Sala ya Kutaka Msaada kutoka kwa Mungu

¹Ee BWANA, usikie kuomba kwangu,

Kilio changu kikufikie.

²Usinifiche uso wako siku ya shida yangu,

Unitegee sikio lako, siku niitapo unijibu upesi.

³Maana siku zangu zinatoweka kama moshi,[#Yak 4:14; Omb 1:13]

Na mifupa yangu inateketea kama kinga.

⁴Moyo wangu umepigwa kama majani na kukauka,

Naam, ninasahau kula chakula changu.

⁵Kwa ajili ya sauti ya kuugua kwangu

Mifupa yangu imegandamana na nyama yangu.

⁶Nimekuwa kama mwari nyuni wa jangwani,[#Isa 34:11; Sef 2:14]

Na kufanana na bundi wa mahameni.

⁷Nakesha, tena nimekuwa kama shomoro

Aliye peke yake juu ya nyumba.

⁸Adui zangu wananilaumu mchana kutwa;[#Mdo 23:12]

Wanaonichukia kana kwamba wana wazimu

Huapa kwa kunitaja mimi.

⁹Maana nimekula majivu kama chakula,

Na kukichanganya kinywaji changu na machozi.

¹⁰Kwa sababu ya ghadhabu yako na hasira yako;[#Zab 30:7]

Maana umeniinua na kunitupilia mbali.

¹¹Siku zangu zi kama kivuli kilichotandaa,[#Yak 1:10]

Nami ninanyauka kama majani.

¹²Bali Wewe, BWANA utaketi ukimiliki milele,[#1 Tim 6:16]

Na kumbukumbu lako kizazi hata kizazi.

¹³Wewe mwenyewe utasimama,[#Isa 40:2]

Na kuirehemu Sayuni,

Kwa maana ndio wakati wa kuihurumia,

Naam, majira yaliyoamriwa yamewadia.

¹⁴Maana watumishi wako wameyaridhia mawe yake,[#Dan 9:2]

Na kuyaonea huruma mavumbi yake.

¹⁵Kisha mataifa wataliogopa jina la BWANA,[#1 Fal 8:43]

Na wafalme wote wa dunia utukufu wako;

¹⁶BWANA atakapokuwa ameijenga Sayuni,

Atakapoonekana katika utukufu wake,

¹⁷Atakapoyaelekea maombi yake aliye mkiwa,[#Neh 2:8]

Asiyadharau maombi yao.

¹⁸Kizazi kitakachokuja kitaandikiwa hayo,[#Rum 15:4; 1 Kor 10:11; Zab 22:31; Isa 43:21]

Na watu watakaoumbwa watamsifu BWANA.

¹⁹Maana ametazama toka patakatifu pake pa juu,[#Kum 26:15; Zab 14:2]

Toka mbinguni BWANA ameiangalia nchi,

²⁰Ili akusikie kuugua kwake aliyefungwa,

Na kuwafungua walioandikiwa kufa.

²¹Watu walitangaze jina la BWANA katika Sayuni,

Na sifa zake katika Yerusalemu,

²²Pindi mataifa watapokusanyika pamoja,[#Hos 1:11]

Falme nazo ili kumtumikia BWANA.

²³Amezipunguza nguvu zangu njiani;

Amezifupisha siku zangu.

²⁴Nitasema, Ee Mungu wangu, usiniondoe katikati ya siku zangu;[#Zab 90:2; Hab 1:12; Ufu 1:4,8]

Miaka yako ni tangu kizazi hata kizazi.

²⁵Hapo mwanzo uliutia msingi wa nchi,[#Mwa 1:1; Kut 20:11; Ayu 38:4-7; Ebr 1:10-12]

Na mbingu ni kazi ya mikono yako.

²⁶Hizi zitaharibika, bali Wewe utadumu[#Isa 66:22; Rum 8:20; 2 Pet 3:7]

Naam, hizi zitachakaa kama nguo;

Na kama mavazi utazibadilisha,

Nazo zitabadilika.

²⁷Lakini Wewe U Yeye yule;[#Mal 3:6]

Na miaka yako haitakoma.

²⁸Wana wa watumishi wako watakaa,

Na wazao wao wataimarishwa mbele zako.