Thawabu ya Utiifu

¹Msifanye sanamu yo yote, wala msijisimamishie sanamu ya kuchonga, wala mnara, wala msiweke jiwe lo lote lililochorwa katika nchi yenu ili kulisujudia; kwa kuwa mimi ndimi BWANA, Mungu wenu.[#Kut 20:4,5; Law 19:4; Kum 4:16-19; 5:8; 16:21-22; 27:1; Isa 44:9-20; Zab 97:7]

²Zishikeni Sabato zangu, na kupastahi patakatifu pangu; mimi ndimi BWANA.

³Kama mkienda katika amri zangu, na kuyashika maagizo yangu, na kuyafanya;[#Kum 11:13-15; 28:1-14]

⁴ndipo nitazinyesha mvua zenu kwa nyakati zake, na nchi itazaa maongeo yake, na miti ya mashambani itazaa matunda yake.[#Kum 28:12; Isa 30:23]

⁵Tena kupura nafaka kwenu kutaendelea hata wakati wa kuvuna zabibu, na kuvuna zabibu kutaendelea hata wakati wa kupanda mbegu; nanyi mtakula chakula chenu na kushiba, na kuketi katika nchi yenu salama.[#Kum 11:15; Yoe 2:19,26; Ayu 11:18; Eze 34:25]

⁶Nami nitawapa amani katika nchi, tena mtalala wala hapana atakayewatia hofu; nami nitawakomesha wanyama wabaya katika nchi yenu, wala hautapita upanga katika nchi yenu.[#1 Nya 22:9; Isa 45:7; Zab 3:5; Yer 30:10; Yn 14:27; Rum 5:1; 2 Fal 17:25; Eze 5:17; 14:15,17; Yos 23:10]

⁷Nanyi mtawafukuza adui zenu, nao wataanguka mbele zenu kwa upanga.

⁸Na watu watano wa kwenu watawafukuza watu mia, na watu mia wa kwenu watawafukuza watu elfu kumi; na adui zenu wataanguka mbele yenu kwa upanga.

⁹Nami nitawaelekezea uso wangu, na kuwapa uzazi mwingi, na kuwaongeza; nami nitalithibitisha agano langu pamoja nanyi.[#Kut 2:25; 2 Fal 13:23; Mwa 17:6,7]

¹⁰Nanyi mtakula akiba ya zamani mliyoiweka siku nyingi, tena hayo ya zamani mtayatoa, ili myaweke yaliyo mapya.

¹¹Nami nitaiweka maskani yangu kati yenu; wala roho yangu haitawachukia.[#Eze 37:26; Kum 32:19]

¹²Nami nitakwenda kati yenu, nami nitakuwa Mungu wenu, nanyi mtakuwa watu wangu.[#2 Kor 6:16; Efe 2:21; Ebr 3:6; Eze 11:20]

¹³Mimi ndimi BWANA, Mungu wenu, niliyewaleta mtoke katika nchi ya Misri, ili msiwe watumwa wao; nami nimeivunja miti ya kongwa lenu, nikawaendesha mwende sawasawa.[#Eze 34:27]

Adhabu ya Kutotii

¹⁴Lakini msiponisikiza, wala hamtaki kuyafanya maagizo hayo yote;[#Kum 28:15]

¹⁵nanyi mkizikataa amri zangu, na roho yenu ikichukia hukumu zangu, hata ikawa hamtaki kuyafanya maagizo yangu yote, bali mwalivunja agano langu;[#2 Fal 17:15]

¹⁶mimi nami nitawatenda jambo hili; nitaamrisha uje juu yenu utisho, hata kifua kikuu na homa, zitakazoharibu macho yenu, na kuidhoofisha roho; nanyi mtapanda mbegu yenu bure, kwa kuwa adui zenu wataila.[#Kum 28:22; 1 Sam 2:33; Ayu 31:8]

