¹Jawabu la upole hugeuza hasira;

Bali neno liumizalo huchochea ghadhabu.

²Ulimi wa mwenye hekima hutamka maarifa vizuri;

Bali vinywa vya wapumbavu humwaga upumbavu.

³Macho ya BWANA yako kila mahali;[#2 Nya 16:9; Ayu 34:21; Mit 5:21; Yer 16:17; Zek 4:10; Ebr 4:13]

Yakimchunguza mbaya na mwema.

⁴Ulimi safi ni mti wa uzima;

Bali ukorofi wa ulimi huvunja moyo.

⁵Mpumbavu hudharau kurudiwa na babaye;

Bali yeye aangaliaye maonyo hupata busara.

⁶Katika nyumba ya mwenye haki mna akiba nyingi;

Bali mapato ya mtu mbaya huwa taabu tu.

⁷Midomo ya mwenye haki hueneza maarifa;

Bali moyo wa mpumbavu haufanyi hivyo.

⁸Sadaka ya mtu mbaya ni chukizo kwa BWANA;[#Isa 61:8; Yer 6:20; Amo 5:22; Lk 18:11]

Bali maombi ya mtu mnyofu ni furaha yake.

⁹Njia ya mtu mbaya ni chukizo kwa BWANA;[#Mit 21:21; Isa 51:1,7; 1 Tim 6:11]

Bali humpenda mtu afuatiaye wema.

¹⁰Adhabu kali ina yeye aiachaye njia;

Naye achukiaye kukemewa atakufa.

¹¹Kuzimu na Uharibifu vi wazi mbele za BWANA;[#Yn 2:24; Mdo 1:24]

Si zaidi basi, mioyo ya wanadamu?

¹²Mwenye mzaha hapendi kukaripiwa;

Wala yeye hawaendei wenye hekima.

¹³Moyo wa furaha huchangamsha uso;

Bali kwa huzuni ya moyo roho hupondeka.

¹⁴Moyo wa mwenye ufahamu hutafuta maarifa;

Bali kinywa cha wapumbavu hula upumbavu.

¹⁵Siku zote za mtu ateswaye ni mbaya;

Bali ukunjufu wa moyo ni karamu ya daima.

¹⁶Kuwa na mali chache pamoja na kumcha BWANA;[#Mit 16:8; Mhu 4:6; 1 Tim 6:6]

Ni bora kuliko mali nyingi pamoja na taabu.

¹⁷Chakula cha mboga penye mapendano;

Ni bora kuliko ng’ombe aliyenona pamoja na kuchukiana.

¹⁸Mtu wa hasira huchochea ugomvi;

Bali asiye mwepesi wa hasira hutuliza mashindano.

¹⁹Njia ya mtu mvivu ni kama boma la miiba;

Bali mapito yao wenye unyofu hufanyika njia kuu.

²⁰Mwana mwenye hekima humfurahisha babaye;

Bali mpumbavu humdharau mamaye.

²¹Upumbavu ni furaha kwake aliyepungukiwa na akili;[#Efe 5:15]

Bali mwenye ufahamu huunyosha mwenendo wake.

²²Pasipo mashauri makusudi hubatilika;

Bali kwa wingi wa washauri huthibithika.

²³Mtu hulifurahia jibu la kinywa chake;

Na neno linenwalo wakati wa kufaa ni jema kama nini!

²⁴Kwa mtu mwenye akili njia ya uhai huenda juu;[#Flp 3:20]

Ili atoke katika kuzimu chini.

²⁵BWANA ataing’oa nyumba ya mwenye kiburi;

Bali atauthibitisha mpaka wa mjane.

²⁶Mashauri mabaya ni chukizo kwa BWANA;

Bali maneno yapendezayo ni safi.

²⁷Atamaniye faida huifadhaisha nyumba yake mwenyewe;[#Yos 6:18; 1 Sam 8:3; Mit 1:19; Isa 5:8; Zek 5:3]

Bali achukiaye zawadi ataishi.

²⁸Moyo wa mwenye haki hufikiri jinsi atakavyojibu;[#1 Pet 3:15]

Bali kinywa cha wasio haki humwaga mabaya.

²⁹BWANA yu mbali na wasio haki;[#Efe 2:12; Zab 34:15,16; Yn 9:31; Rum 8:26]

Bali huisikia sala ya mwenye haki.

³⁰Mng’ao wa macho huufurahisha moyo;

Habari njema huinenepesha mifupa.

³¹Sikio lisikilizalo lawama yenye uhai

Litakaa kati yao wenye hekima.

³²Akataaye maonyo huidharau nafsi yake mwenyewe;

Bali yeye asikilizaye lawama hujipatia ufahamu.

³³Kumcha BWANA ni maonyo ya hekima;

Na kabla ya heshima hutangulia unyenyekevu.