Maonyo kuhusu Unajisi na Udanganyifu

¹Mwanangu, sikiliza hekima yangu;

Tega sikio lako, mzisikie akili zangu;

²Upate kuilinda busara,[#Mal 2:7]

Na midomo yako iyahifadhi maarifa.

³Maana midomo ya malaya hudondoza asali,

Na kinywa chake ni laini kuliko mafuta;

⁴Lakini mwisho wake ni mchungu kuliko pakanga;[#Mhu 7:26; Ebr 4:12]

Ni mkali kama upanga wa makali kuwili.

⁵Miguu yake inatelemkia mauti;[#Ebr 13:4]

Hatua zake zinashikamana na kuzimu;

⁶Hata asiweze kuiona njia sawa ya uzima;

Njia zake ni za kutanga-tanga wala hana habari.

⁷Basi, wanangu, nisikilizeni sasa,

Wala msiache maneno ya kinywa changu.

⁸Itenge njia yako mbali naye,

Wala usiukaribie mlango wa nyumba yake.

⁹Usije ukawapa wengine heshima yako,

Na wakorofi miaka yako;

¹⁰Wageni wasije wakashiba nguvu zako;

Kazi zako zikawa ndani ya nyumba ya mgeni;

¹¹Nawe ukaziombolea siku zako za mwisho,

Nyama yako na mwili wako utakapoangamia;

¹²Ukasema, Jinsi nilivyochukia maonyo,

Na moyo wangu ukadharau kukemewa;

¹³Wala sikuisikia sauti ya waalimu wangu,

Wala sikuwategea sikio langu walionifundisha!

¹⁴Nalikuwa karibu na kuingia katika maovu yote,

Katikati ya mkutano na kusanyiko.

¹⁵Unywe maji ya birika lako mwenyewe,

Na maji yenye kububujika katika kisima chako.

¹⁶Je! Chemchemi zako zitawanyike mbali,

Na mito ya maji katika njia kuu?

¹⁷Yawe yako mwenyewe peke yako,

Wala si ya wageni pamoja nawe.

¹⁸Chemchemi yako ibarikiwe;[#Mhu 9:9; Mal 2:14]

Nawe umfurahie mke wa ujana wako.

¹⁹Ni ayala apendaye na paa apendezaye;[#Wim 2:9]

Maziwa yake yakutoshe sikuzote;

Na kwa upendo wake ushangilie daima.

²⁰Mwanangu! Mbona unashangilia malaya,

Na kukikumbatia kifua cha mgeni?

²¹Kwa maana njia za mwanadamu zi mbele za macho ya BWANA,[#2 Nya 16:9; Ayu 31:4; Yer 16:17; Hos 7:2; Ebr 4:13]

Na mienendo yake yote huitafakari.

²²Maovu yake yeye yatampata mdhalimu,[#Zab 9:15]

Naye atashikwa kwa kamba za dhambi zake.

²³Atakufa huyo kwa kukosa maonyo,[#Ayu 4:21; Mit 10:21]

Naye atapotea kwa wingi wa ujinga wake.