Sifa kwa Kukombolewa katika Shida

¹Nitamhimidi BWANA kila wakati,[#1 Sam 21:13-15]

Sifa zake zi kinywani mwangu daima.

²Katika BWANA nafsi yangu itajisifu,[#Yer 9:24; 1 Kor 1:31]

Wanyenyekevu wasikie wakafurahi.

³Mtukuzeni BWANA pamoja nami,

Na tuliadhimishe jina lake pamoja.

⁴Nalimtafuta BWANA akanijibu,[#Zab 18:6; Yon 2:2; Mt 7:7; Lk 11:9]

Akaniponya na hofu zangu zote.

⁵Wakamwelekea macho wakatiwa nuru,

Wala nyuso zao hazitaona haya.

⁶Maskini huyu aliita, BWANA akasikia,[#Zab 3:4; 2 Sam 22:1]

Akamwokoa na taabu zake zote.

⁷Malaika wa BWANA hufanya kituo,[#Dan 6:22; Mwa 32:1; 2 Fal 6:17; Ebr 1:14]

Akiwazungukia wamchao na kuwaokoa.

⁸Onjeni mwone ya kuwa BWANA yu mwema;[#1 Pet 2:3]

Heri mtu yule anayemtumaini.

⁹Mcheni BWANA, enyi watakatifu wake,[#Flp 4:19]

Yaani, wamchao hawahitaji kitu.

¹⁰Wana-simba hutindikiwa, huona njaa;

Bali wamtafutao BWANA hawatahitaji kitu cho chote kilicho chema.

¹¹Njoni, enyi wana, mnisikilize,

Nami nitawafundisha kumcha BWANA.

¹²Ni nani mtu yule apendezwaye na uzima,[#1 Pet 3:10-12]

Apendaye siku nyingi apate kuona mema?

¹³Uuzuie ulimi wako na mabaya,[#1 Pet 2:22]

Na midomo yako na kusema hila.

¹⁴Uache mabaya ukatende mema,

Utafute amani ukaifuatie.

¹⁵Macho ya BWANA huwaelekea wenye haki,[#Ayu 36:7]

Na masikio yake hukielekea kilio chao.

¹⁶Uso wa BWANA ni juu ya watenda mabaya,[#Law 17:10; Yer 44:11; Mit 10:7]

Aliondoe kumbukumbu lao duniani.

¹⁷Walilia, naye BWANA akasikia,

Akawaponya na taabu zao zote.

¹⁸BWANA yu karibu nao waliovunjika moyo,

Na waliopondeka roho huwaokoa.

¹⁹Mateso ya mwenye haki ni mengi,

Lakini BWANA humponya nayo yote.

²⁰Huihifadhi mifupa yake yote,[#Yn 19:36]

Haukuvunjika hata mmoja.

²¹Uovu utamwua asiye haki,[#Zab 94:23]

Nao wamchukiao mwenye haki watahukumiwa.

²²BWANA huzikomboa nafsi za watumishi wake,[#2 Sam 4:9; Zab 103:4]

Wala hawatahukumiwa wote wamkimbiliao.