Ayubu Ailaani Siku Aliyozaliwa

¹Baada ya hayo Ayubu akafunua kinywa chake, na kuilaani siku yake.[#Yer 20:14-18]

²Ayubu akajibu, na kusema;

³Na ipotelee mbali ile siku niliyozaliwa mimi,[#Ayu 10:18,19; Yer 15:10]

Na ule usiku uliosema,

Mtoto mume ametungishwa mimba.

⁴Siku hiyo na iwe giza;

Mungu asiiangalie toka juu,

Wala mwanga usiiangazie.

⁵Ishikwe na giza, giza tupu, kuwa yake;[#Ayu 16:16; Zab 23:4; Isa 9:2; Yer 13:16; Mt 4:16; Lk 1:79]

Wingu na likae juu yake;

Chote kiifanyacho siku kuwa giza na kiitishe.

⁶Tena usiku huo, na ushikwe na giza kuu;

Usihesabiwe katika siku za mwaka;

Wala kutiwa katika hesabu ya miezi.

⁷Tazama, usiku huo na uwe tasa;

Wala isiwe ndani yake sauti ya shangwe.

⁸Na waulaani hao waulaanio mchana,[#Yer 9:17]

Hao walio tayari kumwamsha huyo lewiathani.

⁹Nyota za mapambazuko yake na ziwe giza;

Na utafute mwanga lakini usiupate;

Wala usiyaone makope ya asubuhi;

¹⁰Kwa sababu haukuifunga milango ya tumbo la mamangu.

Wala kunifichia taabu machoni.

¹¹Mbona si kufa mimi tokea mimbani?

Mbona nisitoe roho hapo nilipotoka tumboni?

¹²Mbona hayo magoti kunipokea?

Au hayo maziwa, hata nikanyonya?

¹³Maana hapo ningelala na kutulia;

Ningelala usingizi; na kupata kupumzika;

¹⁴Pamoja na wafalme na washauri wa dunia,

Hao waliojijengea maganjoni;

¹⁵Au pamoja na wakuu wenye dhahabu,

Waliozijaza fedha nyumba zao;

¹⁶Au, kama kuzikwa mimba iliyoharibika, nisingekuwako;

Kama wachanga wasiouona mwanga kabisa.

¹⁷Huko waovu huacha kusumbua;

Huko nako hao waliochoka wapumzika

¹⁸Huko wafungwa waona raha pamoja;

Hawaisikii sauti yake msimamizi.

¹⁹Wakuu na wadogo wako huko;

Mtumishi yu huru kwa bwana wake.

²⁰Mbona yeye aliye mashakani kupewa mwanga,[#Yer 20:18]

Na hao wenye uchungu rohoni kupewa uhai;

²¹Ambao wangojea mauti, lakini hawayapati;[#Ufu 9:6; Mit 2:4]

Na kuyachimbulia zaidi ya kutafuta hazina iliyostirika;

²²Ambao wafurahi mno,

Na kushangilia watakapoliona kaburi?

²³Kwa nini mtu aliyezibiwa njia kupewa mwanga,[#Omb 3:7]

Ambaye Mungu amemzingira kwa ukingo?

²⁴Kwani kuugua kwangu kwaja kana kwamba ni chakula,

Na kunguruma kwangu kumemiminika kama maji.

²⁵Maana jambo hilo nichalo hunipata,

Nalo linitialo hofu hunijilia.

²⁶Mimi sioni raha, wala situlii, wala kupumzika;

Lakini huja taabu.