Watu Wanaasi

¹Mkutano wote wakapaza sauti zao wakalia; watu wakatoka machozi usiku ule.

²Kisha wana wa Israeli wote wakamnung’unikia Musa na Haruni; mkutano wote wakawaambia, Ingekuwa heri kama tungalikufa katika nchi ya Misri, au, ingekuwa heri kama tungalikufa katika jangwa hili.[#Zab 106:25; Kum 28:68]

³Mbona BWANA anatuleta mpaka nchi hii ili tuanguke kwa upanga? Wake zetu na watoto wetu watakuwa mateka; je! Si afadhali turudi Misri?

⁴Wakaambiana, Na tumweke mtu mmoja awe akida, tukarudi Misri.[#Neh 9:17; Mdo 7:39; Ebr 11:15]

⁵Ndipo Musa na Haruni wakaanguka kifudifudi mbele ya mkutano wa kusanyiko la wana wa Israeli.

⁶Na Yoshua mwana wa Nuni, na Kalebu mwana wa Yefune, waliokuwa miongoni mwao walioipeleleza nchi, wakararua nguo zao;

⁷wakanena na mkutano wote wa wana wa Israeli wakasema, Nchi ile tuliyopita kati yake ili kuipeleleza, ni nchi njema mno ya ajabu.

⁸Ikiwa BWANA anatufurahia, atatuingiza katika nchi hii atupe iwe yetu, nayo ni nchi yenye wingi wa maziwa na asali.[#Kum 10:15; 2 Sam 15:25; 1 Fal 10:9; Zab 22:8; Isa 62:4; Hes 13:27]

⁹Lakini msimwasi BWANA, wala msiwaogope wale wenyeji wa nchi, maana wao ni chakula kwetu; uvuli uliokuwa juu yao umeondolewa, naye BWANA yu pamoja nasi; msiwaogope.[#Ebr 3:16; Kum 9:7,23,24; Kum 20:3; Hes 24:8; Mwa 48:21; Kut 33:16; Kum 20:1; 2 Nya 15:2; Isa 41:10]

¹⁰Lakini mkutano wote wakaamuru wapigwe kwa mawe. Ndipo utukufu wa BWANA ukaonekana katika hema ya kukutania, mbele ya wana wa Israeli wote.[#Kut 17:4; 16:10; Law 9:23]

¹¹BWANA akamwuliza Musa, Je! Watu hawa watanidharau hata lini? Wasiniamini hata lini? Nijapokuwa nimefanya ishara hizo zote kati yao.[#Ebr 3:8; Zab 78:22; Yn 12:37]

¹²Nitawapiga kwa tauni, na kuwaondolea urithi wao, nami nitakufanya wewe kuwa taifa kubwa, kisha yenye nguvu kuliko wao.[#Kut 32:10]

Musa Awaombea Watu kwa Mungu

¹³Basi Musa akamwambia BWANA, Ndipo Wamisri watasikia habari hiyo; kwa kuwa wewe uliwaleta watu hawa kwa uweza wako, kutoka kati yao;[#Kut 32:11-14; Eze 20:9]

¹⁴kisha watawaambia wenyeji wa nchi hii; wamesikia wao ya kuwa wewe BWANA u kati ya watu hawa; maana, wewe BWANA waonekana uso kwa uso, na wingu lako lasimama juu yao, kisha wewe watangulia mbele yao, katika nguzo ya wingu mchana, na katika nguzo ya moto usiku.[#Kut 15:14; Neh 9:12]

¹⁵Basi kama wewe ukiwaua watu hawa mfano wa mtu mmoja, ndipo mataifa yaliyosikia habari za sifa zako watakaponena na kusema,

¹⁶Ni kwa sababu yeye BWANA hakuweza kuwaleta watu hao kuwatia katika nchi aliyowaapia, kwa ajili ya hayo amewaua nyikani.[#Yos 7:9]

¹⁷Basi sasa nakusihi sana, uweza wa Bwana wangu na uwe mkuu, kama ulivyonena, uliposema,

¹⁸BWANA ni mpole wa hasira, mwingi wa rehema, mwenye kusamehe uovu na makosa, naye hatamfanya mwenye hatia kuwa hana makosa kwa njia yo yote; mwenye kuwapatiliza wana kwa uovu wa baba zao, katika kizazi cha tatu na cha nne.[#Kut 20:5-6; 34:6-7; Kum 5:9-10; 7:9-10; Zab 103:8; 145:8; Yon 4:2; Kut 34:7]

¹⁹Nakusihi, usamehe uovu wa watu hawa, kama ukuu wa rehema yako ulivyo, kama ulivyowasamehe watu hawa, tangu huko Misri hata hivi sasa.

²⁰BWANA akasema, Mimi nimewasamehe kama neno lako lilivyokuwa;[#Yak 5:16; 1 Yoh 5:14]

²¹lakini hakika yangu, kama niishivyo, tena kama dunia hii nzima itakavyojawa na utukufu wa BWANA;[#Ebr 3:18; Zab 72:19; Isa 5:16; 11:9; 61:11; Eze 18:3; Hab 2:14; Ufu 11:15]

²²kwa sababu watu hawa wote, ambao wameuona utukufu wangu na ishara zangu, nilizozitenda huko Misri, na huko jangwani, pamoja na haya wamenijaribu mara hizi kumi, wala hawakuisikiza sauti yangu;[#Kum 1:31,34; Zab 95:11; Ebr 4:6,7; Mwa 31:7]

²³hakika yangu hawataiona hiyo nchi niliyowaapia baba zao, wala katika hao wote walionidharau hapana atakayeiona;[#Kum 1:35; Zab 106:26; Eze 20:15; Ebr 3:18; 4:3]

²⁴lakini mtumishi wangu Kalebu, kwa kuwa alikuwa na roho nyingine ndani yake, naye ameniandama kwa moyo wote, nitamleta yeye mpaka nchi hiyo aliyoingia; na uzao wake wataimiliki.[#Yos 14:9-12; Zab 25:13; Isa 33:15; Mt 5:5]

²⁵Basi Mwamaleki na Mkanaani wakaa katika bonde; kesho geukeni, mkaende jangwani kwa njia iendayo Bahari ya Shamu.

