana?

⁴Kwani mioyo yao imeificha ufahamu;

Kwa hiyo hutawakuza.

⁵Awafitiniye rafiki zake wawe mawindo,

Hata macho ya watoto wake yataingia kiwi.

⁶Amenifanya niwe simo kwa watu;[#1 Fal 9:7]

Nimekuwa mwenye kuchukiwa kwa wazi.

⁷Jicho langu nalo limekuwa giza kwa sababu ya majonzi,

Na via vyangu vyote vimekuwa kama kivuli.

⁸Walekevu watayastaajabia hayo,

Na asiye na hatia atajiamsha juu ya mpotovu.

⁹Lakini mwenye haki ataishika njia yake,[#Mit 4:18; Zab 24:4]

Naye mwenye mikono safi atazidi kupata nguvu.

¹⁰Lakini rudini; ninyi nyote, njoni sasa;[#Ayu 6:29]

Wala sitampata mtu mwenye hekima kati yenu.

¹¹Siku zangu zimepita, makusudi yangu yamevunjika,[#Ayu 7:6; Isa 38:10]

Hata hayo niliyo nayo moyoni mwangu.

¹²Wabadili usiku kuwa mchana;

Wasema, Mwanga u karibu kwa sababu ya giza.

¹³Nikitazamia kuzimu kuwa nyumba yangu;

Nikitandika malazi yangu gizani;

¹⁴Ikiwa nimeuita uharibifu, Wewe u baba yangu;

Na kuliambia buu, Wewe u mama yangu, na umbu langu;

¹⁵Basi, tumaini langu li wapi?

Na tumaini langu, ni nani atakayeliona?

¹⁶Litashuka kwenye makomeo ya kuzimu,[#2 Kor 1:9; Zab 88:4-8; Ayu 3:17]

Itakapokuwapo raha mavumbini.