Taa Isiyozimika

¹Kisha BWANA akanena na Musa, na kumwambia,

²Waagize wana wa Israeli kwamba wakuletee mafuta ya zeituni safi ya kupondwa kwa ajili ya ile nuru, ili hiyo taa iwake daima.[#Kut 27:20; 39:37; Hes 8:2-4]

³Hapo nje ya pazia la ushahidi, ndani ya hema ya kukutania, Haruni ataitengeza tangu jioni hata asubuhi mbele za BWANA daima; ni amri ya milele katika vizazi vyenu.

⁴Atazitengeza hizo taa katika kile kinara kilicho safi mbele za BWANA daima.[#Kut 31:8; 37:17-24]

Mikate ya Hema Takatifu

⁵Nawe utatwaa unga mwembamba, na kuoka mikate kumi na miwili ya huo unga; sehemu za kumi mbili za efa, zitakuwa katika mkate mmoja.[#Kut 25:30; 40:24]

⁶Nawe iweke mistari miwili, mikate sita kwa kila mstari, juu ya hiyo meza safi, mbele za BWANA.[#1 Fal 7:48; 2 Nya 4:19; Ebr 9:2]

⁷Nawe utatia ubani safi juu ya kila mstari, ili uwe ukumbusho kwa hiyo mikate, sadaka ya kusongezwa kwa BWANA kwa moto.

⁸Kila siku ya Sabato ataipanga mbele za BWANA daima; ni kwa ajili ya wana wa Israeli, agano la milele.[#Hes 4:7; 1 Nya 9:32; 2 Nya 2:4]

⁹Nayo itakuwa ya Haruni na wanawe; nao wataila katika mahali patakatifu; kwa sababu kwake ni takatifu sana katika sadaka zisongezwazo kwa BWANA kwa moto, kwa amri ya milele.[#Mt 12:4; Mk 2:26; Lk 6:4; 1 Sam 21:6; Kut 29:33; Law 8:3; 21:22]

Kufuru na Adhabu yake

¹⁰Ikawa mwana wa mwanamke wa Kiisraeli, ambaye babaye alikuwa Mmisri, akatokea kati ya wana wa Israeli; na huyo mwana wa mwanamke wa Kiisraeli, na Mwisraeli mmoja, wakapigana pamoja ndani ya marago;

¹¹kisha huyo mwana wa mwanamke wa Kiisraeli akalikufuru hilo Jina, na kuapiza; nao wakamleta kwa Musa. Na jina la mamaye alikuwa akiitwa Shelomithi, binti ya Dibri, wa kabila ya Dani.[#Ayu 1:5; 2:5,9; Isa 8:21; Kut 18:22]

¹²Nao wakamtia kifungoni, ili wapate kuambiwa neno litakalotoka kinywani pa BWANA.[#Hes 15:34; Kut 18:15,16]

¹³Na BWANA akasema na Musa, na kumwambia,

¹⁴Mtoe huyo aliyeapiza nje ya marago; na wale wote waliomsikia na waweke mikono yao kichwani mwake, kisha mkutano wote na wamwue kwa kumpiga kwa mawe.[#Kum 17:7]

¹⁵Nawe nena na wana wa Israeli na kuwaambia, Mtu awaye yote atakayemlaani Mungu wake atachukua dhambi yake.[#Law 5:1; 9:13]

¹⁶Na yeye atakayelikufuru jina la BWANA hakika atauawa; mkutano wote watamwua kwa kumpiga kwa mawe; kama ni mgeni, kama ni mzalia, hapo atakapolikufuru jina la BWANA atauawa.[#1 Fal 21:10; Zab 74:10,18; Mt 12:31; Mk 3:28; Yak 2:7]

¹⁷Na mtu ampigaye mtu hata akafa, lazima atauawa;[#Kut 21:12; Mwa 9:6; Hes 35:31; Kum 19:11; Mt 26:52; Ufu 13:10]

¹⁸na atakayempiga mnyama hata akafa atalipa; uhai kwa uhai.

¹⁹Na mtu akimtia mwenziwe kilema; vile vile kama alivyofanya, naye atafanyiwa vivyo;[#Kut 21:24; Kum 19:21; Mt 5:38; 7:2]

²⁰jeraha kwa jeraha, jicho kwa jicho, jino kwa jino; vile vile kama alivyomtia mtu kilema, naye atalipwa vivyo.[#Kut 21:23-25; Kum 19:21; Mt 5:38]

²¹Na mtu amwuaye mnyama atalipa; na yeye atakayemwua binadamu atauawa.[#Kut 21:33]

²²Mtakuwa na sheria moja tu, kwa huyo aliye mgeni, na kwa mzalia; kwa kuwa mimi ndimi BWANA, Mungu wenu.[#Hes 15:16; Kut 12:49; Law 19:34; Kum 10:17,19]

²³Musa akanena na wana wa Israeli, nao wakamtoa huyo aliyeapiza nje ya marago, wakamwua kwa kumpiga kwa mawe. Wana wa Israeli wakafanya kama BWANA alivyomwagiza Musa.[#Kum 13:9; 17:7]