Uovu wa Watu na Wema wa Mungu

¹Kuasi kwake yule mwovu hunena moyoni mwake,[#Rum 3:18; Mwa 20:11; Mit 8:13; Mhu 12:3]

Hakuna hofu ya Mungu mbele ya macho yake.

²Kwa maana hujipendekeza machoni pake

Kuwa upotovu wake hautaonekana na kuchukiwa.

³Maneno ya kinywa chake ni uovu na hila,[#Yer 4:22]

Ameacha kuwa na akili na kutenda mema.

⁴Huwaza maovu kitandani pake,[#Mik 2:1; Isa 65:2]

Hujiweka katika njia mbaya; ubaya hauchukii.

⁵Ee BWANA, fadhili zako zafika hata mbinguni,[#Zab 57:10]

Uaminifu wako hata mawinguni.

⁶Haki yako ni kama milima ya Mungu,[#Ayu 11:8; Rum 11:33; Ayu 7:20; Zab 145:9]

Hukumu zako ni vilindi vikuu,

Ee BWANA, unawaokoa wanadamu na wanyama.

⁷Ee Mungu, jinsi zilivyo na thamani fadhili zako![#Rut 2:12]

Wanadamu huukimbilia uvuli wa mbawa zako.

⁸Watashibishwa kwa unono wa nyumba yako,[#Ayu 20:17; Ufu 22:1]

Nawe utawanywesha mto wa furaha zako.

⁹Maana kwako Wewe iko chemchemi ya uzima,[#Isa 12:3; Yer 2:13; Zek 13:1; Yn 4:10,14; Ufu 21:6; Mdo 26:18; Efe 5:8; Kol 1:13; 1 Pet 2:9]

Katika nuru yako tutaona nuru.

¹⁰Uwadumishie wakujuao fadhili zako,[#Yer 22:16]

Na wanyofu wa moyo uaminifu wako.

¹¹Mguu wa kiburi usinikaribie,

Wala mkono wa wasio haki usinifukuze.

¹²Huko ndiko walikoanguka wafanyao maovu;

Wameangushwa chini wasiweze kusimama.