Elifazi anena: Uovu wa Ayubu ni Mkuu

¹Ndipo huyo Elifazi Mtemani akajibu, na kusema,

²Je! Yumkini mtu awaye yote kumfaa Mungu?[#Ayu 35:6-8; Zab 16:2]

Hakika yeye aliye na hekima hujifaa mwenyewe.

³Je! Mwenyezi hupata furaha katika wewe kuwa mwenye haki?

Au je, ni faida kwake, kwamba wafanya njia zako kuwa timilifu?

⁴Je! Ni kwa wewe kumcha yeye anakukemea?

Na kuingia hukumuni nawe?

⁵Je! Uovu wako si mkuu?

Wala maovu yako hayana mwisho.

⁶Kwa kuwa umetwaa dhamana kwa nduguyo bure,

Na kuwavua nguo zao walio uchi.

⁷Hukumpa maji ya kunywa huyo aliyechoka,[#Ayu 31:16,17]

Nawe umemnyima chakula huyo mwenye njaa.

⁸Lakini huyo shujaa, nchi ilikuwa yake;

Na huyo mwenye kusifiwa, yeye aliikaa.

⁹Umewafukuza wanawake wajane hali ya utupu,

Na mikono ya mayatima imevunjwa.

¹⁰Kwa hiyo umezungukwa na mitego,

Na hofu ya ghafula yakutaabisha,

¹¹Au je! Huoni giza,

Na maji mengi yanayokufunika?

¹²Je! Mungu hayuko mbinguni juu?[#Isa 66:1]

Tena tazama umbali wa nyota, jinsi zilivyo juu!

¹³Nawe wasema, Mungu anajua nini?

Je! Aweza kuamua kati ya giza kuu?

¹⁴Mawingu mazito ni kifuniko chake, hata asione;[#Zab 139:12]

Naye yuatembea juu ya kuba ya mbingu.

¹⁵Je! Utaiandama njia ya zamani[#Mwa 6:11-13]

Waliyoikanyaga watu waovu?

¹⁶Ambao walinyakuliwa kabla ya wakati wao,

Msingi wao ulimwagika kama kijito cha maji;

¹⁷Waliomwambia Mungu, Tuondokee;

Tena, Huyo Mwenyezi aweza kutufanyia nini?

¹⁸Naye ndiye aliyezijaza nyumba zao vitu vyema;[#Zab 17:13,14]

Lakini mashauri ya waovu na yawe mbali nami.

¹⁹Wenye haki huyaona hayo wakafurahi;[#Zab 107:42]

Nao wasio na hatia huwacheka;

²⁰Wasema, Hakika hao waliotuinukia wamekatiliwa mbali,

Na mabaki yao moto umeyateketeza.

²¹Mjue sana Mungu, ili uwe na amani;[#Isa 27:5]

Ndivyo mema yatakavyokujia.

²²Uyapokee, tafadhali, mafunzo yatokayo kinywani mwake,[#Zab 119:11; Yer 15:16]

Na maneno yake yaweke moyoni mwako.

²³Ukimrudia Mwenyezi, utajengwa;

Ukiuondoa udhalimu mbali na hema yako.

²⁴Nawe hazina zako ziweke mchangani,

Na dhahabu ya Ofiri iweke kati ya mawe ya vijito;

²⁵Naye Mwenyezi atakuwa hazina yako,

Atakuwa ni fedha ya thamani kwako.

²⁶Kwani ndipo utakapojifurahisha katika Mwenyezi,

Na kuinua uso wako kumwelekea Mungu.

²⁷Utamwomba yeye naye atakusikia;

Nawe utazitimiliza nadhiri zako.

²⁸Nawe utakusudia neno, nalo litathibitika kwako;[#Mit 16:3]

Na mwanga utaziangazia njia zako.

²⁹Hapo watakapokuangusha, utasema, Kuna kuinuka tena;

Naye mnyenyekevu Mungu atamwokoa.

³⁰Atamwokoa na huyo asiye na hatia;

Naam, utaokolewa kwa sababu ya usafi wa mikono yako.