¹Waovu hukimbia wasipofuatiwa na mtu;

Bali wenye haki ni wajasiri kama simba.

²Kwa sababu ya maasi ya nchi wakuu wake huwa wengi;

Bali kwa wenye ufahamu na maarifa hali ya nchi hudumishwa

³Mtu mhitaji awaoneaye maskini,[#Mt 18:28]

Ni kama mvua ya dhoruba isiyosaza chakula.

⁴Wao waiachao sheria huwasifu waovu;[#1 Fal 18:18; Mt 3:7; Efe 5:11; 1 Tim 5:20]

Bali wao waishikao hushindana nao.

⁵Watu wabaya hawaelewi na hukumu;[#Yn 7:17]

Bali wamtafutao BWANA huelewa na yote.

⁶Afadhali maskini aendaye katika unyofu wake,

Kuliko mpotofu wa njia angawa ni tajiri.

⁷Yeye aishikaye sheria ni mwana mwenye hekima;

Bali aliye rafiki wa walafi humwaibisha babaye.

⁸Yeye azidishaye mali yake kwa riba na faida,

Humkusanyia mtu awahurumiaye maskini.

⁹Yeye aligeuzaye sikio lake asiisikie sheria,[#2 Tim 4:3; Zab 66:18; Lk 13:25-27]

Hata sala yake ni chukizo.

¹⁰Kila mtu awapotezaye wenye haki katika njia mbaya,[#Zab 34:9,10; Mt 6:33; Mk 10:30; Lk 18:29,30; Rum 8:32; 1 Kor 3:22,23]

Ataanguka katika rima lake mwenyewe;

Bali wakamilifu watarithi mema.

¹¹Mtu tajiri ana hekima machoni pake mwenyewe;

Bali maskini mwenye ufahamu humchunguza sana.

¹²Wenye haki washindapo, uko utukufu mwingi;

Bali waovu waondokapo, watu hujificha.

¹³Afichaye dhambi zake hatafanikiwa;

Bali yeye aziungamaye na kuziacha atapata rehema.

¹⁴Mwanadamu mwenye kicho yu heri sikuzote;

Bali mshupavu wa moyo ataangukia madhara.

¹⁵Kama simba angurumaye, na dubu mwenye njaa;[#Mt 2:16]

Ndivyo alivyo mtu mbaya awatawalaye maskini.

¹⁶Mkuu aliyepungukiwa na akili huwaonea watu sana;

Bali achukiaye kutamani ataongeza siku zake.

¹⁷Aliyelemewa na damu ya mtu

Atalikimbilia shimo; wala mtu asimzuie.

¹⁸Aendaye kwa unyofu ataokolewa;

Bali mkaidi wa njia zake ataanguka mara.

¹⁹Alimaye shamba lake atakuwa na chakula tele;

Bali afuataye mambo ya upuzi atapata umaskini wa kumtosha.

²⁰Mtu mwaminifu atakuwa na baraka tele;

Lakini afanyaye haraka kuwa tajiri hakosi ataadhibiwa.

²¹Kupendelea watu si kwema;[#Eze 13:19]

Wala mtu kuasi kwa ajili ya kipande cha mkate.

²²Mwenye husuda afanya haraka kuwa tajiri;

Wala haufikiri uhitaji utakaomjilia.

²³Amkemeaye mwenzake hatimaye atapata kibali;

Zaidi ya mtu ajipendekezaye kwa ulimi wake.

²⁴Aibaye mali ya babaye au mamaye, na kusema, Si kosa;

Mwana huyo ni rafiki wa mtu mharibifu.

²⁵Mwenye nafsi ya kutamani huchochea fitina;[#1 Tim 6:6]

Bali amtumainiye BWANA atawandishwa.

²⁶Mwenye kujitumainia moyo wake ni mjinga;

Bali yeye aendaye kwa busara ataokolewa.

²⁷Mwenye kuwagawia maskini hatahitaji kitu;

Bali afichaye macho yake atakuwa na laana nyingi.

²⁸Wasio haki wainukapo, wanadamu hujificha;

Bali waangamiapo, wenye haki huongezeka.