Mithali nyingine za Sulemani

¹Hizi nazo ni mithali za Sulemani, ambazo watu wa Hezekia, mfalme wa Yuda, walizinakili.

²Ni utukufu wa Mungu kuficha jambo;[#Rum 11:33; Ayu 29:16]

Bali ni utukufu wa mfalme kuchunguza jambo.

³Mbingu huenda juu sana, na nchi huenda chini;

Lakini mioyo ya wafalme haichunguziki.

⁴Ondoa takataka katika fedha,

Na chombo kitatokea kwa mtakasaji;

⁵Mwondoe asiye haki mbele ya mfalme,

Na kiti chake cha enzi kitathibitika katika haki.

⁶Usijitukuze mbele ya uso wa mfalme;[#Lk 14:8-10]

Wala usisimame mahali pa watu wakuu;

⁷Kwa maana ni heri kuambiwa, Njoo huku mbele;

Kuliko kuwekwa nyuma machoni pa mkuu.

Yale uliyoyaona kwa macho,

⁸Usitoke nje kwa haraka ili kuyashindania;[#Mt 5:25]

Usije ukakosa kujua la kutenda hatimaye,

Mwenzako atakapokuwa amekuaibisha.

⁹Ujitetee na mwenzako peke yake;[#Mt 18:15]

Bali usiifunue siri ya mtu mwingine;

¹⁰Yeye asikiaye asije akakutukana;

Na aibu yako isiondoke.

¹¹Neno linenwalo wakati wa kufaa,

Ni kama machungwa katika vyano vya fedha.

¹²Kipuli cha dhahabu, na pambo la dhahabu safi;

Ndivyo alivyo mwonyaji mwenye hekima kwa sikio lisikialo.

¹³Kama baridi ya theluji wakati wa mavuno;

Ndivyo alivyo mjumbe mwaminifu kwao wamtumao;

Kwa maana huwaburudisha bwana zake nafsi zao.

¹⁴Kama mawingu na upepo pasipo mvua;[#Yud 1:12]

Ndivyo alivyo yeye ajisifiaye karama kwa uongo.

¹⁵Kwa uvumilivu mwingi mkuu husadikishwa;

Na ulimi laini huvunja mfupa.

¹⁶Je! Umeona asali? Kula kadiri ya kukutosha;

Usije ukashiba na kuitapika.

¹⁷Mguu wako usiingie katika nyumba ya jirani yako ila kwa kiasi;

Asije akakukinai na kukuchukia.

¹⁸Mtu amshuhudiaye jirani yake uongo[#Zab 140:3]

Ni nyundo, na upanga, na mshale mkali.

¹⁹Kumtumaini asiye mwaminifu wakati wa taabu[#Ayu 6:14-20; 2 Tim 4:16]

Ni kama jino lililovunjika, au mguu ulioteguka.

²⁰Amwimbiaye nyimbo mtu mwenye moyo mzito,[#Dan 6:18]

Ni kama yeye avuaye nguo wakati wa baridi;

Ni kama siki juu ya magadi.

²¹Adui yako akiwa ana njaa, mpe chakula;[#Rum 12:20; Mt 5:44]

Tena akiwa ana kiu, mpe maji ya kunywa;

²²Maana utatia makaa ya moto kichwani pake;[#2 Sam 16:12]

Na BWANA atakupa thawabu.

²³Upepo wa kusi huleta mvua;

Vile vile asingiziaye huleta uso wa ghadhabu.

²⁴Ni afadhali kukaa katika pembe ya darini,

Kuliko katika nyumba pana pamoja na mwanamke mgomvi.

²⁵Kama vile maji ya baridi kwa mtu mwenye kiu,

Ndivyo ilivyo habari njema itokayo katika nchi ya mbali.

²⁶Mwenye haki amwangukiapo mtu mbaya[#Mik 7:8]

Ni kama chemchemi iliyochafuka,

Na kisima kilichokanyagwa.

²⁷Haifai kula asali nyingi mno;[#Lk 14:11]

Vile vile mtu kutafuta utukufu wake mwenyewe si utukufu.

²⁸Asiyetawala roho yake

Ni mfano wa mji uliobomolewa, usio na kuta.