¹Kama theluji wakati wa joto, na mvua wakati wa mavuno;[#Zab 12:8]

Kadhalika heshima haimpasi mpumbavu.

²Kama shomoro katika kutanga-tanga kwake,[#Hes 23:8]

Na kama mbayuwayu katika kuruka kwake;

Kadhalika laana isiyo na sababu haimpigi mtu.

³Mjeledi kwa farasi, lijamu kwa punda,

Na fimbo kwa mgongo wa mpumbavu.

⁴Usimjibu mpumbavu sawasawa na upumbavu wake;[#Isa 36:21]

Usije ukafanana naye.

⁵Umjibu mpumbavu sawasawa na upumbavu wake;

Asije akawa mwenye hekima machoni pake.

⁶Apelekaye ujumbe kwa mkono wa mpumbavu

Hujikata miguu, na kunywa hasara.

⁷Miguu yake achechemeaye huwa dhaifu;

Kadhalika mithali katika kinywa cha mpumbavu.

⁸Kama mfuko wa vito katika chungu ya mawe;

Kadhalika mtu amheshimuye mpumbavu.

⁹Kama mwiba uingiao katika mkono wa mlevi;

Kadhalika mithali katika kinywa cha mpumbavu.

¹⁰Fundi stadi hufanyiza vitu vyote;

Bali amwajiriye mpumbavu ni kama awaajiriye watu wapitao.

¹¹Kama vile mbwa arudiavyo matapiko yake;[#2 Pet 2:22]

Kadhalika mpumbavu afanya upumbavu tena.

¹²Je! Wamwona mtu mwenye hekima machoni pake mwenyewe?

Afadhali kumtumaini mpumbavu kuliko yeye.

¹³Mtu mvivu husema, Simba yuko njiani,

Simba yuko katika njia kuu.

¹⁴Kama vile mlango ugeukavyo katika bawaba zake;

Kadhalika mtu mvivu katika kitanda chake.

¹⁵Mtu mvivu hutia mkono wake sahanini;

Kwamchosha kuupeleka tena kinywani pake.

¹⁶Mtu mvivu ni mwenye hekima machoni pake,

Kuliko watu saba wawezao kutoa sababu.

¹⁷Mtu apitaye na kujisumbua kwa ugomvi usio wake;

Ni kama mtu ashikaye mbwa kwa masikio yake.

¹⁸Kama mtu mwenye wazimu atupaye mienge,

Na mishale, na mauti;

¹⁹Ndivyo alivyo amdanganyaye mwenzake,[#Efe 5:4]

Na kusema, Je! Sikufanya mzaha tu?

²⁰Moto hufa kwa kukosa kuni;

Na bila mchongezi fitina hukoma.

²¹Kama makaa juu ya makaa yanayowaka,[#2 Sam 20:1]

Na kama kuni juu ya moto;

Ndivyo mtu mgomvi achocheavyo uadui.

²²Maneno ya mchongezi ni kama vitoweo.[#Eze 22:9]

Nayo hushukia pande za ndani za tumbo.

²³Midomo ijipendekezayo pamoja na moyo mbaya[#Lk 22:48]

Ni kama kigae kilichofunikizwa taka za fedha.

²⁴Achukiaye huficha chuki kwa midomo yake;

Naye huweka akiba ya hila moyoni mwake.

²⁵Anenapo maneno mazuri usimsadiki;

Kwa maana ana machukizo saba moyoni mwake.

²⁶Ingawa chuki hufunikizwa kwa hila;

Uovu wake utadhihirika mbele ya kusanyiko.

²⁷Achimbaye shimo atatumbukia mwenyewe;[#Est 7:10]

Naye abingirishaye jiwe litamrudia.

²⁸Ulimi unenao uongo huwachukia wale uliowajeruhi;[#Mit 13:6]

Na kinywa cha kujipendekeza hutenda uharibifu.