Bildadi Anena: Mungu Huwaadhibu Waovu

¹Ndipo Bildadi, Mshuhi, akajibu, na kusema,

²Je! Hata lini utayategea maneno mitambo?

Fikiri, kisha baadaye tutanena.

³Twahesabiwa kuwa wanyama kwa sababu gani,[#Ayu 12:7; Zab 73:22]

Tena kuwa wanajisi machoni pako?

⁴Wewe ujiraruaye mwenyewe katika hasira yako,[#Ayu 13:14]

Je! Dunia itaachwa kwa ajili yako wewe?

Au jabali litaondolewa mahali pake?

⁵Naam, mwanga wa waovu utazimika,[#Ayu 21:17; Mit 13:9]

Wala mwali wa moto wake hautang’aa.

⁶Mwanga hemani mwake utakuwa giza,

Nayo taa iliyo juu yake itazimishwa.

⁷Hatua zake za nguvu zitasongwa,

Na shauri lake mwenyewe litamwangusha chini.

⁸Kwani ametupwa katika wavu na miguu yake mwenyewe,

Naye huenda juu ya matanzi.

⁹Tanzi litamshika kisigino chake,

Na mtambo utamgwia.

¹⁰Amefichiwa tanzi chini,

Na mtego amewekewa njiani.

¹¹Matisho yatamtia hofu pande zote,[#Ayu 6:4; Zab 73:19; Yer 6:25; 2 Kor 5:11]

Na kumfukuza karibu na visigino vyake.

¹²Nguvu zake zitaliwa na njaa,[#Ayu 15:23; 1 The 5:3]

Na msiba utakuwa tayari kwa kusita kwake.

¹³Utakula via vya mwili wake,

Naam, mzaliwa wa kwanza wa mauti atavila via vyake.

¹⁴Atang’olewa katika hema yake aliyokuwa akiitumaini;[#Ayu 8:14; Zab 112:10; Mit 10:28; Mt 7:26,27]

Naye atapelekwa kwake mfalme wa utisho.

¹⁵Ambacho si chake kitakaa katika hema yake;[#Mwa 19:24]

Kiberiti kitamwagwa juu ya makazi yake.

¹⁶Chini, mizizi yake itakaushwa;

Na juu, tawi lake litasinyaa.

¹⁷Kumbukumbu lake litakoma katika nchi,[#Zab 34:16; Mit 2:22]

Wala hatakuwa na jina mashambani.

¹⁸Atakimbizwa kutoka mwangani hata gizani,

Na kufukuzwa atoke duniani.

¹⁹Hatakuwa na mwana wala mjukuu kati ya watu wake,[#Isa 14:22; Yer 22:30]

Wala hatasalia mtu hapo alipokaa.

²⁰Hao wanaokaa magharibi watastaajabia siku yake,

Kama vile wanaokaa mashariki walivyotiwa hofu.

²¹Hakika ndivyo yalivyo makazi ya wapotovu,[#Yer 9:3; 1 The 4:5; 2 The 1:8; Tit 1:16]

Na hapa ni mahali pake asiyemjua Mungu.