The chat will start when you send the first message.
1BWANA akanena na Musa, na kumwambia,
2Nena wewe na wana wa Israeli, uwaambie, Mimi ndimi BWANA, Mungu wenu.[#Kut 6:7; Eze 20:5]
3Nanyi msifanye matendo kama yale ya nchi ya Misri mliyokaa; wala msifanye matendo kama yale ya nchi ya Kanaani, nitakayowapeleka; wala msiende katika amri zao hao.[#Eze 23:8; Kut 23:33]
4Mtazifanya hukumu zangu, nanyi mtazishika amri zangu, ili mwenende katika hizo; mimi ndimi BWANA, Mungu wenu.
5Kwa ajili ya hayo mtazishika amri zangu na hukumu zangu; ambazo mtu akizitumia ataishi kwa hizo; mimi ndimi BWANA.[#Neh 9:29; Eze 18:9; 20:11-13; Lk 10:28; Rum 10:5; Gal 3:12; Isa 44:6; Yer 9:24; Mal 3:6]
6Mtu ye yote aliye wa kwenu asimkaribie mwenziwe aliye wa jamaa yake ya karibu ili kumfunua utupu; mimi ndimi BWANA.
7Utupu wa baba yako, wala utupu wa mama yako, usifunue, maana ndiye mama yako; usifunue utupu wake.
8Utupu wa mke wa baba yako, usifunue; maana, ni utupu wa baba yako.[#Law 20:11; Kum 22:30; 27:20; Mwa 49:4; 1 Kor 5:1]
9Utupu wa umbu lako, binti ya baba yako, au binti ya mama yako, kwamba alizaliwa nyumbani mwenu au kwamba alizaliwa kwengine, utupu wa hao usifunue.[#Law 20:17; Kum 27:22; 2 Sam 13:12]
10Utupu wa binti ya mwanao mume, au wa binti ya binti yako, utupu wao hao usifunue; kwa kuwa ndio utupu wako mwenyewe.
11Utupu wa binti ya mkewe baba yako, aliyezaliwa na baba yako, yeye ni umbu lako, usifunue utupu wake.
12Usifunue utupu wa umbu lake baba yako; maana, yeye ni jamaa aliye karibu.[#Law 20:19-20]
13Usifunue utupu wa umbu la mama yako; maana, yeye ni jamaa ya mama yako ya karibu.
14Usifunue utupu wa ndugu ya baba yako, usimkaribie mkewe huyo; yeye ni shangazi lako.
15Usifunue utupu wa mkweo mwanamke; yeye ni mke wa mwanao; usifunue utupu wake huyo.[#Law 20:12; Mwa 38:18; Eze 22:11]
16Usifunue utupu wa mke wa nduguyo; maana, ni utupu wa nduguyo.[#Law 20:21; Mt 14:3,4; 22:24]
17Usifunue utupu wa mwanamke na binti yake; usimtwae binti ya mwanawe mume, au binti ya binti yake, ili kufunua utupu wake; hao ni jamaa ya karibu; ni uovu mkuu.[#Law 20:14; Kum 27:23]
18Wala usitwae mwanamke pamoja na nduguye, awe mtesi wake, na kufunua utupu wake, huyo wa pili atakapokuwa yu hai.[#Mwa 30:15; Mal 2:15]
19Nawe usimkaribie mwanamke kufunua utupu wake wakati wa kutengwa kwa ajili ya unajisi wake.[#Law 20:18; Eze 18:6]
20Usilale na mke wa mwenzio, ukajitia unajisi naye.[#Law 20:10; Mit 6:29; Mal 3:5; Mt 5:27,28; 1 Kor 6:9; Ebr 13:4]
21Nawe usitoe kizazi chako cho chote na kuwapisha kwa Moleki, wala usilinajisi jina la Mungu wako; mimi ndimi BWANA.[#Law 20:1-5; 2 Fal 16:3; Yer 19:5; 1 Fal 11:7,33; Eze 36:20; Mal 1:12; Isa 42:8]
22Usilale na mwanamume mfano wa kulala na mwanamke; ni machukizo.[#Law 20:13; Rum 1:27; 1 Tim 1:10]
23Wala usilale na mnyama ye yote, ili kujitia unajisi kwake; wala mwanamke asisimame mbele ya mnyama ili kulala naye; ni uchafuko.[#Kut 22:18; Law 20:15-16; Kum 27:21]
24Msijitie unajisi katika mambo hayo hata mojawapo; kwa maana hizo taifa nitakazozitoa mbele zenu zimekuwa najisi kwa mambo hayo yote;[#Mt 15:18; 1 Kor 3:17; Kum 18:12]
25na hiyo nchi imekuwa najisi; kwa ajili ya hayo naipatiliza uovu wake juu yake, na hiyo nchi yatapika wenyeji wake na kuwatoa.[#Hes 35:34; Isa 24:5; 26:21; Yer 9:9; 16:18]
26Kwa hiyo mtazishika amri zangu na hukumu zangu, wala msifanye machukizo hayo mojawapo; yeye aliye mzalia, wala mgeni aketiye kati yenu;
27(kwa kuwa hao watu wa nchi wameyafanya machukizo haya yote, hao waliotangulia mbele zenu, na hiyo nchi imekuwa najisi;)
28ili kwamba hiyo nchi isiwatapike na ninyi pia, hapo mtakapoitia unajisi, kama ilivyoitapika hiyo taifa iliyotangulia mbele yenu.
29Kwani mtu awaye yote atakayefanya machukizo hayo mojawapo, nafsi hizo zitakazoyafanya zitakatiliwa mbali na watu wao.
30Kwa ajili ya hayo yashikeni mausia yangu, ili kwamba msifanye kabisa desturi hizi zichukizazo mojawapo, zilizotangulia kufanywa mbele zenu, wala msijitie unajisi katika mambo hayo; mimi ndimi BWANA, Mungu wenu.