Mahubiri ya Yohana Mbatizaji

¹Siku zile aliondokea Yohana Mbatizaji akihubiri katika nyika ya Uyahudi, na kusema,[#Mk 1:1-8; Lk 3:3-18; #Lk 1:13]

²Tubuni; kwa maana ufalme wa mbinguni umekaribia.[#Mt 4:17; Mk 1:15]

³Kwa sababu huyo ndiye aliyenenwa na nabii Isaya, akisema,[#Isa 40:3; Yn 1:23]

Sauti ya mtu aliaye nyikani,

Itengenezeni njia ya Bwana,

Yanyosheni mapito yake.

⁴Naye Yohana mwenyewe alikuwa na vazi lake la singa za ngamia, na mshipi wa ngozi kiunoni mwake; na chakula chake kilikuwa nzige na asali ya mwitu.[#2 Fal 1:8]

⁵Ndipo walipomwendea Yerusalemu, na Uyahudi wote, na nchi zote za kandokando ya Yordani;

⁶naye akawabatiza katika mto wa Yordani, huku wakiziungama dhambi zao.

⁷Hata alipoona wengi miongoni mwa Mafarisayo na Masadukayo wakiujia ubatizo wake, aliwaambia, Enyi wazao wa nyoka, ni nani aliyewaonya ninyi kuikimbia hasira itakayokuja?[#Mt 12:34; 23:33; Mwa 3:15]

⁸Basi zaeni matunda yapasayo toba;

⁹wala msiwaze mioyoni mwenu kwamba, Tunaye baba, ndiye Ibrahimu; kwa maana nawaambia ya kwamba Mungu aweza katika mawe haya kumwinulia Ibrahimu watoto.[#Yn 8:33,39; Rum 2:28,29; 4:12]

¹⁰Na shoka limekwisha kuwekwa penye mashina ya miti; basi kila mti usiozaa matunda mazuri hukatwa na kutupwa motoni.[#Mt 7:19; Lk 13:6-9; Yn 15:6]

¹¹Kweli mimi nawabatiza kwa maji kwa ajili ya toba; bali yeye ajaye nyuma yangu ana nguvu kuliko mimi, wala sistahili hata kuvichukua viatu vyake; yeye atawabatiza kwa Roho Mtakatifu na kwa moto.[#Yn 1:15,26,27,33; Mdo 1:5]

¹²Ambaye pepeto lake li mkononi mwake, naye atausafisha sana uwanda wake; na kuikusanya ngano yake ghalani, bali makapi atayateketeza kwa moto usiozimika.[#Mt 13:30]

Kubatizwa kwa Yesu

¹³Wakati huo Yesu akaja kutoka Galilaya mpaka Yordani kwa Yohana ili abatizwe.[#Mk 1:9-11; Lk 3:11-21; Yn 1:31-34]

¹⁴Lakini Yohana alitaka kumzuia, akisema, Mimi nahitaji kubatizwa na wewe, nawe waja kwangu?

¹⁵Yesu akajibu akamwambia, Kubali hivi sasa; kwa kuwa ndivyo itupasavyo kuitimiza haki yote. Basi akamkubali.

¹⁶Naye Yesu alipokwisha kubatizwa mara akapanda kutoka majini; na tazama, mbingu zikamfunukia, akamwona Roho wa Mungu akishuka kama hua, akija juu yake;

¹⁷na tazama, sauti kutoka mbinguni ikisema, Huyu ni Mwanangu, mpendwa wangu, ninayependezwa naye.[#Mwa 22:2; Zab 2:7; Isa 42:1; Mt 12:18; 17:5; Mk 1:11; Lk 9:35]