¹⁷Nami nitauelekeza uso wangu kinyume chenu, nanyi mtapigwa mbele ya adui zenu; hao wawachukiao watatawala juu yenu; nanyi mtakimbia wakati ambao hapana awafukuzaye.[#Amu 2:14; Zab 106:41; 53:5]

¹⁸Tena ikiwa baada ya hayo hamtaki kunisikiza, ndipo nitawaadhibu zaidi mara saba kwa ajili ya dhambi zenu.[#1 Sam 2:5]

¹⁹Nami nitakivunja kiburi cha uwezo wenu; nami nitazifanya mbingu zenu kuwa kama chuma, na nchi yenu kuwa kama shaba;[#1 Sam 4:10; Isa 25:11]

²⁰na nguvu zenu mtazitumia bure; kwa kuwa nchi yenu haitazaa mazao yake, wala miti ya nchi haitazaa matunda yake.[#Zab 127:1; Isa 49:4; Kum 28:18; Hag 1:10]

²¹Nanyi ikiwa mwaenenda kinyume changu, wala hamtaki kunisikiza; nitaleta mapigo mara saba zaidi juu yenu, kama dhambi zenu zilivyo.

²²Nami nitaleta wanyama wakali kati yenu, ambao watawanyang’anya watoto wenu, na kuwaharibu wanyama wenu wa kufugwa, na kuwapunguza muwe wachache hesabu yenu; na njia zenu zitakuwa ni ukiwa.[#Kum 32:24; 2 Fal 17:25; Yer 15:3; Amu 5:6; 2 Nya 15:5; Zek 7:14]

²³Tena kama hamtaki kurejezwa upya kwangu mimi kwa mambo haya, bali mwaendelea kunishikia kinyume; ndipo mimi nami nitaendelea kuwashikia ninyi kinyume;[#Yer 5:3]

²⁴nami nitawapiga, naam mimi, mara saba kwa ajili ya dhambi zenu.[#2 Sam 22:27]

²⁵Nami nitaleta upanga juu yenu, utakaopatiliza kisasi cha hilo agano; nanyi mtakutanishwa ndani ya miji yenu; nami nitaleta tauni kati yenu; nanyi mtatiwa mkononi mwa adui.[#Eze 6:3; Kum 28:22; Hes 14:12; 16:49; Amo 4:10]

²⁶Hapo nitakapovunja tegemeo lenu la mkate, wanawake kumi wataoka mikate yenu katika tanuu moja, nao watawapa mikate yenu tena kwa kupima kwa mizani; nanyi mtakula, lakini hamtashiba.[#Isa 3:1; Mik 6:14]

²⁷Tena ikiwa baada ya hayo yote hamtaki kunisikiza, bali mwaenenda kwa kunishikia kinyume;

²⁸ndipo nami nitakwenda kwa kuwashikia ninyi kinyume katika ghadhabu yangu; nami nitawaadhibu mara saba kwa dhambi zenu.[#Isa 59:18]

²⁹Nanyi mtakula nyama ya miili ya wana wenu, na nyama ya miili ya binti zenu mtaila.[#2 Fal 6:29]

³⁰Nami nitapaharibu mahali penu palipoinuka, na kuziangusha sanamu zenu za jua, nami nitaitupa mizoga yenu juu ya mizoga ya sanamu zenu; na roho yangu itawachukia.[#2 Nya 34:3; 2 Fal 23:20; Zab 78:59]

³¹Nami nitaifanya miji yenu iwe maganjo, na mahali penu patakatifu nitapatia ukiwa; wala sitasikia harufu ya manukato yenu yapendezayo.[#Neh 2:3; Yer 5:10; 22:5; Zab 74:1-8; Yer 26:6,9; Omb 1:10; Eze 9:6]

³²Nami nitaitia hiyo nchi ukiwa; na adui zenu watakaokaa huko wataistaajabia.[#Yer 9:11; 25:11]

³³Nanyi nitawatapanya-tapanya katika mataifa, nami nitaufuta upanga nyuma yenu; na nchi yenu itakuwa ni ukiwa, na miji yenu maganjo.[#Kum 4:27; 28:64; Zab 44:11; Eze 12:15; 20:23; Zek 7:14]

