Sala kwa Ukombozi wa Kitaifa na Usalama

¹Na ahimidiwe BWANA, mwamba wangu,[#2 Sam 22:35]

Anifundishaye mikono yangu vita,

Vidole vyangu kupigana.

²Mhisani wangu na boma langu,

Ngome yangu na mwokozi wangu,

Ngao yangu niliyemkimbilia,

Huwatiisha watu wangu chini yangu.

³Ee BWANA, mtu ni kitu gani hata umjue?[#Ayu 7:17-18; Zab 8:4; Ebr 2:6]

Na binadamu hata umwangalie?

⁴Binadamu amefanana na ubatili,

Siku zake ni kama kivuli kipitacho.

⁵BWANA, uziinamishe mbingu zako, ushuke,[#Isa 64:1]

Uiguse milima nayo itatoka moshi.

⁶Utupe umeme, uwatawanye,

Uipige mishale yako, uwafadhaishe.

⁷Uinyoshe mikono yako toka juu, uniponye,[#Zab 69:1; Mal 2:11]

Unitoe katika maji mengi, katika mkono wa wageni.

⁸Vinywa vyao vyasema visivyofaa,

Na mkono wao wa kuume ni mkono wa uongo.

⁹Ee Mungu, nitakuimbia wimbo mpya,[#Zab 33:2]

Kwa kinanda chenye nyuzi kumi nitakuimbia.

¹⁰Awapaye wafalme wokovu,

Amwokoa Daudi, mtumishi wake, na upanga wa uovu.

¹¹Uniponye, unitoe,

Katika mkono wa wageni.

Vinywa vyao vyasema visivyofaa,

Na mkono wao wa kuume ni mkono wa uongo.

¹²Wana wetu na wawe kama miche

Waliokua ujanani.

Binti zetu kama nguzo za pembeni

Zilizonakishwa kwa kupamba hekalu.

¹³Ghala zetu na zijae

Zenye akiba za jinsi zote.

Kondoo zetu na wazae

Elfu na makumi elfu mashambani mwetu.

¹⁴Ng’ombe zetu na wachukue mizigo,[#Law 26:17]

Kusiwe na kushambuliwa.

Wala kusiwe na kuhamishwa,

Wala malalamiko katika njia zetu.

¹⁵Heri watu wenye hali hiyo,[#Kum 33:29]

Heri watu wenye BWANA kuwa Mungu wao.