Sifa kwa Mungu Kuutunza Yerusalemu

¹Haleluya.

Msifuni Bwana;

Maana ni vema kumwimbia Mungu wetu,

Maana kwapendeza, kusifu ni kuzuri.

²BWANA ndiye aijengaye Yerusalemu,[#Kum 30:3; Isa 27:13; Yer 32:37; Eze 36:24]

Huwakusanya waliotawanyika wa Israeli.

³Huwaponya waliopondeka moyo,[#Isa 61:1; Lk 4:18]

Na kuziganga jeraha zao.

⁴Huihesabu idadi ya nyota,[#Mwa 15:5; Isa 40:26]

Huzipa zote majina.

⁵Bwana wetu ni mkuu na mwingi wa nguvu,[#1 Nya 16:25; Nah 1:3]

Akili zake hazina mpaka.

⁶BWANA huwategemeza wenye upole,[#Zab 146:8]

Huwaangusha chini wenye jeuri.

⁷Mwimbieni BWANA kwa kushukuru,[#Efe 5:20]

Mwimbieni Mungu wetu kwa kinubi.

⁸Huzifunika mbingu kwa mawingu,[#Ayu 38:20]

Huitengenezea nchi mvua,

Na kuyameesha majani milimani.

⁹Humpa mnyama chakula chake,[#Ayu 38:41; Mt 6:26; Lk 12:24]

Wana-kunguru waliao.

¹⁰Hapendezwi na nguvu za farasi,[#Hos 1:7]

Wala hairidhii miguu ya mtu.

¹¹BWANA huwaridhia wao wamchao,

Na kuzitarajia fadhili zake.

¹²Msifu BWANA, Ee Yerusalemu;

Msifu Mungu wako, Ee Sayuni.

¹³Maana ameyakaza mapingo ya malango yako,

Amewabariki wanao ndani yako.

¹⁴Ndiye afanyaye amani mipakani mwako,

Akushibishaye kwa unono wa ngano.

¹⁵Huipeleka amri yake juu ya nchi,[#Ayu 37:12]

Neno lake lapiga mbio sana.

¹⁶Ndiye atoaye theluji kama sufu,

Huimwaga barafu yake kama majivu,

¹⁷Hutupa mvua ya mawe kama makombo,

Mbele ya baridi yake ni nani awezaye kusimama?

¹⁸Hulituma neno lake na kuviyeyusha,

Huuvumisha upepo wake, maji yakatiririka.

¹⁹Humhubiri Yakobo neno lake,[#Kum 33:4; Mal 4:4; Rum 3:2]

Na Israeli amri zake na hukumu zake.

²⁰Hakulitendea taifa lo lote mambo kama hayo,[#Kum 4:32; Mdo 14:16; Rum 3:1-2]

Wala hukumu zake hawakuzijua.

Haleluya.