³⁴Hapo ndipo nchi itakapozifurahia Sabato zake, wakati itakapokuwa hali ya ukiwa, nanyi mtakapokuwa katika nchi ya adui zenu; ndipo nchi itakapopumzika, na kuzifurahia Sabato zake.[#Law 25:2-4; 2 Nya 36:21]

³⁵Wakati wote itakapokuwa na ukiwa, itapumzika; ni hayo mapumziko ambayo haikuwa nayo katika Sabato zenu, hapo mlipokaa katika nchi hiyo.

³⁶Tena hao wa kwenu watakaobaki, nitawatilia woga mioyoni mwao, katika hizo nchi za adui zao; na sauti ya jani lililopeperushwa itawakimbiza; nao watakimbia, kama mtu akimbiavyo upanga; nao wataanguka hapo ambapo hapana afukuzaye.[#Mwa 35:5; Yos 2:9-11; Eze 21:7; Mit 28:1]

³⁷Nao wataangukiana wenyewe kwa wenyewe, kama mbele ya upanga, hapo ambapo hapana afukuzaye; wala hamtakuwa na nguvu za kusimama mbele ya adui zenu.[#Amu 7:22; Isa 10:4; Amu 2:14]

³⁸Nanyi mtaangamia kati ya mataifa, na nchi ya adui zenu itawameza.

³⁹Na watu wa kwenu watakaobaki watafifia kwa ajili ya uovu wao, katika hizo nchi za adui zenu; tena watafifia kwa ajili ya uovu wa baba zao, pamoja nao.[#Neh 1:9; Yer 3:25; 20:12]

⁴⁰Nao wataukiri uovu wao, na uovu wa baba zao, katika maasi yao waliyoasi juu yangu, tena ya kuwa kwa sababu wameendelea kunishikia kinyume,[#Hes 5:7; 1 Fal 8:33; Ayu 34:31; Mit 28:13; Yer 3:12; Lk 15:18; 1 Yoh 1:9]

⁴¹mimi nami nimeendelea kuwashikia kinyume wao, na kuwatia katika nchi ya adui zao; lakini hapo, kama mioyo yao isiyokuwa tohara ikinyenyekea, nao wakubali adhabu ya uovu wao;[#Yer 9:25; Eze 44:7; Mdo 7:51; Rum 2:29; Kol 2:11; 1 Fal 21:29; 2 Nya 12:6]

⁴²ndipo nitakapokumbuka agano langu pamoja na Yakobo, tena agano langu na Isaka, tena agano langu na Ibrahimu nitalikumbuka; nami nitaikumbuka nchi hiyo.[#Mwa 17:7-8; 26:3-4; 28:13-14; Kut 2:24; 6:5; Zab 106:5; Eze 16:60; Zab 136:23]

⁴³Nchi nayo itaachwa na wao, nayo itazifurahia Sabato zake, itakapokuwa ukiwa pasipokuwa na wao; nao wataikubali adhabu ya uovu wao; kwa sababu, naam, ni kwa sababu wamezikataa hukumu zangu, na roho zao zimezichukia amri zangu.

⁴⁴Lakini pamoja na hayo yote, watakapokuwa katika nchi ya adui zao, mimi, sitawatupa, wala sitawachukia, niwaangamize kabisa, na kulivunja agano langu pamoja nao; kwa kuwa mimi ndimi BWANA, Mungu wao;[#Kum 4:31]

⁴⁵lakini kwa ajili yao nitalikumbuka agano la baba zao, niliowaleta watoke katika nchi ya Misri mbele ya macho ya mataifa, ili kwamba niwe Mungu wao; mimi ndimi BWANA.[#Rum 11:28; Eze 20:9]

⁴⁶Hizi ni amri na hukumu na sheria, BWANA alizozifanya kati ya yeye na hao wana wa Israeli katika huo mlima wa Sinai kwa mkono wa Musa.[#Kum 33:4; Yn 1:17]