Sala ya Ukombozi kutoka kwa Adui

¹Ee BWANA, uniokoe na mtu mbaya,

Unihifadhi na mtu wa jeuri.

²Waliowaza mabaya mioyoni mwao,

Kila siku huondokesha vita.

³Wamenoa ndimi zao kama nyoka,[#Rum 3:13]

Sumu ya fira i chini ya midomo yao.

⁴Ee BWANA, unilinde na mikono ya mtu asiye haki;

Unihifadhi na mtu wa jeuri;

Waliowaza kuzipotosha hatua zangu.

⁵Wenye kiburi wamenifichia mtego na kamba;[#Zab 10:9; Yer 18:22; Lk 11:53-54]

Wametandika wavu kando ya njia;

Wameniwekea matanzi.

⁶Nimemwambia BWANA, Ndiwe Mungu wangu;[#Zab 16:2]

Ee BWANA, uisikie sauti ya dua zangu.

⁷Ee MUNGU Bwana, nguvu za wokovu wangu,[#Kum 33:27-29; Zab 18:32]

Umenifunika kichwa changu siku ya vita.

⁸Ee BWANA, usimpe asiye haki tamaa zake,[#Ayu 5:12,13]

Usiifanikishe hila yake, wasije wakajiinua.

⁹Nao wainuapo vichwa watu wanaonizunguka,[#Zab 7:16]

Madhara ya midomo yao yawafunike.

¹⁰Makaa ya moto yawaangukie, watupwe motoni,[#Zab 11:6]

Na katika mashimo, wasipate kusimama tena.

¹¹Msingiziaji hatawekwa imara katika nchi,

Mtu wa jeuri, uovu humwinda kumwangamiza.

¹²Najua ya kuwa BWANA atamfanyia mnyonge hukumu,[#Zab 109:31]

Na wahitaji haki yao.

¹³Hakika wenye haki watalishukuru jina lako,

Wenye adili watakaa mahali ulipo Wewe.