Elihu Amkemea Ayubu

¹Walakini, Ayubu, nakuomba usikilize matamko yangu,[#Ayu 13:6]

Ukayasikilize maneno yangu yote.

²Tazama basi, nimefunua kinywa changu,

Ulimi wangu umenena kinywani mwangu.

³Maneno yangu yatatamka uelekevu wa moyo wangu;[#1 The 1:3]

Na hayo niyajuayo midomo yangu itayanena kwa unyofu.

⁴Roho ya Mungu imeniumba,[#Mwa 2:7]

Na pumzi za Mwenyezi hunipa uhai.

⁵Kwamba waweza, nijibu;

Yapange maneno yako sawasawa mbele yangu, usimame.

⁶Tazama, mimi ni mbele ya Mungu kama ulivyo wewe;[#Ayu 9:32]

Mimi nami nilifinyangwa katika udongo.

⁷Tazama, utisho wangu hautakutia hofu wewe,[#Ayu 13:21]

Wala sitakulemea kwa uzito.

⁸Hakika umenena masikioni mwangu,

Nami nimesikia sauti ya maneno yako, ukisema,

⁹Mimi ni safi, sina makosa;[#Ayu 10:7]

Sina hatia, wala hapana uovu ndani yangu;

¹⁰Tazama, yuaona sababu za kufarakana nami,[#Ayu 13:24]

Hunihesabu kuwa ni adui yake;

¹¹Hunitia miguu yangu katika mkatale,[#Ayu 13:27]

Na mapito yangu yote huyapeleleza.

¹²Tazama, nitakujibu, katika neno hili huna haki;[#Mhu 7:20]

Kwa maana Mungu ni mkuu kuliko mwanadamu.

¹³Nawe kwani kumnung’unikia,[#Isa 45:9]

Kwa vile asivyotoa hesabu ya mambo yake yote?

¹⁴Kwa kuwa Mungu hunena mara moja,

Naam, hata mara ya pili, ajapokuwa mtu hajali.

¹⁵Katika ndoto, katika maono ya usiku,[#Ayu 4:13]

Usingizi mzito uwajiliapo watu,

Katika usingizi kitandani;

¹⁶Ndipo huyafunua masikio ya watu,

Na kuyatia muhuri mafundisho yao,

¹⁷Ili amwondoe mtu katika makusudio yake,

Na kumfichia mtu kiburi;

¹⁸Yeye huizuia nafsi yake isiende shimoni,

Na uhai wake usiangamie kwa upanga.

¹⁹Yeye hutiwa adabu kwa maumivu kitandani mwake,[#Kum 8:5; Zab 94:12,13]

Na kwa mashindano yaendeleayo daima mifupani mwake;

²⁰Hata roho yake huchukia chakula,

Na nafsi yake huchukia nyama nzuri.

²¹Nyama ya mwili wake huliwa, isionekane;[#Zab 102:5]

Na mifupa yake isiyoonekana yatokea nje.

²²Naam, nafsi yake inakaribia shimoni,

Na uhai wake unakaribia waangamizi.

²³Kwamba akiwapo malaika pamoja naye,[#2 Nya 36:15,16; Mal 2:7]

Mkalimani, mmoja katika elfu,

Ili kumwonyesha binadamu hayo yampasayo;

²⁴Ndipo amwoneapo rehema, na kusema,[#Rum 3:24]

Mwokoe asishuke shimoni;

Mimi nimeuona ukombozi.

²⁵Nyama ya mwili wake itakuwa laini kuliko ya mtoto;

Huzirudia siku za ujana wake;

²⁶Yeye humwomba Mungu, naye akamtakabalia;[#2 Fal 20:2-5; Zab 6:1-9]

Hata auone uso wake kwa furaha;

Naye humrejezea mtu haki yake.

²⁷Yeye huimba mbele ya watu, na kusema,

Mimi nimefanya dhambi, na kuyapotosha hayo yaliyoelekea,

Wala sikulipizwa jambo hilo;

²⁸Yeye ameikomboa nafsi yangu isiende shimoni,

Na uhai wangu utautazama mwanga.

²⁹Tazama, hayo yote ni Mungu anayeyafanya,

Mara mbili, naam, hata mara tatu, kwa mtu,

³⁰Ili kurudisha roho yake itoke shimoni,[#Zab 40:2; Zek 9:11]

Ili atiwe mwanga kwa mwanga wa walio hai.

³¹Angalia sana, Ee Ayubu, unisikilize;

Nyamaza, mimi nitasema.

³²Kama una neno la kusema, nijibu;[#2 Kor 1:24]

Nena, kwani nataka kukuhesabia kuwa na haki.

³³Kama sivyo, unisikilize mimi;[#Zab 34:11]

Nyamaza, nami nitakufunza hekima.