Nyoka ya Shaba

¹Na Mkanaani, mfalme wa Aradi, aliyeketi upande wa Negebu, alisikia habari ya kuwa Israeli alikuja kwa njia ya Atharimu; basi akapigana na Israeli, na watu kadha wa kadha miongoni mwao akawateka mateka.[#Hes 33:40; Amu 1:16]

²Basi Israeli akaweka nadhiri kwa BWANA akasema, Kama wewe utawatia watu hawa mikononi mwangu kweli ndipo mimi nitaiharibu miji yao kabisa.[#Mwa 28:20; Amu 11:20; Law 27:28]

³BWANA akasikiza sauti ya Israeli, akawatia Wakanaani mikononi mwao; nao wakawaharibu wao na miji yao kabisa; na jina la mahali hapo likaitwa Horma.

⁴Wakasafiri kutoka mlima wa Hori kwa njia ya Bahari ya Shamu; ili kuizunguka nchi ya Edomu, watu wakafa moyo kwa sababu ya ile njia.[#Kum 2:1]

⁵Watu wakamnung’unikia Mungu, na Musa, Mbona mmetupandisha huku kutoka nchi ya Misri, ili tufe jangwani? Maana hapana chakula, wala hapana maji, na roho zetu zinakinai chakula hiki dhaifu.[#1 Kor 10:9; Zab 78:19; Kut 16:3; Mit 27:7]

⁶BWANA akatuma nyoka za moto kati ya watu, wakawauma, watu wengi wakafa.[#Amo 9:3,4; 1 Kor 10:9; Kum 8:15]

⁷Watu wakamwendea Musa, wakasema, Tumefanya dhambi kwa sababu tumemnung’unikia Mungu, na wewe; utuombee kwa BWANA, atuondolee nyoka hawa. Basi Musa akawaombea watu.[#Zab 78:34; Isa 26:16; Hos 5:15; Kut 8:8,28; 1 Sam 12:19; 1 Fal 13:6; Mdo 8:24]

⁸Bwana akamwambia Musa, Jifanyie nyoka ya shaba, ukaiweke juu ya mti, na itakuwa kila mtu aliyeumwa, aitazamapo ataishi.

⁹Musa akafanya nyoka ya shaba, akaiweka juu ya mti, hata ikiwa nyoka amemwuma mtu, alipoitazama ile nyoka ya shaba, akaishi.[#2 Fal 18:4; Yn 3:14,15]

Safari Kuelekea Moabu

¹⁰Kisha wana wa Israeli wakasafiri, wakapanga marago Obothi.

¹¹Wakasafiri kutoka Obothi, wakapanga Iye-abarimu, katika jangwa iliyoelekea Moabu, upande wa maawio ya jua.

¹²Kutoka huko wakasafiri, wakapanga katika bonde la Zeredi.

¹³Kutoka huko wakasafiri, wakapanga upande wa pili wa Arnoni, ulio jangwani, utokao katika mpaka wa Waamori; maana, Arnoni ndio mpaka wa Moabu, kati ya Moabu na Waamori.[#Hes 22:36; Amu 11:18]

¹⁴Kwa hiyo imesemwa katika chuo cha Vita vya BWANA,

Wahebu katika Sufa,

Na bonde za Arnoni,

¹⁵Na matelemko ya hizo bonde

Kwenye kutelemkia maskani ya Ari,

Na kutegemea mpaka wa Moabu.

¹⁶Kutoka huko wakasafiri kwenda Beeri; ni kisima ambacho BWANA alimwambia Musa, Uwakutanishe watu, nami nitawapa maji.[#Amu 9:21; Ufu 7:17]

¹⁷Ndipo Israeli wakaimba wimbo huu;[#Kut 15:1; Zab 105:2]

Bubujika Ee kisima; kiimbieni;

¹⁸Kisima walichokichimba wakuu,[#Kum 33:4; Isa 33:22]

Ambacho wakuu wa watu wakakifukua,

Kwa fimbo za enzi, kwa fimbo zao.

