Wanadhiri

¹Kisha BWANA akanena na Musa, na kumwambia,[#Law 27:2; Amu 13:5; Mdo 21:23; Rum 1:1]

²Nena na watu wa Israeli, uwaambie, Mtu mume au mtu mke atakapoweka nadhiri kubwa, nadhiri ya Mnadhiri, ili ajiweke wakfu kwa BWANA;[#Law 10:9; Amu 13:4; Amo 2:12; Lk 1:15]

³atajitenga na divai na vileo; hatakunywa siki ya divai, wala siki ya kileo, wala asinywe maji yo yote ya zabibu, wala asile zabibu, mbichi wala zilizokauka.[#Lk 1:15]

⁴Siku zote za kujitenga kwake asile kitu cho chote kilichoandaliwa kwa mzabibu, tangu kokwa hata maganda.

⁵Siku zote za nadhiri yake ya kujitenga, wembe usimfikilie kichwani mwake; hata hizo siku zitakapotimia, ambazo alijiweka wakfu kwa BWANA, atakuwa mtakatifu, ataziacha nywele za kichwani mwake zikue ziwe ndefu.[#Amu 13:5; 1 Sam 1:11; Omb 4:7]

⁶Siku hizo zote ambazo alijiweka awe wa BWANA asikaribie maiti.[#Law 19:28; 21:11; Yer 16:5,6; Eze 24:16-18; Mt 8:21]

⁷Hatajitia unajisi kwa ajili ya baba yake, wala kwa ajili ya mamaye, wala kwa nduguye mume, wala kwa umbu lake, wakifa wao; kwa sababu ya huku kujiweka kwa Mungu ni juu ya kichwa chake.[#Hes 9:6]

⁸Siku zote za kujitenga kwake, yeye ni mtakatifu kwa BWANA

⁹Na kama mtu ye yote akifa ghafla karibu naye, akajitia unajisi kichwa cha kutengwa kwake, ndipo atakinyoa kichwa siku hiyo ya kutakaswa kwake, atakinyoa siku ya saba.[#Mdo 18:18]

¹⁰Tena siku ya nane ataleta hua wawili, au makinda mawili ya njiwa, aende nao kwa kuhani, hata mlangoni pa hema ya kukutania;[#Law 5:7; 14:22]

¹¹naye kuhani atasongeza mmoja kuwa sadaka ya dhambi, na wa pili kuwa sadaka ya kuteketezwa, naye atafanya upatanisho kwa ajili yake, kwa sababu aliingia kosani kwa ajili ya mfu, naye atatakasa kichwa chake siku iyo hiyo.

¹²Kisha ataziweka kwa BWANA hizo siku za kujitenga kwake, naye ataleta mwana-kondoo mume wa mwaka wa kwanza, kuwa sadaka ya hatia; lakini hizo siku za kwanza hazitahesabiwa, kwa kuwa kule kujitenga kwake kulitiwa unajisi.

¹³Na sheria ya Mnadhiri ni hii, zitakapotimia hizo siku za kujitenga kwake; ataletwa mlangoni pa hema ya kukutania;[#Mdo 21:23-24]

¹⁴naye atasongeza sadaka yake kwa BWANA, mwana-kondoo mmoja mume wa mwaka wa kwanza mkamilifu, kuwa sadaka ya kuteketezwa, na mwana-kondoo mmoja mke wa mwaka wa kwanza mkamilifu, kuwa sadaka ya dhambi, na kondoo mume mmoja mkamilifu kwa sadaka ya amani,[#Law 4:2; 3:6]

¹⁵na kikapu cha mikate isiyotiwa chachu, mikate ya unga mwembamba iliyokandwa kwa mafuta, na mikate ya kaki isiyochachwa, iliyotiwa mafuta, pamoja na sadaka zake za unga, na sadaka zake za kinywaji.[#Law 2:4; 8:2; 9:4; Yn 6:50-53; Kut 29:2; Hes 15:5,7; Isa 62:9; Yoe 1:9,13; 1 Kor 10:31; 11:26]

¹⁶Na kuhani atavisongeza mbele za BWANA, naye atasongeza sadaka yake ya dhambi, na sadaka yake ya kuteketezwa;

¹⁷naye atamsongeza huyo kondoo mume kuwa dhabihu ya sadaka za amani kwa BWANA, pamoja na kikapu cha mikate isiyotiwa chachu; kisha kuhani atasongeza sadaka ya unga nayo, na sadaka yake ya kinywaji.

¹⁸Naye Mnadhiri atakinyoa kichwa cha kujitenga kwake, mlangoni pa hema ya kukutania, kisha atatwaa hizo nywele za kichwa cha kujitenga kwake, na kuzitia katika moto ulio chini ya dhabihu ya sadaka za amani.[#Mdo 21:24; Lk 17:10; Rum 6:6; Gal 5:24; Efe 4:23; Kol 3:9]

¹⁹Kisha kuhani atautwaa mkono wa huyo kondoo mume uliotokoswa, na mkate mmoja usio chachu atautwaa kikapuni, na mkate mmoja wa kaki, naye ataitia mikononi mwa yule Mnadhiri, baada ya kunyoa kichwa cha kujitenga kwake;[#Law 8:31; Kut 29:23,24]

²⁰naye kuhani atavitikisa viwe sadaka ya kutikiswa mbele za BWANA; kitu hicho ni kitakatifu kwa kuhani, pamoja na kidari cha kutikiswa, na paja la kuinuliwa; kisha baadaye Mnadhiri ana ruhusa kunywa divai.[#Law 9:21; Mhu 9:7; Isa 35:10; Yn 17:4,5; Ufu 14:13]

²¹Sheria ya Mnadhiri awekaye nadhiri ni hiyo, tena ni sheria ya sadaka yake atakayomtolea BWANA kwa ajili ya kujitenga kwake, pamoja na vitu vile ambavyo aweza kuvipata zaidi; kama nadhiri yake awekayo ilivyo, ndivyo impasavyo kufanya kwa kuiandama sheria ya kujitenga kwake.

Baraka ya Kikuhani

²²Kisha BWANA akanena na Musa, na kumwambia,

²³Nena na Haruni na wanawe, uwaambie, Hivi ndivyo mtakavyowabarikia wana wa Israeli; mtawaambia;[#1 Nya 23:13]

²⁴BWANA akubarikie, na kukulinda;[#Zab 134:3; 121:7; Yn 17:11; 1 Pet 1:5]

²⁵BWANA akuangazie nuru za uso wake, na kukufadhili;[#Zab 67:1; 80:3; Dan 9:17; Mwa 43:29; Yn 1:17; Rum 5:21]

²⁶BWANA akuinulie uso wake, na kukupa amani.[#Zab 21:6; Mdo 2:28; Zab 85:10; Isa 26:3,12; Lk 2:14; Yn 20:21; Rum 15:13; 2 The 3:16]

²⁷Ndivyo watakavyoweka jina langu juu ya wana wa Israeli; nami nitawabarikia.[#Kum 28:10; 2 Nya 7:14; Zab 115:12]