Wimbo wa Arusi ya Kifalme

¹Moyo wangu umefurika kwa neno jema,

Mimi nasema niliyomfanyizia mfalme;

Ulimi wangu ni kalamu ya mwandishi mstadi.

²Wewe u mzuri sana kuliko wanadamu;

Neema imemiminiwa midomoni mwako,

Kwa hiyo Mungu amekubariki hata milele.

³Jifungie upanga wako pajani, wewe uliye hodari,

Utukufu ni wako na fahari ni yako.

⁴Katika fahari yako usitawi uendelee

Kwa ajili ya kweli na upole na haki

Na mkono wako wa kuume

Utakufundisha mambo ya kutisha.

⁵Mishale yako ni mikali, watu huanguka chini yako;

Imo mioyoni mwa adui za mfalme.

⁶Kiti chako cha enzi, Mungu, ni cha milele na milele,[#Ebr 1:8-9; Zab 93:2; Isa 9:6,7]

Fimbo ya ufalme wako ni fimbo ya adili.

⁷Umeipenda haki;[#Zab 33:5; Mt 3:15; Ebr 1:9; Isa 61:1; Yn 20:17]

Umeichukia dhuluma.

Kwa hiyo MUNGU, Mungu wako, amekupaka mafuta,

Mafuta ya furaha kuliko wenzako.

⁸Mavazi yako yote hunukia manemane

Na udi na mdalasini.

Katika majumba ya pembe

Vinubi vimekufurahisha.

⁹Binti za wafalme wamo

Miongoni mwa akina bibi wako wastahiki.

Mkono wako wa kuume amesimama malkia

Amevaa dhahabu ya Ofiri.

¹⁰Sikia, binti, utazame, utege sikio lako,[#Kum 21:13]

Uwasahau watu wako na nyumba ya baba yako.

¹¹Naye mfalme atautamani uzuri wako,[#Zab 95:6; Isa 54:5]

Maana ndiye bwana wako, nawe umsujudie.

¹²Na binti Tiro analeta kipawa chake,

Nao matajiri wa watu watajipendekeza kwako.

¹³Binti mfalme yumo ndani ana fahari tupu,[#Ufu 19:7,8]

Mavazi yake ni ya nyuzi za dhahabu.

¹⁴Atapelekwa kwa mfalme

Na mavazi yaliyofumwa kwa uzuri.

Wanawali wenzake wanaomfuata,

Watapelekwa kwako.

¹⁵Watapelekwa kwa furaha na shangwe,

Na kuingia katika nyumba ya mfalme.

¹⁶Badala ya baba zako watakuwapo watoto wako,[#1 Pet 2:9; Ufu 1:6]

Utawafanya kuwa wakuu katika nchi zote.

¹⁷Jina lako nitalifanya kuwa kumbukumbu[#Isa 11:10; Mal 1:11]

Katika vizazi vyote.

Kwa hiyo mataifa watakushukuru

Milele na milele.