Mipaka ya Nchi

¹Kisha BWANA akanena na Musa, na kumwambia,

²Waagize wana wa Israeli, uwaambie, Mtakapoingia nchi ya Kanaani, (hii ndiyo nchi itakayowaangukia kuwa urithi, maana, hiyo nchi ya Kanaani kama mipaka yake ilivyo,)[#Mwa 17:8; Kum 1:7; Zab 78:55; 105:11]

³ndipo upande wenu wa kusini utakuwa tangu bara ya Sini kupita kando ya Edomu, na mpaka wenu wa kusini utakuwa tangu mwisho wa Bahari ya Chumvi kuelekea mashariki;[#Yos 15:1; Eze 47:13; Mwa 14:3; Yos 3:16]

⁴kisha mpaka wenu utageuka kwenda upande wa kusini wa kukwelea kwake Akrabimu, kisha kupita kwendelea Sini; na kutokea kwake kutakuwa kuelekea upande wa kusini wa Kadesh-barnea; kisha utaendelea mpaka Hasar-adari, na kufikilia Azmoni;[#Hes 32:8]

⁵kisha mpaka utageuka kutoka Azmoni kwendelea kijito cha Misri, na kutokea kwake kutakuwa hapo baharini.[#Mwa 15:18; 1 Fal 8:65; Isa 27:12]

⁶Kisha mpaka wenu wa upande wa magharibi mtakuwa na bahari kubwa na mpaka wake; hii ndiyo mpaka wenu upande wa magharibi.

⁷Kisha mpaka wenu wa upande wa kaskazini utakuwa ni huu; kutoka bahari kubwa mtajiandikia mlima wa Hori;

⁸na kutoka mlima wa Hori mtaandika mpaka kuingilia kwake Hamathi; na kutokea kwake mpaka kutakuwa hapo Sedada;[#Hes 13:21; Yos 13:5,6; 2 Sam 8:9; 2 Fal 14:25; 23:33; Isa 10:9; Yer 39:5; Eze 47:15-20]

⁹tena mpaka utatokea hata Zifroni, na kutokea kwake kutakuwa hapo Hasarenani; huo ndio mpaka wenu wa upande wa kaskazini.[#Eze 47:17]

¹⁰Kisha mtaandika mpaka wenu wa upande wa mashariki kutoka Hasarenani hata Shefamu;

¹¹kisha mpaka utatelemka kutoka Shefamu mpaka Ribla, upande wa mashariki wa Aini; kisha mpaka utatelemka na kufikilia upande wa bahari ya Kinerethi upande wa mashariki;[#2 Fal 23:33; Yer 39:5; Kum 3:17; Yos 11:2; 19:35]

¹²kisha mpaka utatelemkia Yordani, na kutokea kwake kutakuwa hapo katika Bahari ya Chumvi; hii ndiyo nchi yenu kama mipaka yake ilivyo kuizunguka pande zote.

¹³Kisha Musa akawaagiza wana wa Israeli, akisema, Hii ndiyo nchi mtakayoirithi kwa kupiga kura, ambayo BWANA ameagiza wapewe watu wa zile kabila kenda, na nusu ya kabila;[#Yos 14:1-5; #Hes 26:52-56; Yos 14:1,2]

¹⁴kwa kuwa kabila ya wana wa Reubeni kwa nyumba za baba zao, na kabila ya wana wa Gadi kwa nyumba za baba zao, wamekwisha pata, na hiyo nusu ya kabila ya Manase wamekwisha pata urithi wao;[#Hes 32:33; Yos 14:2,3]

¹⁵hizo kabila mbili na nusu ya kabila wamekwisha pata urithi wao huko ng’ambo ya pili ya Yordani, hapo Yeriko, upande wa mashariki, kuelekea maawio ya jua.

Viongozi wa Makabila

¹⁶Kisha BWANA akanena na Musa, na kumwambia,

¹⁷Haya ndiyo majina ya watu watakaowagawanyia nchi iwe urithi wenu; Eleazari kuhani, na Yoshua mwana wa Nuni.[#Kut 6:23-25]

¹⁸Kisha mtamtwaa mkuu mmoja wa kila kabila, ili waigawanye nchi iwe urithi wenu.

¹⁹Na majina ya watu hao ni haya; katika kabila ya Yuda, ni Kalebu mwana wa Yefune.[#Mwa 29:35; 49:8-10; Kum 33:7; Zab 60:7; 108:8; Hes 13:6,30; Kum 1:36]

²⁰Na katika kabila ya wana wa Simeoni, Shemueli mwana wa Amihudi.[#Mwa 29:33; 49:5; Eze 48:24]

²¹Katika kabila ya Benyamini, ni Elidadi mwana wa Kisloni.[#Mwa 35:18; 49:27; Kum 33:12; Zab 68:27; 80:2]

²²Na katika kabila ya wana wa Dani, mkuu, Buki mwana wa Yogli.

²³Katika wana wa Yusufu; katika kabila ya wana wa Manase, mkuu, Hanieli mwana wa Efodi;[#Mwa 48:8-22; 49:22; Kum 33:13; Zab 80:1]

²⁴na katika kabila ya wana wa Efraimu, mkuu, Kemueli mwana wa Shiftani.

²⁵Na katika kabila ya wana wa Zabuloni, mkuu, Elisafani mwana wa Parnaki.

²⁶Na katika kabila ya wana wa Isakari, mkuu, Paltieli mwana wa Azani.

²⁷Na katika kabila ya wana wa Asheri, mkuu, Ahihudi mwana wa Shelomi.

²⁸Na katika kabila ya wana wa Naftali, mkuu, Pedaheli mwana wa Amihudi.

²⁹Hao ndio BWANA aliowaagiza wawagawanyie urithi wana wa Israeli katika nchi ya Kanaani.[#Kum 32:8; Mdo 17:26]