¹Mizani ya hadaa ni chukizo kwa BWANA;

Bali vipimo vilivyo sawasawa humpendeza.

²Kijapo kiburi ndipo ijapo aibu;[#Dan 4:30]

Bali hekima hukaa na wanyenyekevu.

³Ukamilifu wao wenye haki utawaongoza

Bali ukaidi wao wenye fitina utawaangamiza.

⁴Mali hazifaidii kitu siku ya ghadhabu;[#Eze 7:19; Sef 1:18; Mwa 7:1]

Bali haki huokoa na mauti.

⁵Haki yake mtu mkamilifu itamwongoza njia yake;

Bali mtu mwovu ataanguka kwa uovu wake.

⁶Haki yao wenye haki itawaokoa;[#1 Tim 4:8; Mhu 10:8]

Bali wafanyao fitina watanaswa kwa hila yao wenyewe.

⁷Mtu mwovu atakapokufa, taraja lake lapotea;

Na matumaini ya uovu huangamia.

⁸Mwenye haki huokolewa katika dhiki,

Na mtu mwovu ataiingia badala yake.

⁹Asiyemcha Mungu humpoteza jirani yake kwa kinywa chake;[#Ayu 8:13]

Bali wenye haki watapona kwa maarifa.

¹⁰Wenye haki wasitawipo, mji hufurahi;[#Est 8:15]

Waovu waangamiapo, watu hupiga kelele.

¹¹Mji hutukuzwa kwa mbaraka wa mwenye haki;

Bali mji hupinduliwa kwa kinywa cha mwovu.

¹²Asiye na akili humdharau mwenziwe;

Bali mtu aliye na ufahamu hunyamaza.

¹³Mwenye kitango akisingizia hufunua siri;

Bali mwenye roho ya uaminifu husitiri mambo.

¹⁴Pasipo mashauri taifa huanguka;[#1 Fal 12:1]

Bali kwa wingi wa washauri huja wokovu.

¹⁵Amdhaminiye mgeni hakosi ataumia;

Achukiaye mambo ya dhamana yu salama.

¹⁶Mwanamke wa adabu huheshimiwa daima;

Na watu wakali hushika mali siku zote.

¹⁷Mwenye rehema huitendea mema nafsi yake;[#Mt 25:34]

Aliye mkali hujisumbua mwili wake.

¹⁸Mtu mwovu hupata mshahara wa udanganyifu;[#Hos 10:12; Gal 6:8,9]

Apandaye haki ana thawabu ya hakika.

¹⁹Haki huelekea uzima;

Afuataye maovu hufuata mauti yake mwenyewe.

²⁰Wenye kuhalifu moyoni ni chukizo kwa BWANA;

Walio wakamilifu katika njia zao humpendeza.

²¹Hakika, mtu mwovu hatakosa adhabu;

Bali wazao wa wenye haki wataokoka.

²²Kama pete ya dhahabu katika pua ya nguruwe,

Kadhalika mwanamke mzuri asiye na akili.

²³Haja ya mwenye haki ni mema tu;[#Rum 2:8]

Bali kutaraji kwake mtu mwovu ni ghadhabu.

²⁴Kuna atawanyaye, lakini huongezewa zaidi;

Kuna azuiaye isivyo haki, lakini huelekea uhitaji.

²⁵Nafsi ya mtu mkarimu itawandishwa;[#Mt 5:7]

Anyweshaye atanyweshwa mwenyewe.

²⁶Awanyimaye watu nafaka, watu watamlaani;[#Amo 8:5; Ayu 29:13]

Auzaye nafaka, baraka itakuwa kichwani pake.

²⁷Atafutaye mema kwa bidii hutafuta fadhili;[#Est 7:10]

Atafutaye madhara, hayo yatamjia.

²⁸Azitegemeaye mali zake ataanguka;[#Mk 10:24; Lk 12:21; 1 Tim 6:17; Yer 17:8]

Mwenye haki atasitawi kama jani.

²⁹Ataabishaye nyumba yake mwenyewe ataurithi upepo;[#Mhu 5:16]

Mpumbavu atakuwa mtumwa wa mtu mwenye moyo wa akili.

³⁰Mazao ya mwenye haki ni mti wa uzima;

Na mwenye hekima huvuta roho za watu.

³¹Tazama, mwenye haki atalipwa duniani;[#1 Pet 4:18; Yer 25:29]

Basi mwovu na mkosaji si mara nyingi zaidi?