Ukaidi wa Waisraeli na Kushindwa Kwao

²⁶Kisha BWANA akanena na Musa na Haruni, na kuwaambia,

²⁷Je! Nichukuane na mkutano mwovu huu uninung’unikiao hata lini? Nimesikia manung’uniko ya wana wa Israeli, waninung’unikiayo.[#Kut 16:28; Mt 17:17; Mk 9:19; Kut 16:12; 1 Kor 10:10]

²⁸Waambieni, Kama niishivyo, asema BWANA, hakika yangu kama ninyi mlivyonena masikioni mwangu, ndivyo nitakavyowafanyia ninyi;[#Ebr 3:17]

²⁹mizoga yenu itaanguka katika jangwa hili, na wote waliohesabiwa miongoni mwenu, kama jumla ya hesabu yenu, tangu waliopata umri wa miaka ishirini na zaidi, hao walioninung’unikia,[#Hes 26:64]

³⁰hakika yangu hamtaingia ninyi katika nchi, ambayo niliinua mkono wangu ya kwamba nitawaketisha humo, isipokuwa Kalebu mwana wa Yefune, na Yoshua mwana wa Nuni.[#Kum 1:36,38]

³¹Lakini Watoto wenu, ambao mlisema watakuwa mateka, ndio nitakaowaleta na kuwatia ndani, nao wataijua nchi ninyi mliyoikataa.[#Zab 106:24; Mit 1:25,26; Ebr 12:16,17]

³²Lakini katika habari zenu, mizoga yenu itaanguka katika jangwa hili.[#1 Kor 10:5]

³³Kisha watoto wenu watakuwa wachungaji jangwani muda wa miaka arobaini nao watauchukua mzigo wa uasherati wenu, hata mizoga yenu itakapoangamia jangwani.[#Mdo 7:36; Zab 107:40; Kum 2:14]

³⁴Kwa hesabu ya hizo siku mlizoipeleleza ile nchi, yaani, siku arobaini kila siku kuhesabiwa mwaka, mtayachukua maovu yenu, ndiyo miaka arobaini, nanyi mtakujua kufarikana kwangu.[#Hes 13:25; Zab 95:10; Eze 4:6; 1 Fal 8:56; Zab 77:8; Ebr 4:1]

³⁵Mimi BWANA nimekwisha nena, hakika yangu ndilo nitakaloutenda mkutano mwovu huu wote, waliokusanyika juu yangu; wataangamia katika nyika hii, nako ndiko Watakakokufa.[#Hes 23:19]

³⁶Kisha hao watu, ambao Musa aliwatuma waipeleleze nchi, waliorudi, na kufanya mkutano wote kumnung’unikia, kwa walivyoleta habari mbaya juu ya nchi,[#Hes 13:31]

³⁷watu hao walioileta habari mbaya ya nchi wakafa kwa tauni mbele ya BWANA.[#Yer 28:16,17; 1 Kor 10:10; Ebr 3:17; Yud 1:5]

³⁸Lakini Yoshua mwana wa Nuni, na Kalebu mwana wa Yefune, wakabaki hai miongoni mwa wale watu waliokwenda kuipeleleza nchi.[#Yos 14:6]

³⁹Kisha Musa akawaambia wana wa Israeli wote maneno haya, na hao watu wakaombolea sana.[#Mit 19:3; Mt 8:12; Ebr 12:17]

⁴⁰Wakainuka na mapema asubuhi, wakakwea juu ya mlima hata kileleni, wakisema, Tazameni, sisi tupo hapa, nasi tutakwea kwenda mahali BWANA alipotuahidi; kwani tumefanya dhambi.[#Kum 1:41; Mhu 9:3; Mt 7:21; Lk 13:25]

⁴¹Musa akawaambia, Kwa nini ninyi sasa kuyahalifu maagizo ya BWANA? Maana halitafanikiwa jambo hilo.[#2 Nya 24:20; Ayu 9:4; Isa 59:1,2; Yer 2:37; 1 Kor 10:22]

⁴²Msikwee, kwa kuwa BWANA hamo kati yenu; msipigwe na kuangushwa mbele ya adui zenu.[#Kum 1:42; Zab 44:1-3]

⁴³Kwa kuwa Mwamaleki na Mkanaani wako mbele yenu, nanyi mtaanguka kwa upanga, kwa sababu mmerudi nyuma msimwandame BWANA, kwa hiyo BWANA hatakuwa pamoja nanyi.[#Kum 1:43,44; Amu 16:20]

⁴⁴Lakini walithubutu kukwea mlimani hata kileleni; ila sanduku la agano la BWANA halikutoka humo maragoni, wala Musa hakutoka.

⁴⁵Ndipo Mwamaleki, na Mkanaani waliokaa huko mlimani, wakatelemka, wakawapiga na kuwaangusha, hata kufikilia Horma.