Maonyo ya Mungu Yatimizwa

¹Jinsi Bwana alivyomfunika binti Sayuni[#Mt 11:23; 2 Sam 1:19; 1 Nya 28:2]

Kwa wingu katika hasira yake!

Ameutupa toka mbinguni hata nchi

Huo uzuri wa Israeli;

Wala hakukikumbuka kiti cha miguu yake

Katika siku ya hasira yake.

²Bwana ameyameza makao yote ya Yakobo,[#Zab 89:39]

Wala hakuona huruma;

Ameziangusha ngome za binti Yuda

Katika ghadhabu yake;

Amezibomoa hata nchi

Ameunajisi ufalme na wakuu wake.

³Ameikata pembe yote ya Israeli[#Ayu 16:15; Zab 74:11]

Katika hasira yake kali;

Ameurudisha nyuma mkono wake wa kuume

Mbele ya hao adui,

Naye amemteketeza Yakobo kama moto uwakao,

Ulao pande zote.

⁴Ameupinda upinde wake kama adui,[#Isa 63:10]

Amesimama na mkono wake wa kuume kama mtesi;

Naye amewaua hao wote

Waliopendeza macho;

Katika hema ya binti Sayuni

Amemimina kani yake kama moto.

⁵Bwana amekuwa mfano wa adui,[#Yer 52:13]

Amemmeza Israeli;

Ameyameza majumba yake yote,

Ameziharibu ngome zake;

Tena amemzidishia binti Yuda

Matanga na maombolezo.

⁶Naye ameondoa maskani yake kwa nguvu,[#Zab 80:12; Sef 3:18; Isa 5:5; 1:8]

Kana kwamba ni ya bustani tu;

Ameziharibu sikukuu zake;

BWANA amezisahauzisha katika Sayuni

Sikukuu za makini na sabato;

Naye amewadharau mfalme na kuhani

Katika uchungu wa hasira yake.

⁷Bwana ameitupilia mbali madhabahu yake,[#Zab 78:59-61; Eze 7:20; Isa 64:10,11; Mik 3:12; Yer 7:12-14; Mt 24:2; Zab 74:4]

Amepachukia patakatifu pake;

Amezitia katika mikono ya hao adui

Kuta za majumba yake;

Wamepiga kelele ndani ya nyumba ya BWANA

Kama katika siku ya kusanyiko la makini.

⁸BWANA amekusudia kuuharibu[#Isa 34:11; Amo 7:7]

Ukuta wa binti Sayuni;

Ameinyosha hiyo kamba,

Hakuuzuia mkono wake usiangamize;

Bali amefanya boma na ukuta kuomboleza;

Zote pamoja hudhoofika.

⁹Malango yake yamezama katika nchi;[#Kum 28:36; 2 Fal 25:7; 2 Nya 15:3; Zab 74:9; Amo 8:11,12; Mik 3:6,7]

Ameyaharibu makomeo yake na kuyavunja;

Mfalme wake na wakuu wake wanakaa

Kati ya mataifa wasio na sheria;

Naam, manabii wake hawapati maono

Yatokayo kwa BWANA.

¹⁰Wazee wa binti Sayuni huketi chini,[#Ayu 2:13; Omb 4:5; Isa 47:1-5]

Hunyamaza kimya;

Wametupa mavumbi juu ya vichwa vyao,

Wamejivika viunoni nguo za magunia;

Wanawali wa Yerusalemu huinama vichwa vyao

Kuielekea nchi.

¹¹Macho yangu yamechoka kwa machozi,[#Zab 6:7; Ayu 16:13]

Mtima wangu umetaabika;

Ini langu linamiminwa juu ya nchi

Kwa uharibifu wa binti ya watu wangu;

Kwa sababu watoto wachanga na wanyonyao,

Huzimia katika mitaa ya mji.

¹²Wao huwauliza mama zao,

Zi wapi nafaka na divai?

Hapo wazimiapo kama waliojeruhiwa

Katika mitaa ya mji,

Hapo walipomiminika nafsi zao

Vifuani mwa mama zao.

¹³Nikushuhudie nini? Nikufananishe na nini,[#Ayu 5:1; Dan 9:12]

Ee Binti Yerusalemu?

Nikusawazishe na nini, nipate kukufariji,

Ee bikira binti Sayuni?

Kwa maana uvunjifu wako ni mkuu kama bahari,

Ni nani awezaye kukuponya?

¹⁴Manabii wako wameona maono kwa ajili yako[#Isa 58:1]

Ya ubatili na upumbavu

Wala hawakufunua uovu wako,

Wapate kurudisha kufungwa kwako;

Bali wameona mabashiri ya ubatili kwa ajili yako

Na sababu za kuhamishwa.

¹⁵Hao watu wote wapitao[#1 Fal 9:8; Zab 48:2]

Hukupigia makofi;

Humzomea binti Yerusalemu,

Na kutikisa vichwa vyao;

Je! Mji huu ndio ulioitwa, Ukamilifu wa uzuri,

Furaha ya dunia yote?

¹⁶Juu yako adui zako wote[#Zab 56:2; 35:21]

Wamepanua vinywa vyao;

Huzomea, husaga meno yao,

Husema, Tumemmeza;

Hakika siku hii ndiyo tuliyoitazamia;

Tumeipata, tumeiona.

¹⁷BWANA ameyatenda aliyoyakusudia; amelitimiza neno lake,[#Law 26:16; Zab 38:16; Kum 28:15,43,44; Omb 1:5]

Aliloliamuru siku za kale;

Ameangusha hata chini,

Wala hakuona huruma;

Naye amemfurahisha adui juu yako,

Ameitukuza pembe ya watesi wako.

¹⁸Mioyo yao ilimlilia Bwana;[#Yer 14:17; Omb 1:16]

Ee ukuta wa binti Sayuni!

Machozi na yachuruzike kama mto

Mchana na usiku;

Usijipatie kupumzika;

Mboni ya jicho lako isikome.

¹⁹Inuka, ulalamike usiku,[#Mk 13:35; Zab 62:8; Isa 51:20; Omb 4:1; Nah 3:10]

Mwanzo wa makesha yake;

Mimina moyo wako kama maji usoni pa Bwana;

Umwinulie mikono yako;

Kwa uhai wa watoto wako wachanga wazimiao kwa njaa,

Mwanzo wa kila njia kuu.

²⁰Tazama, BWANA, uangalie,[#Kut 32:11; Law 26:29; Kum 28:53; Yer 19:9; Omb 4:10,13]

Ni nani uliyemtenda hayo!

Je! Wanawake wale mazao yao,

Watoto waliowabeba?

Je! Kuhani na nabii wauawe

Katika patakatifu pa Bwana?

²¹Kijana na mzee hulala chini[#2 Nya 36:17]

Katika njia kuu;

Wasichana wangu na wavulana wangu

Wameanguka kwa upanga;

Umewaua katika siku ya hasira yako;

Umeua, wala hukuona huruma.

²²Umeziita kama katika siku ya mkutano wa makini;[#Zab 31:13; Yer 46:5; Hos 9:12]

Hofu zangu zije pande zote;

Wala hapana hata mmoja aliyepona wala kusalia

Katika siku ya hasira ya BWANA;

Hao niliowabeba na kuwalea

Huyo adui yangu amewakomesha.