Elifazi Anena: Ayubu Ametenda Dhambi

¹Ndipo huyo Elifazi, Mtemani, akajibu na kusema,

²Mtu akijaribu kuzungumza nawe, je! Utaona ni vibaya?

Lakini ni nani awezaye kujizuia asinene?

³Tazama, wewe umewafunza watu wengi,

Nawe umeitia nguvu mikono iliyokuwa minyonge.

⁴Maneno yako yamemtegemeza huyo aliyekuwa anaanguka,

Nawe umeyaimarisha magoti manyonge.

⁵Lakini sasa haya yamekufikilia wewe, nawe wafa moyo;[#Mit 24:10; Lk 4:23]

Yamekugusa, nawe wafadhaika.

⁶Je! Dini yako siyo mataraja yako,[#Ayu 1:1; Mit 3:26]

Na matumaini yako si huo uelekevu wa njia zako?

⁷Kumbuka, tafadhali, ni nani aliyeangamia akiwa hana hatia?

Au hao waelekevu, walikatiliwa mbali wapi?

⁸Kama mimi nilivyoona, hao walimao maovu,[#Zab 7:14]

Na kupanda madhara, huvuna yayo hayo.

⁹Kwa pumzi za Mungu huangamia.

Na kwa kuvuma kwa hasira zake humalizika.

¹⁰Kunguruma kwake simba, na sauti ya simba mkali,[#Ayu 29:17; Zab 3:7]

Na meno ya simba wachanga, yamevunjika.

¹¹Simba mzee huangamia kwa kukosa mawindo,[#Zab 34:10]

Nao watoto wa simba mke wametawanyika mbalimbali.

¹²Basi, nililetewa neno kwa siri,

Sikio langu likasikia manong’ono yake.

¹³Katika mawazo yaliyotoka katika maono ya usiku,[#Ayu 33:15]

Hapo usingizi mzito uwaangukiapo wanadamu.

¹⁴Hofu iliniangukia na kutetema,

Iliyoitetemesha mifupa yangu yote.

¹⁵Ndipo pepo ilipita mbele ya uso wangu;[#Zab 104:4; Mt 14:26; Ebr 1:14]

Na nywele za mwili wangu zilisimama.

¹⁶Hiyo pepo ilisimama kimya, nisiweze kutambua sura zake,

Mfano ulikuwa mbele ya macho yangu;

Kulikuwa kimya, nami nilisikia sauti, ikinena,

¹⁷Je! Binadamu atakuwa na haki kuliko Mungu?

Je! Mtu atakuwa safi kuliko Muumba wake?

¹⁸Tazama, yeye hawategemei watumishi wake;[#2 Pet 2:4]

Na malaika zake huwahesabia upuzi;

¹⁹Je! Si zaidi sana hao wakaao katika nyumba za udongo,

Ambazo misingi yao i katika mchanga,

Hao waliosetwa mbele ya nondo!

²⁰Kati ya asubuhi na jioni huvunjwa-vunjwa;

Waangamia milele wala hapana atiaye moyoni.

²¹Je! Kamba ya hema yao haikung’olewa ndani yao?

Wafa, kisha hali hawana akili.