Ukuu na Wema wa Mungu

¹Mpigieni BWANA vigelegele, enyi wenye haki,

Kusifu kunawapasa wanyofu wa moyo.

²Mshukuruni BWANA kwa kinubi,

Kwa kinanda cha nyuzi kumi mwimbieni sifa.

³Mwimbieni wimbo mpya,[#Isa 42:10]

Pigeni kwa ustadi kwa sauti ya shangwe.

⁴Kwa kuwa neno la BWANA lina adili,

Na kazi yake yote huitenda kwa uaminifu.

⁵Huzipenda haki na hukumu,

Nchi imejaa fadhili za BWANA.

⁶Kwa neno la BWANA mbingu zilifanyika,[#Yn 1:1-3; Ebr 11:3; Ayu 26:13]

Na jeshi lake lote kwa pumzi ya kinywa chake.

⁷Hukusanya maji ya bahari chungu chungu,

Huviweka vilindi katika ghala.

⁸Nchi yote na imwogope BWANA,

Wote wakaao duniani na wamche.

⁹Maana Yeye alisema, ikawa;[#Mwa 1:3]

Na Yeye aliamuru, ikasimama.

¹⁰BWANA huyabatilisha mashauri ya mataifa,

Huyatangua makusudi ya watu.

¹¹Shauri la BWANA lasimama milele,[#Ayu 23:13; Mit 19:21; Eze 38:10; Mdo 4:27,28]

Makusudi ya moyo wake vizazi na vizazi.

¹²Heri taifa ambalo BWANA ni Mungu wao,

Watu aliowachagua kuwa urithi wake.

¹³Toka mbinguni BWANA huchungulia,[#2 Nya 16:9; Ayu 28:24; Zab 11:4]

Huwatazama wanadamu wote pia.

¹⁴Toka mahali pake aketipo

Huwaangalia wote wakaao duniani.

¹⁵yeye aiumbaye mioyo yao wote[#Isa 64:8; Ayu 11:11; Zab 44:21; Mit 24:12; Yer 32:19; Hes 7:2]

Huzifikiri kazi zao zote.

¹⁶Hapana mfalme aokokaye kwa wingi wa uwezo,

Wala shujaa haokoki kwa wingi wa nguvu.

¹⁷Farasi hafai kitu kwa wokovu,

Wala hamponyi mtu kwa wingi wa nguvu zake.

¹⁸Tazama, jicho la BWANA li kwao wamchao,[#Ayu 36:7; Zab 34:15]

Wazingojeao fadhili zake.

¹⁹Yeye huwaponya nafsi zao na mauti,

Na kuwahuisha wakati wa njaa.

²⁰Nafsi zetu zinamngoja BWANA;

Yeye ndiye msaada wetu na ngao yetu.

²¹Maana mioyo yetu itamfurahia,

Kwa kuwa tumelitumainia jina lake takatifu.

²²Ee BWANA, fadhili zako zikae nasi,

Kama vile tulivyokungoja Wewe.