Kutoka lile jangwa wakaenda Matana;

¹⁹na kutoka Matana wakaenda Nahalieli; na kutoka Nahalieli wakaenda Bamothi;

²⁰na kutoka Bamothi wakaenda bondeni kwenye konde la Moabu, hata kilele cha Pisga, kielekeacho chini jangwani.[#Hes 23:28]

Kushindwa kwa Mfalme wa Sihoni Vitani

²¹Kisha Israeli akatuma wajumbe kumwendea Sihoni mfalme wa Waamori, na kusema,[#Kum 2:26; Amu 11:19]

²²Nipe ruhusa nipite katika nchi yako; hatutageuka kando kwenda mashambani, wala kuingia katika mashamba ya mizabibu hatutakunywa maji ya visimani; tutakwenda kwa njia kuu ya mfalme, hata tutakapokuwa tumepita mpaka wako.[#Hes 20:17]

²³Lakini Sihoni hakukubali kumwacha Israeli kupita katika mpaka wake; bali Sihoni akawakutanisha watu wake wote, akatoka aende kupigana na Israeli jangwani, akafika mpaka Yahasa; akapigana na Israeli.[#Kum 29:7; 2:32,33]

²⁴Israeli wakampiga kwa makali ya upanga, na kuimiliki nchi yake, tangu mto wa Arnoni hata mto wa Yaboki, mpaka nchi ya wana wa Amoni; kwa kuwa mpaka wa wana wa Amoni ulikuwa una nguvu.[#Kum 29:7; Yos 12:1,2; 24:8; Neh 9:22; Zab 135:10; 136:19; Amo 2:9]

²⁵Basi Israeli wakaitwaa miji hiyo yote; Israeli wakakaa katika miji yote ya Waamori, katika Heshboni, na miji yake yote.

²⁶Kwa kuwa Heshboni ulikuwa ni mji wa Sihoni mfalme wa Waamori, aliyekuwa akipigana na mfalme wa Moabu wa mbele, na kumpokonya nchi yake yote mkononi mwake, mpaka mto wa Arnoni.

²⁷Kwa hiyo, hao wanenao kwa mithali wasema,

Njoni Heshboni,

Mji wa Sihoni na ujengwe na kuthibitishwa;

²⁸Maana, moto umetoka Heshboni,[#Yer 48:45-46; Isa 15:4; Kum 2:9; Isa 15:1]

Umekuwa Ari ya Moabu,

Mwali wa moto umetoka mji wa Sihoni;

Wakuu wa mahali palipoinuka Arnoni

²⁹Ole wako Moabu![#Amu 11:24; 1 Fal 11:7,33]

Umeangamia, enyi watu wa Kemoshi;

Amewatoa wanawe kuwa wakimbizi,

Na binti zake waende utumwani,

Wamwendee Sihoni mfalme wa Waamori.

³⁰Tumewapigia mishale; Heshboni umepotea mpaka Diboni,[#Yer 48:18,22]

Nasi tumeharibu mpaka Nofa,

Ifikiliayo Medeba.

³¹Basi hivyo Israeli akaketi katika nchi ya Waamori.

³²Kisha Musa akapeleka watu ili kupeleleza Yazeri, nao wakaitwaa miji yake, wakawafukuza Waamori waliokuwamo.[#Yer 48:32]

Kushindwa kwa Mfalme wa Ogu Vitani

³³Kisha wakageuka na kukwea kwa njia ya Bashani; na Ogu mfalme wa Bashani akaondoka apigane nao huko Edrei, yeye na watu wake wote.[#Yos 13:12]

³⁴BWANA akamwambia Musa, Usimche; kwa kuwa nimekwisha mtia mkononi mwako, na watu wake wote, na nchi yake; nawe utamtenda kama ulivyomtenda Sihoni mfalme wa Waamori, aliyeketi Heshboni.[#Kum 3:2; Zab 135:10; 136:20]

³⁵Basi wakampiga, na wanawe, na watu wake wote, hata wasisaze kwake mtu ye yote; nao wakaimiliki nchi yake.[#Kum 3:3,4]