Sala ya Uthibitisho na Kutaka Kisasi

¹Ee Mungu wa sifa zangu, usinyamaze,[#Zab 83:1]

²Kwa maana wamenifumbulia kinywa;

Kinywa cha mtu asiye haki, cha hila,

Wamesema nami kwa ulimi wa uongo.

³Naam, kwa maneno ya chuki wamenizunguka,[#1 Sam 19:4,5; Zab 35:7,20; Yn 15:25]

Wamepigana nami bure.

⁴Badala ya upendo wangu wao hunishitaki,

Ijapokuwa naliwaombea.

⁵Wamenichukuza mabaya badala ya mema,[#Zab 38:20]

Na chuki badala ya upendo wangu.

⁶Uweke mtu mkorofi juu yake,

Mshitaki asimame mkono wake wa kuume.

⁷Katika kuhukumiwa ataonekana hana haki,[#Mit 28:9]

Na sala yake itadhaniwa kuwa ni dhambi.

⁸Siku zake na ziwe chache,[#Mdo 1:20]

Usimamizi wake na atwae mtu mwingine.

⁹Wanawe na wawe yatima,[#Kut 22:24; Yer 18:21]

Na mkewe na awe mjane.

¹⁰Kutanga na watange wanawe na kuomba,[#Mwa 4:12]

Watafute chakula mbali na mahame yao.

¹¹Mdai na anase vitu vyote alivyo navyo,[#Ayu 18:9]

Wageni na wateke mapato ya kazi yake.

¹²Asiwe na mtu wa kumfanyia fadhili,

Wala mtu wa kuwahurumia yatima wake.

¹³Wazao wake waangamizwe,[#Zab 37:28; Mit 10:7]

Jina lao likafutwe katika kizazi cha pili.

¹⁴Uovu wa baba zake ukumbukwe mbele za BWANA,[#Kut 20:5; Neh 4:5]

Na dhambi ya mamaye isifutwe.

¹⁵Ziwe mbele za BWANA daima,[#Ayu 18:17]

Aliondoe kumbukumbu lao duniani.

¹⁶Kwa kuwa hakukumbuka kutenda fadhili,

Bali alimfukuza mnyonge na mhitaji,

Hata akamfisha mtu aliyevunjika moyo,

¹⁷Naye alipenda kulaani, nako kukampata.

Hakupendezwa na kubariki, kukawa mbali naye,

¹⁸Alijivika laana kana kwamba ni vazi lake.

Ikamwingilia moyoni kama maji,

Na kama mafuta mifupani mwake.

¹⁹Na iwe kwake kama vazi ajivikalo,

Na kama mshipi ajifungao daima.

²⁰Ndiyo malipo ya washitaki wangu toka kwa BWANA,

Na ya hao wanaoisingizia nafsi yangu mabaya.

²¹Na Wewe, MUNGU, Bwana, unitendee kwa ajili ya jina lako,

Kwa kuwa fadhili zako ni njema uniokoe.

²²Kwa maana mimi ni mnyonge na mhitaji,

Na moyo wangu umejeruhi ndani yangu.

²³Ninapita kama kivuli kianzacho kutoweka,

Ninapeperushwa kama nzige.

²⁴Magoti yangu yamedhoofu kwa kufunga,[#Ebr 12:12]

Na mwili wangu umekonda kwa kukosa mafuta.

²⁵Nami nalikuwa laumu kwao,[#Isa 37:22; Mt 27:39; Mk 15:29]

Wanionapo hutikisa vichwa vyao.

²⁶Ee BWANA, Mungu wangu, unisaidie,

Uniokoe sawasawa na fadhili zako.

²⁷Nao wakajue ya kuwa ndio mkono wako;[#Ayu 37:7]

Wewe, BWANA, umeyafanya hayo.

²⁸Wao walaani, bali Wewe utabariki,[#Hes 22:12; Isa 65:14]

Wameondoka wao wakaaibishwa,

Bali mtumishi wako atafurahi.

²⁹Washitaki wangu watavikwa fedheha,

Watajivika aibu yao kama joho.

³⁰Nitamshukuru BWANA kwa kinywa changu,

Naam, nitamsifu katikati ya mkutano.

³¹Maana atasimama mkono wa kuume wa mhitaji

Amwokoe na wanaoihukumu nafsi yake.